Выбрать язык
Книги Ветхого Завета
Книги Нового Завета
с русским текстом1Тазьы шуэ Кузё-Инмар:
Ин – Мынам эксэй пуконэ, нош музъем – пыдул лёгетэ;
кытчы тӥ Мыным корка пуктоды, кытын Мынам шутэтскон интые?
2Ваньзэ тае Мынам киы лэсьтӥз,
ваньмыз быдэсмиз, – шуэ Кузё-Инмар. –
Нош тани, кин шоры Мон учко:
зӥбыт-востэм, лулыныз-сюлмыныз чигиськыса,
верам кылме кабыл басьтыса, ӧпкельыса куалекъясь мурт шоры.
3[Нош законлы пумит улӥсьлэн] Мыным сӥзьыса ош вандэмез –
адямиез виемен одӥг кадь;
ыжпиез курбон сётэмез – айы пуныез кекатэмен одӥг кадь;
куарнянь ваемез – парсь вирез сётэмен одӥг кадь;
[буре вайыса], ческыт зыно фимиам ӵындытэмез –
сульдэрлы йыбыртъянэн-вӧсяськонэн одӥг кадь ик;
асьсэлы асьсэос сюрес бырйизы бере,
лулзы-сюлэмзы юрӟым ужъёс пӧлысь каньыллык шедьтэ бере,
4соослэн сьӧлыкъёс пӧлын асгынмыса улэмзы понна куто но
соос вылэ туж шимес макеез ысто,
кудӥзлэсь соос кышкало;
малы ке шуоно Мон ӧти – нош вазись ӧз луы,
верай – соос ӧз кылзӥське, син азям урод уж лэсьтылӥзы,
бырйылӥзы сое, мар Мыным ярантэм вал.
5Кузё-Инмарлэсь верамзэ сак кылзэлэ,
верам кылзэ кабыл басьтыса, ӧпкельыса куалекъясьёс:
тӥледыз синазькыль карисьёс,
нимме сӥлы каремды понна тӥледыз уллясь агай-вынъёсты шуо:
«Аслэсьтыз данлыксэ Кузё-Инмар мед возьматоз,
соку ми учкомы тӥляд шулдыръяськонды шоры».
Соос возьытэ вуттэмын луозы.
6Тани, городын куашетон кылӥське,
храмын куара чузъяське, Кузё-Инмарлэн куараез,
Аслаз тушмонъёсызлы пунэмзэ берыктӥсьлэн куараез кылӥське.
7Нуны вайыса ӧз на курадӟы, нош нуны вайиз;
вӧсь луыса ӧз вуы, пизэ вордскытӥз.
8Кинлэн таӵеез кылэмез вань? Талы укшасез кинлэн адӟемез вань?
Одӥг нуналын кун-страна кылдӥз-а?
Огкутскемен, ӵош вордскиз-а калык, Сӥон кадь,
нуны ваёнэн курадӟыны гинэ кутскиз – нылпи вайиз?
9Нылпи ваён дырозь вутто но нылпи вайыны уг сёты-а? –
шуэ Кузё-Инмар. –
Нылпи вайыны кужым сётыса, ворсало-а пушсэ? –
шуэ тынад Инмаред.
10Иерусалимен валче шулдыръяське,
со понна шумпотэ, ваньмыз сое яратӥсьёс!
Соин огазьын туж шумпотэ, со понна ӝоже усемъёс,
11солэсь буйгатӥсь ноныоссэ ноныса, кӧттэс тырыны мед быгатоды,
пачылмем данлыкеныз кудӟыса, куаныса улыны мед быгатоды.
12Тазьы шуэ Кузё-Инмар: тани Мон со доры,
шурысь вуэз кадь, каньыллык лэзё,
калыкъёслэсь узырлыксэс тудӟыса, ӧрысь потэм вуэз кадь ваё
тӥледлы эзылыса майбыр улон понна;
ки вылазы тӥледыз нуллозы, алвылазы эркияса возёзы.
13Анайлэн нунызэ эркиямез-лӥятэмез кадь,
Мон тӥледыз эркияло-лӥято,
тӥледыз Иерусалимын эркияса-лӥятыса возё.
14Тае адӟоды но, сюлэмды шумпотоз, турын кадь, лыосты юнмалозы,
Кузё-Инмарлэн киыз Ас ляльчиосызлы юрттэт сётоз,
нош тушмонъёсызлы Со вожзэ поттоз.
15Тыл пушкын Кузё-Инмар лыктоз,
Солэн ожмаськон уробоосыз тӧлпери кадесь,
Аслэсьтыз гомаса ӝуась йыркурзэ
лек вожпотонэн валче кисьтыны Со лыктоз.
16Котькудзэ лулмугорез Кузё-Инмар
тылын но мечен судить кароз,
троссэ Кузё-Инмар погыртоз.
17Кереметъёсын вӧсяськыса, сузяськыса улӥсьёс,
парсь сӥлез, юрӟым макеосты, шыръёсты сиисьёс –
ваньзы огзы бӧрсьы огзы бырозы, – шуэ Кузё-Инмар. –
18Уго соослэсь ужъёссэс, малпанъёссэс но Мон тодӥсько; вань калыкъёсты, пӧртэм кылъёсын вераськисьёсты люканы лыкто, соос вуозы но Мынэсьтым пиштӥсь данлыкме адӟозы.19Соос пӧлын паймымон тодмет возьмато, соос пӧлысь утемъёсты язычникъёс пӧлы ысто: Фарсисэ, Пулэ, Луд музъеме – пукыӵ золтӥсьёс доры, Тубалэ, Яванэ но кыдёкысь шормуӵъёсы, кудъёсызлэн Мон сярысь кылылэмзы ӧвӧл, данме но адӟылэмзы ӧвӧл. Соос Мынам данлыке сярысь язычникъёслы ивортозы.
20Калыкъёс пӧлысь поттэм вань агай-вынъёстэс, Кузё-Инмарлы кузьым карыса, валъёс вылын, ожмаськон уробоосын, ӝутыса, ишакъёс вылын, ӝог ворттӥсь верблюдъёс вылын ваёзы – Мынам святой гурезям, Иерусалиме, ваёзы, – шуэ Кузё-Инмар, – Израиль нылпиослэн Кузё-Инмарлэн корказ чылкыт сосудын кузьым ваемзы кадь со луоз.21Соос пӧлысь но священникъёсты, левитъёсты быръё, – шуэ Кузё-Инмар.
22Мынам кылдытэм выль инэ, выль музъеме
котьку но Мынам син азям луозы, – шуэ Кузё-Инмар, –
озьы ик луоз тӥляд выжыды но, тӥляд нимды но.
23Соку котькудаз выль толэзь потон нуналэ, субботалы быдэ
вань адямиос Мынам азям йыбырттыны лыктылозы, –
шуэ Кузё-Инмар. –
24Соос потозы но Мынэсьтым куштӥськем адямиослэсь
шӧйёссэс адӟозы,
уго соослэн нумырзы уз кулы, тылзы но уз кысы;
вань адямиос понна соос юрӟым макеослы пӧрмозы.
Глава 66