Выбрать язык
Книги Ветхого Завета
Книги Нового Завета
с русским текстом1Кузё-Инмар дорысь мыным верамын вал:2«Мын но Иерусалимлэн пеляз бадӟым куараен вера:
”Тазьы шуэ Кузё-Инмар:
Мон тодам вайисько пинал дырысьтыд Монэн эшъяськыса улэмдэ,
тынэсьтыд Монэ яратэмдэ, соку тон вылькен вал на,
соку тон Мон сьӧры кыр дуннее, кизьымтэ музъем вылэ, мынӥд.
3Израиль Кузё-Инмарлэн святыняез вал,
Инмарлы сётоно нырысь емышез вал;
ваньмыз сое сиисьёс судэ сётэмын вал, шугадӟон соос доры вуиз, –
шуэ Кузё-Инмар.
4Иаковлэн юртэз, Израиль юртлэн вань выжыосыз,
Кузё-Инмарлэсь верамзэ кылзэ!
5Тазьы шуэ Кузё-Инмар:
тӥляд атайёсты Мон бордысь ӧрекчаськон шедьтӥзы-а,
малы Мон бордысь палэнскизы, аляк ужъёс сьӧры кошкизы но
алекъяськыса улыны кутскизы?
6Соос ӧз шуэлэ:
”Кытын асьмеды Египет музъемысь поттӥсь Кузё-Инмар,
Кудӥз асьмеды кыр дунне пыр, тырттэм, улӥсьтэм кӧс музъем пыр
валтыса нуиз,
кулон вужерлэн музъемтӥз нуиз, отӥ нокин но ӧз ветлы,
отын нокин но ӧз улы?”
7Удалтӥсь музъеме Мон тӥледыз пыртӥ,
солэн емышеныз, солэн ӟечлыкеныз кӧттэс тырыса мед улоды шуыса,
нош тӥ пыриды но Мынэсьтым музъемме саптады,
ваньбурме юрӟым макелы пӧрмытӥды.
8Священникъёс ӧз шуэлэ: ”Кытын Кузё-Инмар?”
Законлы дышетӥсьёс но Монэ ӧз тодэ,
возьмасьёс-пастырьёс но Мон бордысь усизы,
пророкъёс но Вааллэн нимыныз азьпалзэ тодытыса веразы,
юрттӥськисьтэм сульдэръёслэн-идолъёслэн пытьы кузязы ветлӥзы.
9Соин ик Мон тӥледыз суд улэ кыско, – шуэ Кузё-Инмар, –
пиостылэсь пиоссэс но судэ пырто.
10Хиттим шормуӵъёсы мыныса учкелэ ук, Кидаре адямиостэс ыстэ,
пыр-поч чаклалэ-эскере, учкелэ: талы укшасез маке но вал-а отын?
11Кыӵе ке но калык аслэсьтыз инмаръёссэ,
соос инмаръёс ке но ӧвӧл, воштӥз-а?
Нош Мынам калыке аслэсьтыз данзэ
сульдэръёслы-идолъёслы воштӥз,
соос уг ке но юртто.
12Паймелэ талы, инъёс, куалектэ, кышкатске, – шуэ Кузё-Инмар.
13Уго кык лек уж лэсьтӥз Мынам калыке:
Монэ, улэп вуэн ошмесэз, куштӥзы но ву возьыны быгатӥсьтэм
сӧриськем ву возён интыос асьсэлы гудӟизы.
14Израиль – ляльчи шат? Яке со юртын вордскем мурт-а?
Малы со мылеслы пӧрмиз?
15Со шоры пинал левпиос ыргетыны кутскизы,
куаразэс поттӥзы но солэсь музъемзэ кыр дуннелы пӧрмытӥзы;
каръёсыз сутэмын, улӥсьёсыз ӧвӧл ни.
16Мемфисысь но, Тафнаысь но пиос
тынэсьтыд йырпыдэстэ ӵышкизы.
17Тонэ валтыса нуллӥсь Инмардэ Кузё-Инмарез кельтэмед понна
вань та шугадӟонъёс тон доры ӧз вуэ-а?
18Али но малы тыныд Египетэ сюрес кулэ – Нилысь ву юыны-а?
Малы тыныд Ассирияе сюрес кулэ – солэн шурысьтыз вузэ юыны-а?
19Сьӧлыклэсь кышкатэк улонэд тонэ вӧсь кароз,
куштӥськонэд тонэ шарае поттоз;
озьыен, тод, малпаськы макем урод, курыт луоз тыныд
Инмардэ Кузё-Инмарез куштэмед понна,
Мынэсьтым кышкатэк улэмед понна, –
шуэ Саваоф Инмар Кузё-Инмар.
20Уго кемаласен ини тынэсьтыд зӥбеттэ Мон пыргытӥ,
сьӧлтэтъёстэ тӥяй,
соку тон шуылӥд: ”Сульдэръёслы ужаса-тыршыса уг улы”,
нош со дыре ик котькудаз ӝужыт вырйылын,
котькуд лабрес писпу улын тон азон сьӧлык лэсьтыса улӥд.
21Мон тонэ чебер виноград модосэз кадь мерттӥ вал, –
ваньмызлэсь чылкыт кидысэз;
малы нош тон кыр, емыш сётӥсьтэм мурт вайлы пӧрмид?
22Соин ик майталэн ке но мисьтӥськид,
пень вуэз ас вылад трос ке но киськад,
тынад йӧнтэм улонэд Мон азьын пусъемын, –
шуэ Инмар Кузё-Инмар.
23Кызьы тон вераны быгатӥськод:
”Мон асме ӧй сапта, Вааллэн сюрес кузяз ӧй ветлы?”
Нёжалысен астэ возем выросъёсыд шоры учкы ай,
тод, мар тон лэсьтӥд,
сюресъёсыд кузя утчаськыса ветлӥсь шумприч мумы верблюд!
24Кыр дуннелы дышем кыр мумы ишакез,
лулмугорызлэн мылкыдэз ӝуатскыку омырез ньылӥсез
кин кутыса возьыны быгатоз?
Сое утчасьёс уз жаде: кулэ дыр вуиз ке, шедьтозы сое.
25Пыдкуктэ кырыж лёганы пыдъёсыдлы эрик эн сёты,
гульымедлэсь сюзэ куасьтыса эн возьы.
Но тон шуид: ”Эн оскиськы, эн!
Мон мурт инмаръёсты яратӥсько, соослэн пытьы кузязы ветло”.
26Кызьы лушкаськисез кутыса возьытэ вутто,
озьы Израиль юрт ассэ ачиз возьытэ вуттӥз:
эксэйёссы но, кивалтӥсьёссы но,
священникъёссы но, пророкъёссы но, –
27писпулы шуо: ”Тон мынам атае”, излы: ”Тон монэ вордскытӥд”;
соос уго Мон пала ымнырзэс ӧз берыктэ, мышсэс берыктӥзы,
нош шугадӟон нуналъёсазы Мыным шуозы: ”Султы, уть милемыз!”
28Кытын бен тынад аслыд лэсьтэм инмаръёсыд? – мед султозы,
шугадӟон дыръяд тонэ утьыны быгато ке;
уго кӧня тынад каръёсыд-городъёсыд, Иуда,
сомында ик тынад инмаръёсыд.
29Малы тӥ Монэн ченгешиськоды? –
ваньды тӥ [сьӧлыклэсь кышкатэк улӥды,]
Мыным пумит сьӧлыкалляды, – шуэ Кузё-Инмар.
30Юнме тӥлесьтыд нылпиостэс вӧсь карылӥ: соос ӧз визьмаське;
сыскись-ньылӥсь лев музэн пророкъёстэс ас меченыды асьтэос
быдтылӥды, [тӥ ӧд курдалэ].
31Э, выжы! Кузё-Инмарлэсь кылзэ валаны тырше:
Израиль понна Мон кыр дунне вал-а? Пеймыт дунне вал-а?
Малы бен Мынам калыке шуэ:
”Ми асьмелы асьмеос кузё, ми Тон доры ум ни лыктэ?”
32Егит ныл чеберъянъёссэ вунэтэ-а,
вылькен дӥсянъёссэ тодаз уг вайы-а?
Нош Мынам калыке Монэ вунэтӥз, –
нуналъёс лыдъяса быдтонтэмесь.
33Макем быгатыса сюресъёстэ вошъяськод
яратон-гажан басьтон вылысь!
Йӧнтэмъёс пӧлысь йӧнтэмъёсты тон аслад сюресъёсыдлы дышетӥд!
34Дӥськут сӧзы бордад гинэ но куанер, янгыштэм муртъёслэн
вирзы кылемын, соос юрттэ тӥяса ӧз ке но пыре,
но озьы ке но
35шуиськод: ”Мон янгыш ӧвӧл бере,
зэм но Солэн вожпотонэз мынам палэнтӥм ортчоз”.
Тани, Мон тонэ судэ сёто ”мон ӧй сьӧлыка” шуэмед понна.
36Аслэсьтыд сюрестэ вошъяса,
малы тон сокем трос калгыса ветлӥськод?
Ассирия музэн ик Египет но тонэ возьытэ вуттоз;
37тон со дорысь кидэ йыр вылад поныса потод,
малы ке шуоно Кузё-Инмар тынэсьтыд оскиськондэ палэнтӥз,
соосын валче тынад азинлыкед уз луы”».
Глава 2