Выбрать язык
Книги Ветхого Завета
Книги Нового Завета
с русским текстом1Вениамин музъемысь, Анафофысь священникъёс пӧлысь, Хелкиялэн пиезлэн Иеремиялэн кылъёсыз.2Кузё-Инмар дорысь Иеремиялы верамын вал – Иудей эксэйлэн, Амонлэн пиезлэн Иосиялэн дас куинетӥ арзэ эксэйын пукон нуналъёсаз,3озьы ик Иудей эксэйлэн Иосиялэн пиезлэн Иоакимлэн нуналъёсаз, Иудей эксэйлэн Иосиялэн пиезлэн Седекиялэн эксэйын пуконэзлэн дас одӥгетӥ арезлэн витетӥ толэзёзяз, Иерусалимысь калыкез кужмысь келян дырозь.
4Кузё-Инмар дорысь мыным верамын вал:
5«Кӧт пушкын тонэ кылдытэмелэсь азьло Мон тонэ тодӥ,
вордскемедлэсь азьло Мон тонэ дун-чылкыт кари:
калыкъёс понна тонэ пророк карыса пуктӥ».
6Нош мон шуи:
«Э, Инмаре Кузё-Инмаре!
Мон уго егит ай, вераськыны уг быгатӥськы».
7Соку Кузё-Инмар мыным шуиз: «Эн шуы ”мон егит”,
кинъёс доры Мон тонэ ысто, ваньзы доры мынод но,
мар тыныд косо, ваньзэ вералод.
8Соослэсь эн кышка, уго Мон тонэн огазьын, тонэ утё», –
шуиз Кузё-Инмар.
9Кузё-Инмар кизэ вӧлъяз но ым бордам йӧтӥськиз;
Кузё-Инмар мыным шуиз:
«Тани, Мон Аслэсьтым кылъёсме кыл вылад понӥ.
10Тани, Мон та нуналэ тонэ калыкъёсты, эксэйлыкъёсты
выжыенызы порылыны,
турканы-тарканы, быдтыны, куашкатыны,
кылдытыны-лэсьтыны, мерттыны-улӟытыны пуктӥ».
11Кузё-Инмар дорысь мыным верамын вал: «Иеремия, мар тон адӟиськод?» Мон шуи: «Миндальпу бодыез адӟисько».12Кузё-Инмар мыным шуиз: «Тон шонер адӟиськод; верам кылы мед быдэсмоз шуыса, Мон сак улӥсько».
13Мукетъят Кузё-Инмар дорысь мыным верамын вал: «Мае тон адӟиськод?» Мон шуи: «Тӧл пельтэмъя быректыса пӧзись пуртыез адӟисько, уйпаласен сое адӟисько».14Кузё-Инмар мыным шуиз: «Уйпаласен та музъем вылэ вань улӥсьёс доры шугадӟон лыктоз.15Уйпал эксэйлыкъёсысь вань калык выжыосты ӧтё, – шуэ Кузё-Инмар, – соос лыктозы но Иерусалим капкаос азе асьсэлэсь престолзэс пуктозы, солэн вань борддор кузяз, Иудеяысь вань городъёсы но престолзэс пуктозы.16Законлы пумит улэмъёссы понна, Мон бордысь куштӥськемзы понна, мурт калыкъёслэн инмаръёссылы курбон сутэмзы понна, асьсэ киын лэсьтэм макеослы йыбыртъямзы понна Мон соосты судить каро.
17Нош тон султы, кустэ дум но мае Мон тыныд вераны косо, ваньзэ соослы вера; соос азьын кышкаса-кепыраса эн улы, соослэн син азязы Мон тонэ куалекъятоно медам луы.18Тани, табере Мон тонэ юнматэм город, корт юбо, быдэс музъем вылэ ыргон борддор карыса пуктӥ, Иудалэн эксэйёсызлы пумит, солэн кивалтӥсьёсызлы пумит, солэн священникъёсызлы пумит, та музъемлэн калыкезлы пумит луыны тонэ пуктӥ.19Соос тыныд пумит нюръяськозы, но тонэ уз ворме; уго Мон тонэн огазьын, тонэ утё, – шуэ Кузё-Инмар».
Глава 1