Выбрать язык
Книги Ветхого Завета
Книги Нового Завета
с русским текстом1Султы, султы, кужыменыд дӥсяськы, Сӥон!
Быдӟымлыкедлэн дӥськутэныз дӥсяськы, Иерусалим, святой город!
Вандӥськон сямез ортчытымтэ, кырсь адями тон пушкы уз ни пыры.
2Вылысьтыд тузондэ курткы; султы, пленэ сюрем Иерусалим!
Чыртыысьтыд жильыостэ басьты, пленэ сюрем Сӥонлэн нылыз!
3Уго тазьы шуэ Кузё-Инмар: дунтэк тӥ вузамын вал,
азвесьтэк тӥ берен басьтэмын луоды,
4уго тазьы шуэ Инмар Кузё-Инмар:
азьвыл Мынам калыке Египетэ ветлӥз отын улон вылысь,
нош Ассур юнме шоры сое ӝикатыса возиз.
5Нош али маи Мынам татын вань? – шуэ Кузё-Инмар, –
Мынам калыке дунтэк басьтэмын,
нош солэн кивалтӥсьёсыз укылтэмъясько, – шуэ Кузё-Инмар, –
котькудаз нуналэ, ялан Мынэсьтым нимме сантэмало.
6Соин ик Мынэсьтым нимме калыке тодоз,
соин ик со нуналэ тодоз –
Мон со ик тазьы шуись: «Тани Мон!»
7Макем чебересь гурезьёсын ӟеч ивор верасьлэн пыдъёсыз,
тупаса улон сярысь ивортӥсьлэн, шумпотон тодытӥсьлэн,
утиськон сярысь ивортӥсьлэн,
Сӥонлы тазьы верасьлэн вамышъёсыз:
«Эксэе пуксиз тынад Инмаред!»
8Возьмаськисьёсыдлэн куаразы чузъяське –
соос куаразэс будэтӥзы но ваньзы огазьын шумпото-шулдыръясько,
уго ас синмынызы адӟо, кызьы Кузё-Инмар Сӥонэ берытске.
9Тӥ, Иерусалимлэн куашкатэм юрт бервылъёсыз,
шумпотэ-данъяське, ӵош кариськыса кырӟалэ,
уго Кузё-Инмар буйгатӥз Аслэсьтыз калыксэ –
Иерусалимез тушмон киулысь мозмытӥз.
10Вань калыкъёслэн син азязы Кузё-Инмар
Аслэсьтыз дун-сьӧлыктэм суйбыгытсэ кыре поттӥз, –
музъемлэн вань пумъёсыз адӟозы Инмармылэсь утёнзэ.
11Кошке, кошке, потэлэ отысь;
мар чылкыт ӧвӧл, со борды эн йӧтӥське;
солэн пӧлысьтыз потэлэ, асьтэдыз сузялэ,
Кузё-Инмарлэсь сосудъёссэ нуллӥсьёс!
12Тӥ уго дыртытэк потоды, бызьыса уд мынэ,
малы ке шуоно тӥляд азяды Кузё-Инмар мыноз,
Израильлэн Инмарез мышкытӥды возьмась-чаклась луоз.
13Тани, Мынам Ляльчие азинлыко-берекето луоз,
ӝутскоз, тубоз, данэ потоз.
14Тон шоры учкыса, макем тросэз паймылӥзы, –
вань адямиослэн сярысь,
Солэн ымнырыз сузмытэмын вал,
Солэн ымнырыз адями пиослэн тусбуйзылы укшасьтэм
каремын вал!
15Тазьы со трос калыкъёсты паймытоз;
эксэйёс Со азьын ымъёссэс ворсалозы,
уго соос адӟозы сое,
мар соослы верамын ӧй вал,
тодозы сое, мае ӧз кылылэ.
Глава 52