Выбрать язык
Книги Ветхого Завета
Книги Нового Завета
с русским текстом1Бадӟымен вазиськы, ӝегатскыса эн улы;
гумылэн кадь куарадэ бадӟым кар,
Мынам калыкелы законлы пумит улэмзэ возьматы,
Иаковлэн выжыезлы сьӧлыкъёссэ усьты.
2Котькуд нунал соос Монэ утчало,
тодыны туртто Мынэсьтым сюресъёсме
Инмарезлэсь законъёссэ кулэ карись,
шонер лэсьтыса улӥсь калык музэн.
Шонерлыко судъёс сярысь соос Монэ юало,
Инмарлы матэ кариськемзы потэ:
3«Ми визяськомы, нош Тон малы уд адӟиськы?
Лулмес зӥбломытӥськомы, нош Тон сое малы уд тодӥськы?»
– Соин: асьтэлэн визян нуналады ас тодэменыды улӥськоды,
но мукетъёссэ секытэсь ужъёсты быдэсъятӥськоды.
4Соин: тӥ визяськоды, нош асьтэос керетонъёс,
ченгешонъёс поттӥськоды,
чурыт киыныды мукетъёссэ тышкаськоды;
вылӥын тӥлесьтыд куарадэс кылыны луон понна
та виын тӥ ярамон уд визяське.
5Таӵе-а луыны кулэ Мынам тӥ понна быръем-сётэм
визе (кӧс утёнэ) –
адямилэн лулмугорзэ курадӟытон нуналэз,
куке со камыш куро музэн йырзэ мыкыртэ но,
ас улаз бышкись чурыт дӥсь вальыса,
пень пызьнаса, со вылын кылле?
Тае-а визь (кӧс утён) шуыса нималод,
тае-а Кузё-Инмарлы ярамон нунал шуод?
6Тани, Мынам быръем визе:
шонертэм улонлэн сьӧлтэтэзлэсь мозмыты,
зӥбетлэсь жильыоссэ пертчы но ултӥямъёсты эрике лэзь,
вань зӥбетъёсты куашкаты;
7сютэм улӥсен няньдэ шори люк,
куанер пыдйылчиосты коркад пырты;
гольык ветлӥсез адӟид ке, дӥся сое, ас выжы муртэдлэсь эн пега.
8Соку ӵук ӟардон кадь тынад югытэд пиштыны кутскоз,
ӝог бурмыны кутскод,
шонер улэмедлэн данэз азьпалтӥд мыноз,
Кузё-Инмарлэн пиштӥсь данлыкез тон сьӧрын ветлоз.
9Соку тон Кузё-Инмарлы вазиськид ке, Со тонэ кылоз,
сюлворыса вазиськид ке, Со шуоз: «Тани – Мон!»
Адямиосты ӝикатыса воземысь дугдӥд ке,
чиньыдэ урдыса ӧд ни ке улы,
ӝоже уськытӥсь кылъёсты ӧд ни ке вера,
10сютэм муртлы лулысь-сюлмысь юрттӥд ке,
курадӟисьлэсь лулзэ тыр карид ке,
соку тынад югытэд пеймыт азьын ӝужалоз,
соку тынад пеймытэд нуназе шорлэн югытэз кадь пиштоз;
11соку Кузё-Инмар пырак ӵожелы тынад азьветлӥсед луоз,
сютэм аръёс дыръя лулдэ тыр карылоз, лыостэ юнматоз,
вуэн тырмыт кисьтэм сад кадь тон луод,
вуэз ноку но бырылӥсьтэм ошмес кадь тон луод.
12Тынад выжыосыд дауръёс ӵоже луоё кыр луэм интыосы
улон юртъёс пуктылозы:
трос выжыослэсь вашкала инъетъёссэс тон ӝутод-выльдод,
куашкам юртъеръёсты ӝутӥсь-выльдӥсь шуыса тонэ нималозы,
улыны интыяськон сюресъёсыз выльдӥсь тонэ шуозы.
13Мынам святой нуналам, суббота нуналэз сӥлы карыса,
лулмугорыдлэсь эркияськон-кулэяськонъёссэ быдэсъян пала
ӧд ке вамышты,
суббота нуналэз шумпотон шуыса,
Кузё-Инмарлэн святой нуналэз шуыса нимад ке,
сӥё-сано, дано карид ке,
огшоры нуналлэсь ужъёссэ быдэсъяса ӧд ке улы,
лулмугорыдлэн эркияськон-кулэяськонъёсызлы ӧд ке тэрытскы,
ӧвӧлтэм кылъёсын супыльтыса ӧд ке ветлы, –
14соку Кузё-Инмар бордын шумпотыса улод,
Мон тонэ музъемлэн вылӥяз ӝуто но Иаковлэсь,
тынад атаедлэсь, люкетсэ веръяны сёто, – Кузё-Инмар тае вераз.
Глава 58