Выбрать язык
Книги Ветхого Завета
Книги Нового Завета
с русским текстом1Тазьы шуэ Кузё-Инмар: зэмлыкез, шонерлыкез санэ поныса улэ;
утиськон сётонэ, шонерлыкелэн усьтӥськонэз матын.
2Шудо со мурт, кин тазьы улэ,
шудо та бордын юн возиськись адями пи,
со субботаез саптаськытэк уте,
номыр но уродзэ медам лэсьты шуыса, кизэ чакласа улэ.
3Кузё-Инмар пала кариськем мурт калык пӧлысь
потэм пи медаз шуы:
«Кузё-Инмар монэ Ас калыкезлэсь чылкак висъяз ини»,
улошо карем пи медаз шуы: «Тани мон куасьмем писпу».
4Уго Кузё-Инмар улошо каремъёс сярысь тазьы шуэ:
«Субботаосме утьыса, Мыным ярамонзэ бырйыса,
Мынам сӥзён-косонэ борды юн кутӥськыса улӥсьёслы, –
5соослы Мон Аслам коркам, борддоръёсы вискы инты сёто,
умойзэгес ним быръё, пиослы но нылъёслы сярысь,
пумтэм вапумъёс ӵожелы бырисьтэм-ӵушиськисьтэм ним сёто.
6Мурт калык пӧлысь Кузё-Инмар пала кариськем пиосты
ужан-тыршон понна,
Монэ, Кузё-Инмарез, яратон понна, ляльчие луон понна, –
ваньзэс, кинъёс субботаез саптаськытэк утё но
Мынэсьтым сӥзён-косонме юн возё, –
7соосты, Аслам святой гурезям вайыса,
вӧсяськон коркам шумпотон сётыны пырто.
Соослэн тылын сутӥськись курбонъёссы, вир сётонъёссы
Мыным ярамонэсь луозы,
уго Мынам коркае вань калыкъёс понна вӧсяськон корка
шуыса нимаськоз».
8Пазьгиськыса улӥсь Израиль калыкез бичась
Инмар Кузё-Инмар шуэ:
«Со доры люкаськемъёсты сяна, эшшо мукетъёссэ
Мон со доры люкало на».
9Вань луд пӧйшуръёс, вань нюлэс пӧйшуръёс, сиськыны лыктэ!
10Израильлэн вань возьмаськисьёсыз синтэмесь, укылтэмесь:
соос ваньзы кылтэм айы пуныос, утыны быгатӥсьтэмъёс,
выдыса кылльыкузы ум йылтӥзы супыльтӥсьёс, изьыны яратӥсьёс.
11Соос – пуныос, сукесь, кӧт тыронэз валасьтэмесь,
соос – укылтэм возьмаськисьёс:
ваньзы асьсэлэн сюрессы вылэ,
асьсэлы пайда-барыш басьтон шоры учко;
12лыктэлэ, – шуо, – мон вина шедьто,
сикер винаез кӧттырымонамы юомы;
ӵуказе но со ик луоз, мар вал туннэ, эшшо тросгес луоз.
Глава 56