Выбрать язык
Книги Ветхого Завета
Книги Нового Завета
с русским текстом1Калыкез утён понна Кузё-Инмарлэн киыз ӧз вакчиёмы,
кылон понна пельыз но ӧз секытомы.
2Нош тӥляд законлы пумит улонъёсты тӥледыз
Инмареныды валче улонлэсь люкизы;
тӥляд сьӧлыко ужъёсыныды сэрен Со ымнырзэ тӥ бордысь палэнтэ
куриськонъёстэс кылонтэм понна.
3Тӥляд киосты вирен саптаськемын,
чиньыосты законлы пумит улонэн наштаськемын;
ымыныды ӧрекчаськиськоды, кылды но вера пӧяськон кылъёс.
4Шонерлык понна нокин куаразэ уг будэты,
зэмлыклы но нокин уг дурбасьты;
ӧвӧлтэмлы оскисько, ӧрекчаськыса верасько;
уродэз-лекез кизё но, йыруж аранзы дась луэ;
5кый пуззы вылын пуко, вотэс куо;
кин соослэсь пуззэс сиёз, – кулоз,
нош паньгатӥд ке – сьӧд кый потоз.
6Соослэн вотэссы дӥськутлы ярасьтэм,
асьсэ лэсьтэм ужен соос уз шобырске;
соослэн ужъёссы – шонерлык ужъёс ӧвӧл,
эрказъяськон – соослэн киулазы.
7Уродлык пала пыдъёссы бызё, сьӧлыктэм вирез кисьтыны дырто;
соослэн малпанъёссы – сьӧлыклэсь кышкасьтэм малпанъёс;
куашкатон-таркан, бырон соослэн сюрес вылазы кыле.
8Тупаса улонлэсь сюрессэ соос уг тодо,
суд но соослы ӧвӧл улон сюрес вылазы;
сюресъёссы кырыж-мерыжесь, нокин но, со сюресъёс кузя
мынӥсь мурт, сюлмаз каньыллыкен уг улы.
9Со понна милям дурбасьтӥсьмы ӧвӧл,
шонерлыко суд ми доры уг вуы;
югытэз возьмаськомы, нош котырамы пеймыт,
пиштонэз витиськомы,
нош пеймыт азьтӥ ветлоно луиськомы.
10Синтэмъёслэн борддорез шӧдэмзы кадь шӧдӥськомы,
синтэм кадь ки вогыриенымы утчаськыса ветлӥськомы,
ӝомал усён дыръя кадь нуназе шорын канжаськиськомы,
улэпъёс пушкын кулэм муртъёс кадь улӥськомы.
11Ваньмы ми гондыръёс музэн вузӥськомы,
дыдыкъёс выллем ӝуштӥськомы;
дурбасьтонэз возьмаськомы, нош со ӧвӧл;
утиськон но милесьтым кыдёкын улэ.
12Уго Тон азьын милям йыружъёсмы туж трос,
сьӧлыкъёсмы милемыз шарае потто;
йыружъёсмы бордамы,
законлы пумит улэмъёсмес но ми тодӥськомы.
13Ми Кузё-Инмарлэсь куштӥськимы, Со азьын пӧяськимы;
Инмармылэсь палэнскимы;
ӧвӧлтэмзэ вань карыса, ӧрекчаськыса,
куштӥськон кылъёс вераллямы;
сюлмысьтымы ӧрекчаськон кылъёс поттӥмы, вордӥськытӥмы.
14Суд берлань чигназ, шонерлык кыдёке кариськиз,
уго зэмлык ульча воже канжаськиз,
ӧрекчаськытэк улон пӧламы пырыны уг быгаты.
15Зэмлык ышиз,
урод ужлэсь палэнскись мурт сантэманлэн киулаз сюре.
Кузё-Инмар тае адӟиз но, суд кутскымтэ шуыса, вожез потӥз.
16Адями ӧвӧл, дурбасьтӥсь ӧвӧл шуыса адӟиз но паймиз;
Аслаз кужымез Солы юрттӥз,
Аслаз шонерлыкез Солы дурбасьтӥз.
17Корт дӥсез кадь шонерлыкез Со Ас вылаз дӥсяз,
утиськонлэсь корт изьызэ Аслаз йыр вылаз понӥз,
дӥськутэн кадь пунэм тырон риза дӥсянэн шобырскиз,
дукесэн кадь вожпотонэн дӥсяськиз.
18Пунэмзэ берыктыса, пумит мынӥсьёсызлы ӝуась йыркурен
та мертэтэн Со пунэмзэ берыктоз,
тушмонъёсызлы пунэм тыронзэс,
шормуӵъёслы кызьы кулэ, озьы берыктоз.
19Шундыпуксёнын Кузё-Инмарлэн нимызлэсь кышкалозы,
шундыӝужанын Солэн данэзлэсь куалектозы.
Шур кадь тушмон лыктӥз ке, Кузё-Инмар сое пельтыса уллялоз.
20Сӥонлэн Мозмытӥсез лыктоз,
сьӧлыко ужъёслэсь палэнскем Иаковлэн пиосыз доры но лыктоз, –
шуэ Кузё-Инмар. –
21Мынам соосын сӥзён-косон пыр кылдытэм кусыпе таӵе луэ, –
шуэ Кузё-Инмар, –
Мынэсьтым тыныд вераны сётэм кылъёсме верамысь
тон уд дугдылы,
тынад нылпиосыдлэн но ымысьтызы,
нылпиосыдлэн нылпиосызлэн ымысьтызы но соос уз ыше-быре, –
шуэ Кузё-Инмар, – али но, пумтэм вапумъёсы но.
Глава 59