Выбрать язык
Книги Ветхого Завета
Книги Нового Завета
с русским текстом1Султы, пишты, [Иерусалим]; тынад югытэд пиштыны кутскиз,
Кузё-Инмарлэн пиштӥсь данлыкез тон вылэ ӝутскиз;
2пеймытлык музъемез шобыртоз,
тём-тём пеймытлык калыкъёсты ворсалоз,
нош тон йылын Кузё-Инмар пиштыса улоз,
Солэн пиштӥсь данлыкез тынад йылад адӟиськоз.
3Тынад югытад калыкъёс лыктозы,
эксэйёс но тынад йылтӥд ӝужась-пиштӥсь тылси доры вуозы.
4Синъёстэ ӝутыса, котырак учкы ай:
ваньзы соос, огазе люкаськыса, тон доры лыкто;
пиосыд кыдёкысь лыкто, нылъёстэ ки йылазы ӝутыса ваё.
5Соку тае адӟыса шумпотод;
тэтчалоз-йыгаськоз, эркын шокчоз сюлэмыд,
малы ке шуоно зарезьлэн узырлыкез тон пала берытскоз,
калыкъёслэн ваньбурзы тон доры люкаськоз.
6Туж трос верблюдъёс тон доры вуозы –
Мадианысь но Ефаысь верблюдъёс лыктозы;
ваньзы соос Саваысь зарни, ладан вайыса лыктозы,
Кузё-Инмарез данъялозы.
7Кидарысь вань ыжъёс тон доры люкамын луозы;
Неваиофысь такаос тыныд ярамонэсь луозы,
курбон сётон инты вылам ярамон луыса ӝутскозы;
Аслам данлыкелэсь корказэ Мон сӥё-дано каро.
8Кинъёс со пилем кадь, каразы лобись дыдыкъёс кадь лобо?
9Монэ шормуӵъёс витё,
соослэн азязы – Фарсисысь бадӟымесь пыжъёс,
тынэсьтыд пиостэ азвесенызы, зарниенызы ӵош
Кузё-Инмарлэн Тынад Инмаредлэн, Израильлэн
Дун-Сьӧлыктэмезлэн, нимыз понна кыдёкысь вайыны,
малы ке шуоно Со тонэ дано кариз.
10Соку мурт кунъёсысь вуэмъёс
тынэсьтыд борддоръёстэ лэсьтылозы,
нош соослэн эксэйёссы тыныд ужаса-тыршыса улозы,
уго воже потылыку, Мон тонэ уськытъяй,
нош Мон Аслам ӟеч эрикеным тонэ жаляло.
11Тынад ӟезьыосыд ялан усьтӥськыса улозы,
нуназе но, уйин но уз ворсаськылэ –
калыкъёслэсь люкам ваньбуръёссэс тон доры вайыны мед луоз,
эксэйёссэс но пыртыны мед быгатозы.
12Уго тыныд ужамзы-тыршемзы потымтэ
калыкъёс, эксэйлыкъёс бырозы,
сыӵеесь калыкъёс чылкак быдтэмын луозы.
13Ливанлэн данэз тон доры лыктоз,
кипарис но, пужым но, кедырпу но
Мынэсьтым вӧсяськон интыме чебер карозы, –
Аслэсьтым лёгиськон интыме Мон дано каро.
14Тонэ ултӥяса возисьёслэн нылпиоссы,
йырзэс ошыса, тон доры лыктозы но
ваньзы тонэ адӟонтэм карисьёс
тынад пыд выжыяд йыбырттозы,
тонэ Кузё-Инмарлэн городэз, Израильлэн Дун-Сьӧлыктэмезлэн
Сӥонэз шуыса нималозы.
15Тон куштӥськемын, синазькыль каремын вал,
тон пыр нокин но ӧз ни ветлы,
нош Мон тонэ пумтэм вапумъёслы быдӟымлыко,
выжыосысь выжыосы шумпотыса улӥсь каро.
16Калыкъёслэн йӧлынызы тон тыр улод,
эксэй гадьысь ноныса улод но тодод, Мон – Кузё-Инмар,
тынад Утисед, Мозмытӥсед, Иаковлэн Кужмоез.
17Ыргон интые тыныд зарни вутто, корт интые – азвесь,
пу интые – ыргон, изъёс интые корт сёто;
тыныд кивалтӥсе каньыллыкез пукто,
тыныд учкись-чакласьлы шонерлыкез сёто.
18Тынад музъем вылысьтыд эриктэман сярысь,
улон интыысьтыд куашкатон, таркан сярысь
ивор азьланяз уз ни кылӥськы;
аслэсьтыд борддоръёстэ утиськон,
капкаостэ данлык шуыса нималод.
19Шунды тыныд нуназе югыт сётӥсь интыын уз ни луы,
толэзьлэн пиштонэз но югдытӥсь интыын уз луы;
Кузё-Инмар луоз тынад пумтэм вапумъёс ӵоже югыт сётӥсед,
Инмаред – со Тынад пиштӥсь данлыкед луоз.
20Шундыед уз ни пуксьы, толэзед но уз ни ватӥськы,
уго Кузё-Инмар луоз пумтэм вапумъёс ӵоже югыт сётӥсед,
ӝожтӥськон нуналъёсыд бырозы.
21Вань калыкед шонерлыко улӥсь калык луоз,
пумтэм вапумъёслы соос люкетлы музъем басьтозы, –
Монэ данъян понна соос Мынам мерттэм модосэ,
Аслам киылэн ужез луозы.
22Пичи бордысь сюрсэз потоз,
ваньмызлэсь лябезлэсь кужмо калык кылдоз.
Мон, Кузё-Инмар, ӝогомыто тае ас дыраз быдэстыны.
Глава 60