Выбрать язык
Книги Ветхого Завета
Книги Нового Завета
с русским текстом1«Кин со Едомысь лыктэ,
кин со нап-горд риза дӥсянэн Восорысь потэ,
сокем чебер-мотор дӥськутэн,
Аслаз пачыл-тыр кужыменыз возьматске?»
«Мон – шонерлык верась, кужмо, утьыны быгатӥсь».
2«Малы бен Тынад дӥськутэд горд луэмын,
ризаед но вина виятон гуын виноград лёгасьлэн кадь луэмын?»
3«Вина виятон гуын Мон огнам лёгай,
калыкъёс пӧлысь Монэн ӵош нокин но ӧй вал.
Мон соосты вожпотонэ дыръя лёгай,
йыркуръяськон дыръям нельки;
соослэн вирзы ризаосы вылэ пазяськиз,
вань дӥськутме Мон виштыё кари.
4Пунэм берыктон нунал Мынам сюлмам улэ,
мозмытоноосылэн мозмытскон дырзы вуиз.
5Мон учкыса улӥ, нош юрттӥськись ӧй вал;
паймылӥ юрттӥськись ӧвӧллы, –
Мыным Аслам суйбыгытэ юрттӥз,
лекъяськон-йыркуръяськонэ Мыным кужым сётылӥз;
6вожпотон дыръям Мон калыкъёсты лёгай,
лекъяськон-йыркуръяськон дыръям соосты сузмытъяй,
музъем вылэ соослэсь вирзэс кисьтӥ».
7Тодам ваё Кузё-Инмарлэсь гажан-жалянъёссэ,
Кузё-Инмарлэсь асьмелы сётэм данлыко ужъёссэ.
Соосты Кузё-Инмар асьмелы кузьмаз.
Тодам ваё Солэсь Израиль юртлы туж бадӟым ӟечлыксэ,
сое Со Аслаз гажась-жалясь, шырыт сямо луэменыз
Израиль калыклы возьматӥз.
8Кузё-Инмар шуиз: «Зэм ик соос – Мынам калыке,
Мынам нылпиосы, соос Монэ уз пӧялэ», –
Кузё-Инмар соослэн Утисьсы вал.
9Котькыӵе но куректон-кайгузы луон дыръя соосты Со ӧз кушты,
Солэн ымнырызлэн Кылчинэз соосты утьылӥз;
Аслаз яратӥсь, ӟеч сюлэмо луэменыз Со соосты мозмытӥз,
кутыса нуллӥз вашкала вапумысь ваньмаз нуналъёсы.
10Нош соос бугырскизы но Солэсь Святой Духсэ ӝоже уськытӥзы,
соин Со соослы тушмон кариськиз, Ачиз соослы пумит ожмаськиз.
11Соку Солэн калыкез вашкала нуналъёсты,
Моисей вакытысь нуналъёсты, тодаз вайиз:
кытын Ас калыксэ ыж возьмасеныз ӵош зарезь пыр Поттӥсь?
Кытын солэн сюлмаз Аслэсьтыз Святой Духсэ Понӥсь?
12Кытын пумтэм вапумъёс ӵожелы Аслэсьтыз нимзэ
данлыко карон понна быдӟымлыко суйбыгытэныз
Моисеез бур китӥз кутыса Валтӥсь, азьысьтызы вуэз шори Люкись?
13Кытын Со, Кин соосты кыр дуннеетӥ валэз музэн пыдэстэм
дуннеостӥ валтыса нуиз, – соос ӧз канжаськылэ?
14Кызьы пудо уллё нёжалэ ваське,
озьы Кузё-Инмарлэн Духез соосты каньыллыко интые нуиз.
Озьы Тон Аслэсьтыд нимдэ данлыко карон понна
Ас калыктэ валтыса нуид.
15Чакла Инмысен, Аслад святой улон интыысеныд,
данлыкедлэн улон юртысьтыз ми шоры учкы:
кытын Тынад сюлмаськонэд-тыршонэд,
кытын Тынад бадӟымлыкед? –
Тынад ӟечлыкед, гажан-жалянъёсыд мон доры вуытэк кылё.
16Тон гинэ – милям Атаймы; уго Авраам милемыз уг тодма,
Израиль но милемыз аслазъёс шуыса уг лыдъя;
Тон, Кузё-Инмаре, – милям Атаймы,
вапумъёс кутсконысен Тынад нимыд: ”милям Мозмытӥсьмы”.
17Мар понна, Кузё-Инмаре,
Тон милемыз сюресъёсыд вылысь кожыны лэзид,
сюлэмъёсмылы лекомыны эрик сётӥд –
Тынэсьтыд медам кышкалэ шуыса-а?
Аслад ляльчиосыд понна, Аслад люкетэдлэн выжыосыз понна
ми пала берытскы.
18Вӧсяськон интыедлэн калыкез вакчи дыр ӵоже гинэ
сое киулаз возиз:
вӧсяськон интыдэ тушмонъёсмы лёгазы-саптазы.
19Ми сыӵеослы пӧрмимы, –
милемын Тон ноку но ӧд но кузёяськылы кадь,
ми ноку но Тынад калыкед но ӧй вал кадь.
Глава 63