Выбрать язык
Книги Ветхого Завета
Книги Нового Завета
с русским текстом1Шунды кадь солэн шонерлыкез ӝужатозь,
ӝуась лампада кадь солэн утиськонэз пиштытозь,
Сӥон понна сюлмаськемысь уг дугды,
Иерусалим пумысен уг буйгатскы.
2Калыкъёс шонерлыктэ адӟозы,
вань эксэйёс адӟозы тынэсьтыд дандэ,
соку соос тонэ Кузё-Инмарлэн сётэм выль нимыныз нималозы.
3Кузё-Инмарлэн кияз тон данлыклэн венец изьыез луод,
Инмаредлэн кияз эксэй диадем изьы луод.
4Азьланяз тонэ ”кельтэм-куштӥськем” уз ни шуэ,
музъемдэ но ”кыр дунне” шуыса уз ни нималэ,
нималозы: ”Мынам ӟеч эрике со бордын”,
нош тынэсьтыд музъемдэ ”бызем мурт” шуозы,
уго Кузё-Инмарлэн ӟеч эрикез тон бордын,
музъемед тынад улыны ярамон луоз.
5Кызьы егит пи егит нылын огазе карисько,
озьы ик пиосыд тонэн огазе кариськозы,
кызьы эмеспи кышно луонэзлы шумпотэ,
озьы ик Инмаред тон понна шумпотоз.
6Борддор йылъёсад, Иерусалим, Мон возьмаськисьёсты пуктӥ,
соос нуназе но, уйин но чус уз улэ!
Эй, тӥ, Кузё-Инмарез тодэ вайытӥсьёс! – чус эн улэ, –
7Со азьын чус эн улэ, Иерусалимез выльдытозяз-ӝутытозяз,
музъем вылын сое данъяны ярамон карытозяз.
8Кузё-Инмар Аслаз бур киыныз, кужмо суйбыгытэныз кыл сётӥз:
тушмонъёсыдлы ю-няньдэ сиыны уг ни сёты,
муртъёслэн пиоссы тыршыса будэтэм винадэ уз ни юэ;
9ю-нянь октӥсьёс сое сиёзы но Кузё-Инмарез данъялозы,
виноград емыш бичасьёс Мынам вӧсяськон интыелэн азбаръёсаз
солэсь виназэ юозы.
10Мынэлэ, мынэлэ капка пыр, калыклы сюрес дасялэ!
Ӵошкатэ, ӵошкатэ сюресэз, изъёсты утялтэ,
калыкъёс понна знамя ӝутэ!
11Музъемлэн пумозяз кылӥськымон Кузё-Инмар ялэ:
Сӥон ныллы вералэ: тынад Утисед лыктоз;
Солэн кузьымез-медэз Ас бордаз,
пунэм берыктонэз Солэн азяз луоз.
12Сое Кузё-Инмарлэн мозмытэм, дун-чылкыт калыкез шуозы,
нош тонэ синмаськымон, куштӥськымтэ город шуыса нималозы.
Глава 62