Выбрать язык
Книги Ветхого Завета
Книги Нового Завета
с русским текстом1Шулдыръяськы, ноку но нылпи вайисьтэм, нылпи ваёнэз тодӥсьтэм!
Шумпотыса черектӥськы, нылпи ваёнэн курадӟымтэ!
Уго куштэм кышномуртлэн, кузпалэн улӥсь кышномуртлэн сярысь,
нылпиез эшшо но тросгес луоз, – шуэ Кузё-Инмар. –
2Балаганэдлэсь пушсэ, солэсь шобретъёссэ паськытаты;
эн кепыра, – сюрыоссэ кузьгес лэзь, ӵогъёстэ юнматы.
3Тон бурпала но, паллян пала но вӧлмод,
тынад выжыед калыкъёсты киултоз,
тырттэм кельтэм городъёсын улыны кутскоз.
4Эн кышка, возьытэ кельтэмын уд луы;
эн возьдаськы, уго сантэман улэ уд сюры:
егит дыръяд сантэмаськыса улэмдэ вунэтод,
азьланяз тодад уд ни вайылы палтэк кыльыса сӥтэм-сантэм улэмдэ.
5Уго тынад Кылдытӥсед – со тынад кузпалыд;
Саваоф Кузё-Инмар Солэн нимыз, тынад Мозмытӥсед –
Израильлэн Дун-Сьӧлыктэмез:
быдэс музъемлэн Инмарез шуыса, Со нимаськоз.
6Уго лулыныз-сюлмыныз куректӥсь куштэм кышномуртэз кадь
Кузё-Инмар тонэ ӧте,
егит дыръяз бызем, нош бӧрысь куштэм кышномуртэз кадь
тонэ чортэ, – шуэ Инмаред.
7Вакчи дырлы гинэ Мон тонэ кельтӥ,
но туж гажаса-жаляса тонэ берен бордам куто.
8Вожпотонэ ӟырдан дыръя Мон вакчи дырлы тынэсьтыд
ымнырме ватӥ.
Мон тонэ пумтэм вапумъёс ӵоже гажаса-жаляса возё, –
шуэ Мозмытӥсед, Кузё-Инмар. –
9Уго та Мон понна Нойлэн вуосыз кадь потэ: Мон кыл сётӥ,
Нойлэн вуосыз азьланяз музъем вылэ уз ни вуэ шуыса,
озьы ик кыл сётӥ,
тон вылэ уг ни йыркуръяськы, тонэ уг ни пыкылы шуыса.
10Гурезьёс вырӟозы, вырйылъёс зуркалозы,
нош Мынам гажан-жалянэ тон бордысь уз кошкы,
тупаса улонэлэн сӥзён-косонэз уз вырӟылы, –
шуэ тонэ гажась-жалясь Кузё-Инмар.
11Куанер, сильтӧлэн пельтӥськись, буйгатскисьтэм!
Тани, Мон изъёстэ рубин вылэ поно,
тынэсьтыд инъеттэ сапфир излэсь лэсьто;
12укноостэ рубинъёслэсь лэсьто, капкаостэ – марӟанлэсь,
быдэс кенердэ дуно изъёслэсь пукто.
13Вань нылпиостэ Кузё-Инмар дышетоз,
нылпиосыдлэн туж бадӟым каньыллыксы луоз.
14Тон шонерлыко улыса юнматскод,
зӥбето улонлэсь кыдёкын сылод,
тыныд номырлэсь кышканы кулэ ӧвӧл,
шимес макелэсь но, со тынад матад уз лыкты.
15Тани тыныд пумит ожмаськон тӥрлык кутылыны кутскозы,
но со бордын Мынам эрике ӧвӧл;
кин тыныд пумит ожмаськон тӥрлык кутоз, со тон азе усёз.
16Тани Мон дуриськисез кылдытӥ,
со тыл пушкын эгыръёсты аратэ но аслаз ужезлы кулэ арбери дуре, –
Мон но быдтӥсез кылдытӥсько быдтон понна.
17Тыныд пумит лэсьтэм одӥг арберилэн но азинлыкез уз луы;
котькудзэ судын тыныд пумит султӥсь кылэз тон янгыше уськытод.
Со Кузё-Инмарлэн ляльчиосызлэн басьтоно люкетсы луэ,
соослэн Мон бордысь шонере потонзы, – шуэ Кузё-Инмар.
Глава 54