Выбрать язык
Книги Ветхого Завета
Книги Нового Завета
с русским текстом1Инмарлэн Кузё-Инмарлэн Духез Мон вылын улэ:
Кузё-Инмар Монэ вӧйын зырӟыса пуктӥз
куанеръёслы ӟеч ивор вераны,
сюлмынызы чигиськыса улӥсьёсты бурмытыны,
тушмон киулэ сюремъёслы мозмытскон сярысь тодытыны,
жильыетын пукисьёслы пытсэтэз усьтон сярысь ялыны Монэ ыстӥз;
2Кузё-Инмарлэсь ӟечлыко арзэ,
Инмармылэсь пунэм берыктон нуналзэ тодытыны;
ӝоже усемъёсты буйгатыны;
3Сӥонын ӝожтӥськыса улӥсьёслы пень интые
данлык сётӥське шуыса вераны,
бӧрдон интые шумпотонлэн вӧйыз,
куректыса-мӧзмыса улон интые
данлыклэн дӥськутэз сётӥське шуыса ивортыны
Со Монэ ыстӥз.
Соосты шонерлыкен кужмоесь шуыса,
Кузё-Инмарлэсь данлыксэ ӝутон понна мерттэмын
шуыса нималозы.
4Дауръёсын тырттэм улэм луоё кыре юртъеръёс пуктылозы,
ӝутозы вашкала куашкатэм бервылъёсты;
вашкала выжыос бордысен ик тырттэм кылем,
таркам-пазям каръёсты выльдозы.
5Мурт кунъёсысь адямиос лыктозы но
тӥлесьтыд пудо уллёостэс возьмалозы;
мурт кун адямиослэн нылпиоссы тӥледлы музъем ужасьёс луозы,
тӥледлы виноград будэтозы.
6Нош тӥледыз Кузё-Инмарлэн священникъёсыз шуыса лыдъялозы,
Инмармылэн ужась-тыршисьёсыз луиськоды шуыса,
тӥледыз нималозы;
калыкъёслэн ваньбуренызы майбыр улоды,
соослэн данэнызы данъяськоды.
7Ултӥямзы понна тӥледлы кык полэс ӟечлык сётӥськоз.
Сантэмамзы понна ас адӟонзылы соос шумпотозы,
малы ке шуоно ас музъемазы кык полэс ӟечлык басьтозы;
пумтэм вапумъёс ӵоже соос
шумпотыса-шулдыръяськыса улозы.
8Мон, Кузё-Инмар, шонерлыко судэз яратӥсько,
адӟонтэм карисько таласьконэз, ӝикатыса-ёртыса возёнэз,
кузьымзэ-медзэ кӧня кулэ, сомында берыкто,
пумтэм вапумъёс ӵожелы соослы сӥзён-косонме сёто.
9Калыкъёс пӧлын тодмо луоз соослэн кидыссы,
соослэсь нылпиоссэс, нылпиоссылэсь нылпиоссэс
вань выжыос тодозы;
вань адӟисьёс соосты тодмалозы,
соос Кузё-Инмарлэн бакель карем кидысэз луо шуыса.
10Кузё-Инмар бордын туж шумпотыса уло,
мынам лулы Инмаре бордын шумпотоз:
уго Со монэ утиськон дӥськутэн шобыртӥз,
шонерлыклэн дӥськутэныз монэ дӥсяз,
эмеспи вылэ кадь венец изьы изьыяз,
вылькенэз кадь чеберъянъёсын чеберъяз.
11Кызьы музъем будосъёссэ будэтэ,
кызьы сад киземез удатэ,
озьы ик Инмар Кузё-Инмар шонерлыкез, данлыкез
вань калыкъёс азе поттоз.
Глава 61