Выбрать язык
Книги Ветхого Завета
Книги Нового Завета
с русским текстом1Мон сярысь юалляськисьтэмъёслы Мон усьтӥськи;
Монэ утчасьтэмъёс Монэ шедьтӥзы;
«Тани Мон! Тани Мон!» – Мынам нимыным нимаськылымтэ
калыклы Мон шуылӥ.
2Тэрытскисьтэм калыклы,
ас тодэмъяз умойтэм сюрестӥ ветлӥсьлы,
котькуд нуналэ Мон киосме вӧлъяса улӥ, –
3Монэ азям дугдылытэк сантэмасьлы,
нюлэсъёсын курбон сётъясь калыклы,
сульдэръёслы ческыт зыно фимиам сутӥсьёслы.
4Шайгуосын со калык пуке, гурезьысь гуосын кӧла,
парсь сӥль сие, пуртыосаз юрӟым сиён пӧзе.
5Со шуэ: «Дугды, матам эн лыкты, мон тон азьын дун-чылкыт ук».
Соос, кызьы Мон шӧдӥсько, – ӵын, нуналлы быдэ ӝуась тыл.
6Тани, Мынам азям мар гожтэмын:
шып уг улы, пунэмзэ берыкто,
пушказы пунэмзэ берыкто.
7Тӥлесьтыд законлы пумит улэмъёстэс, – шуэ Кузё-Инмар, –
атайёстылэсь гурезьёсын ческыт зыно фимиам ӵындытыса,
вырйылъёсын Монэ урод кылъёсын вераса
законлы пумит улэмъёссэс, азьвыл ужъёссэс
мертаса пушказы берыкто.
8Тазьы шуэ Кузё-Инмар: виноград пурыын сокез луыку, шуо:
«Эн изъянты сое, со бакель каремын»;
озьы ик Мон но лэсьто Аслам ляльчиосы понна,
ваньзэс быдтонтэм вылысь.
9Иаков бордысь кидыс потто,
Иуда бордысь гурезьёсылы люкет басьтӥсез ӝуто,
Мынам быръем муртъёсы люкетлы музъем басьтозы,
ляльчиосы отын улозы.
10Сарон ыж возьман инты луоз,
Ахор нёжал Монэ утчаса шедьтэм калыкелэн ошъёсызлы
шутэтскон инты луоз.
11Нош тӥледыз, Кузё-Инмар бордысь куштӥськемъёсты,
Мынэсьтым святой гурезьме вунэтӥсьёсты,
Гадлы сиён-юон дасясьёсты,
Менилы пачыл чашаез сылмытӥсьёсты, –
12Мон тӥледыз меч улэ кельтӥсько,
ваньды тӥ вандӥсь пурт улэ йырдэс мыкыртоды,
малы ке шуоно Мон ӧти, нош тӥ ӧд вазиське,
верай, нош тӥ ӧд кылзӥське,
син азям урод уж лэсьтылӥды,
бырйылӥды сое, мар Мыным ярантэм вал.
13Соин ик Инмар Кузё-Инмар тазьы шуэ:
Мынам ляльчиосы сиськозы, нош тӥ сютэм улоды;
Мынам ляльчиосы юозы, нош тӥ сюды куасьмыса курадӟоды;
14Мынам ляльчиосы шулдыръяськозы, нош тӥ возьытэ усёды;
Мынам ляльчиосы сюлэмзы шумпотыса кырӟалозы,
нош тӥ, сюлэм кайгудылы чидатэк, чир кесяськоды,
лулды-сюлэмды куректэмлы чидатэк, куараен бӧрдоды.
15Мынам быръем муртъёсылы тӥ асьтэлэсь нимдэс
карганы кельтоды;
тӥледыз Инмар Кузё-Инмар виёз,
нош Аслаз ляльчиосызлы выль ним сётоз;
16кин музъем вылын бакель каремын луоз,
со Зэм Инмарлэн нимыныз бакель каремын луоз;
кин музъем вылын кыл сётоз, со Зэм Инмарлэн нимыныз кыл сётоз,
малы ке шуоно азьвылъёсыз куректон-кайгуос вунэтэмын луозы,
Мынам син азьысьтым ватэмын луозы.
17Мон выль ин, выль музъем кылдытӥсько,
азьвылъёссэ-вужъёссэ буре уз ни вае, тодаз уз ни вае.
18Нош тӥ, мар Мон лэсьтӥсько-кылдытӥсько,
со понна пумтэм вапумъёс ӵоже шулдыръяськыса,
шумпотыса улоды;
шулдыр улонлы Иерусалимез кылдытӥсько,
солэсь калыксэ шумпотыса улӥсь каро.
19Иерусалим понна шумпотыса уло,
Аслам калыке понна – шулдыръясько,
со пушкын бӧрдэм куара, вузэм куара уз ни кылӥськы.
20Отын вож нуны уз ни луы,
улоно нуналэзлэн пумозяз вуымтэ пересь мурт но уз ни луы;
уго сю аресъем мурт егит мурт кадь луыса кулоз,
нош сю аресэ вуэм сьӧлыко мурт каргамын луоз.
21Коркаос пуктылыса, отын улозы,
виноград мерттозы, солэсь емышсэ сиёзы.
22Муртъёслы улыны уз пуктэ, мукетъёслы сиыны уз мерттэ;
Мынам калыкелэн нуналъёсыз писпулэн нуналъёсыз кадесь луозы,
Мынам быръемъёсы кема дыр ӵоже
ас киынызы лэсьтэм ужъёсынызы тыр улозы.
23Юнмелы уз тырше; нылпи вайизы ке, кайгулы со уз луы;
уго соос Кузё-Инмарлэн бакель карем кидысэз луозы,
соосын валче соослэн вуоно выжызы но бакель каремын луоз.
24Тазьы луоз: соослэн вазиськемзылэсь азьвыл
Мон соослы ответ сёто;
соос эшшо вералозы на, нош Мон соосты кыло ини.
25Кионэн ыжпи огазьын пастукын ветлозы;
лев, ош музэн куро сиёз, нош кыйлэн сиёнэз пыд улысь сюй луоз;
Мынам быдэс святой гурезям соос
уродзэ-лексэ, изъян уз лэсьтэ, – шуэ Кузё-Инмар.
Глава 65