Выбрать язык
Книги Ветхого Завета
Книги Нового Завета
с русским текстом1Сюды куасьмыса улӥсьёс! Ваньды ву дуре лыктэ;
кинъёслэн азвесьсы ӧвӧл, тӥ но лыктэ.
Лыктэлэ, басьтэлэ, сиелэ; лыктэлэ,
азвесьтэк, дун тырытэк, вина но йӧл басьтэлэ.
2Нянь ке ӧвӧл, малы азвесез мертаськоды,
асьтэлэсь поттэм уждундэс но малы лыдъяськоды,
кӧттэс ке со уг тыры?
Монэ сак кылзӥськиды ке, ӟечлык сиёды,
тӥляд лулды кӧйын-вӧйын тыр луоз.
3Мон доры лыктэ, пельдэс мыкыртыса кылзӥське,
соку тӥляд лулды ӟечлык пӧлын улоз,
пумтэм вапумъёс ӵожелы тӥледлы сӥзён-косонме сёто,
Давидлы сётыны сӥзем дун-шектэм, вошъяськисьтэм
ӟечлыкъёсме сёто.
4Тани, Мон Сое калыкъёс понна адӟытӥсь,
калыкъёслы азьветлӥсь, дышетӥсь карыса сётӥ.
5Тани, тон ӧтёд аслэсьтыд тодымтэ калыктэ,
тонэ тодӥсьтэм калыкъёс тон доры дыртозы
тынад Инмаред Кузё-Инмар понна,
Израильлэн Дун-Сьӧлыктэмез понна, Со уго тонэ данэ поттӥз.
6Утчалэ шедьтыны луоно дыръя Кузё-Инмарез;
ӧте Сое матын дыръяз.
7Сьӧлыклэсь кышкасьтэм шонертэм сюрессэ мед кельтоз,
законлы пумит улӥсь аслэсьтыз малпанъёссэ мед воштоз,
Кузё-Инмар пала мед берыктӥськоз – Со жалялоз сое,
милям Инмармы пала мед кариськоз –
Со уго туж гажась-жалясь.
8Мынам малпанъёсы – со тӥляд малпанъёсты ӧвӧл,
тӥляд сюресъёсты – со Мынам сюресъёсы ӧвӧл, – шуэ Кузё-Инмар. –
9Макем ин вылӥын музъемлэсь,
сокем ик Мынам сюресъёсы тӥляд сюресъёсты сярысь вылӥынгес,
Мынам малпанъёсы но тӥляд малпанъёстылэсь вылӥынгес.
10Зорен лымы инмысь васько но отчы берен уг берытско,
соос музъемез люктало но емыш вайись, кидысэз удатӥсь каро –
со кизисьлы кидыс мед поттоз, сиисьлы нянь мед сётоз.
11Озьы ик Мынам кылысьтым-ымысьтым потӥсь кылы но
тырттэмен Мон доры уг берытскы,
со быдэстэ сое, мар Мыным кулэ,
лэсьтэ сое, мар понна Мон сое ыстӥ.
12Озьыен, тӥ шулдыр мылкыдын потоды,
каньыллык сӥзьыса, тӥледыз келялозы;
гурезьёс но мувыръёс тӥляд азяды шумпотыса кырӟалозы,
бусыысь вань писпуос тӥледлы кизэс чабозы.
13Тёрнпу интые кипарис будоз; пушнер интые миртапу ӝужалоз;
ваньмыз та Кузё-Инмарез данъян понна луоз,
пумтэм вапумъёслы тӥяськонтэм-сӧриськонтэм тодмет луоз.
Глава 55