Выбрать язык
Книги Ветхого Завета
Книги Нового Завета
с русским текстом1Шонер улӥсь кулэ ке, нокинлэн но та пумысен сюлмыз вӧсь уг луы;
Инмарлэсь кышкаса улӥсьёс музъем вылысь басьтӥсько ке,
нокин но уг малпа, шонер улӥсь уродлык-леклык пӧлысь
басьтӥське шуыса.
2Со каньыллыке кошке; шонер сюрес кузя ветлӥсьёс
каньыллык интыын кыллёзы.
3Нош тӥ, туно-пеллёлэн нылпиосыз,
калгыса, азыса улӥсьлэн кидысэз, татчы лыктэ!
4Кинэ тӥ мыскыл кариськоды?
Кинлы пумит ымдэс паськыт усьтӥськоды, кылдэс поттӥськоды?
Йыружлэн нылпиосыз ӧвӧл-а тӥ, ӧрекчаськон-пӧяськонлэн кидысэз,
5сульдэръёсты яратыса пӧсектэм мылкыдын
ваё писпуос улын улӥсьёс, шуръёс дурын, изгурезьёсысь висъёсын
нылпиосты курбон сётӥсьёс ӧвӧл-а тӥ?
6Шуръёсысь вольыт изъёс вылын тынад адӟонэд;
соос, соос – тынад адӟонэд;
тон соослы курбон-салам кисьтод, соослы курбон сётӥськод:
кельше-а Мыным тынад та ужед?
7Ӝужыт, син шоры йӧтӥсь гурезь йылэ тон
кӧлан интыдэ пуктӥськод но курбон сётыны отчы тубиськод.
8Ӧс сьӧры, косяк-янак сьӧры но ”утись” макеос пуктылӥськод;
Мон бордысь куштӥськиськод но,
гольык кариськыса, отчы тубиськод;
кӧлан интыдэ паськыт вӧлдӥськод но
кылльыны яратоноосыныд вераськиськод, – инты чакласькод.
9Тон эксэй доры но ветлӥд ческыт зыно зыраськон вӧйын,
вӧйёстэ йылэтылӥд, иворчиостэ кыдёкысь кыдёке ыстылӥд,
дунне пыдэскы сюрыны ярамонозь астэ ултӥяны сётылӥд.
10Кузь сюресэдлэсь жадьылӥд ке но,
ӧд вера: «Оскиськонэ ышемын!»
Киыд улэп на шуыса шӧдылӥд, соин ик ӧд шӧдылы лябӟемдэ.
11Кинлэсь бен тон кышкатскид, куалектӥд,
оскиськыны ярантэм калык луид,
Монэ тодад ваемысь, сюлэмад воземысь дугдӥд?
Мон шып улэмен, кема дыр ӵоже чус улэменым сэрен
тон Мынэсьтым кышкамысь ӧд дугды-а?
12Тынэсьтыд зэмлыктэ возьмато, тынэсьтыд ужъёстэ шарае потто –
соос тонэ шонере уз поттэ.
13Викышъяса улыкуд, тынад уллёед тонэ утёз-а? –
Соосты ваньзэ тӧл нуоз, тӧл пельтыса пазьгоз;
нош Мон вылэ оскиськыса улӥсь мурт
музъемез люкетлы басьтоз, святой гурезьме киулаз возёз.
14Кузё-Инмар шуиз: «Ӝутэлэ, ӝутэлэ, ӵошкыт каре сюресэз,
Мынам калыкелэн сюрес вылысьтыз ӵогӟетсэ утялтэ».
15Ӝужыт, Вылӥе Ӝутэм, пумтэм вапумъёс ӵоже Улӥсь, –
Дун-Сьӧлыктэм Солэн нимыз – тазьы шуэ:
Мон улӥсько инъёслэн вылӥязы, вӧсяськон интыын,
озьы ик чигиськыса-ӧпкельыса, зӥбыт-востэм духен
улӥсьёс бордын, –
зӥбыт-востэмъёслэсь духсэс улӟытон понна,
чигиськыса-ӧпкельыса улӥсьёслэсь сюлэмзэс улӟытон понна.
16Пумтэм вапумъёс ӵоже тӥледыз вӧсь карыса уг улы,
ялан тӥ вылэ вожме уг потты, соку Мон азьысь адями лул но,
Мынам улыны сётэм шокась макеосы но лябӟысалзы.
17Лушкаса поттэм ваньбурезлэн сьӧлыкез понна
Мон солы вожме поттылӥ,
вӧсь карылӥ сое, ымнырме ватылӥ, вожме поттыса улӥ;
нош со берыктӥськыса ас сюлэмезлэн курон сюресэз кузяз кошкиз.
18Мон солэсь сюресъёссэ адӟи – бурмыто сое, валтыса нуо,
буйгато ӝоже усемъёсты но.
19Верам кылме быдэсто: каньыллык, каньыллык
кыдёкысьлы но, матысьлы но, – шуэ Кузё-Инмар, –
сое бурмыто.
20Нош сьӧлыклэсь кышкасьтэмъёс чус кариськыны быгатӥсьтэм
бугыръяськись зарезь кадесь,
кудӥзлэн вуосыз напраен дэри палькко.
21Сьӧлыклэсь кышкасьтэмъёслы каньыллык ӧвӧл, – шуэ Инмаре.
Глава 57