Выбрать язык
Книги Ветхого Завета
Книги Нового Завета
с русским текстом1«Шуо: ”Пиосмурт кышнозэ кошкыны лэзиз ке, кышноез со дорысь кошкоз но мукет пиосмуртлы кышно луиз ке, соку со кышномурт быгатоз на-а со доры берытскыны? Тазьы музъем уг саптаськы-а?” Нош тон трос пиосын азыса улӥд, – озьы ке но тон Мон доры берытскы, – шуэ Кузё-Инмар.2Синдэ ӝутыса, вырйылъёс шоры учкы ай: кытын гинэ тонэн азон сьӧлык ӧз лэсьтэ? Соос понна тон сюрес дуръёсын пукид араблэн луоё кырын пукемез кадь, азыса улон сьӧлыкеныд, аслад кескич улонэныд музъемез саптад.3Со понна куазь зорытэк улӥз, бер зор но ӧй вал; тынад кымесэд калгись кышномуртлэн кадь – тон возьыттэ ыштӥд.4Табере тон Мыным тазьы уд ни-а вазиськылы: ”Атае мынам! Ныл дыръям Тон мынам сюрес кузя валтӥсе вал!5Пырак ӵоже Со вожзэ поттыса улоз ни шат? Пумтэм вапумъёс ӵоже сое Ас бордаз кутыса возёз ни шат?” Тӥни, тон мар вераськод, нош ачид урод уж лэсьтӥськод, со бордын азинлыко тыршиськод».
6Иосия эксэйын пукон нуналъёсы Кузё-Инмар мыным шуиз: «Адӟид-а тон, Израиль ныл мар лэсьтӥз, оскон бордысь куштӥськись? Со ветлӥз вань ӝужыт гурезь йылъёсы, вань лабрес писпуос улэ, отын азон сьӧлыкъёс лэсьтылӥз.7Ваньзэ тае лэсьтылэм бераз Мон шуылӥ: ”Мон доры берытскы”; нош со ӧз берытскы; тае адӟиз солэн кескич сузэрез Иудея.8Оскон бордысь куштӥськем Израиль нылэз азыса улэмез понна Мон улляй но солы люкиськон сярысь гожтэт сётӥ, нош солэн кескич сузэрез, Иудея, ӧз кышка, со но азон сьӧлык лэсьтыса улыны кутскиз, – тае Мон Ачим адӟи.9Ватӥськымтэ азон сьӧлык лэсьтыса, со музъемез саптаз, излы, писпулы йыбыртъямез но азон сьӧлыклы ӵошаз.10Нош озьы ке но, солэн кескич сузэрез, Иудея, вань сюлмыныз Мон пала ӧз берытскы, гольтыръяськыса гинэ берытскиз», – шуэ Кузё-Инмар.
11Кузё-Инмар мыным шуиз:
«Израиль ныл, осконлэсь куштӥськись,
шонерегес потэмын кескич Иудея ныл сярысь.
12Мыныса та кылъёсты уйпаллы вера, шу: Израиль ныл,
осконлэсь куштӥськись, берытскы, – шуэ Кузё-Инмар. –
Аслэсьтым йыркурме тӥ вылэ Мон уг кисьты,
уго Мон – гажась-жалясь, – шуэ Кузё-Инмар, –
пумтэм дауръёс ӵоже йыркуръяськыса уг улы.
13Танӥськытэк вера аслэсьтыд янгыштэ:
тон уго Инмаредлэсь Кузё-Инмарлэсь палэнскид но муртъёсын
вань лабрес писпуос улын азон сьӧлыкъёс лэсьтыса улӥд,
нош Мынэсьтым верамме-куараме ӧд кылзы, – шуэ Кузё-Инмар.
14Оскон бордысь куштӥськем нылпиос, берытске, – шуэ Кузё-Инмар, – малы ке шуоно Мон тӥледын герӟаськемын, котькуд городысь тӥледыз быдэн одӥгдэс, котькуд выжыысь быдэн кыксэ басьто но ваньдэс Сӥонэ ваё.15Сюлмылы кельшись уллё возьмасьёсты тӥледлы сёто, соос тодыса, визьмын тӥледыз возьмалозы.16Нош тӥ музъем вылын йылӥды но трос емыш сётӥсь луиды ке, со нуналъёсы, – шуэ Кузё-Инмар, – уз ни вералэ: ”Кытын Кузё-Инмарлэн сӥзён-косонэзлэн ковчегез?”; визьме но уз лыкты, сое тодазы но уз вае, со доры уз но ветлэ ни, со уз но луы ни.17Со виын Иерусалимез Кузё-Инмарлэн престолэз шуыса нималозы; Кузё-Инмарлэн нимыз понна вань калыкъёс Иерусалиме люкаськозы, лек сюлэмзылэн вогъяськон сямызъя азьланяз уз ни улэ.18Со нуналъёсы Иуда юрт Израиль юрт доры лыктоз но соос ӵошен уйпал музъемысь атайёстылы люкетлы сётэм музъеме мынозы.
19Мон шуылӥ: ”Нылпиос радэ тонэ кызьы пуктом,
туж синмаськымон музъемез,
трос калыкъёслэсь чеберлэсь но чебер люкетсэс,
кызьы тыныд сётом?”
Мон шуи: ”Тон Монэ атай шуыса нималод,
Мон бордысь уд куштӥськы”.
20Но, шонерзэ вераса,
кызьы кышномурт кескич амалэн аслэсьтыз кузпалзэ пӧя,
озьы ик тӥ но Мыным пумит кескич уж лэсьтӥды, Израиль юрт, –
шуэ Кузё-Инмар.
21Ӝужыт интыосысь куара кылӥське,
израиль пиослэн ӝожомыса бӧрдэм куаразы кылӥське:
сюресъёсмес мыдланьтӥмы,
Инмармес Кузё-Инмарез вунэтӥмы, шуо соос.
22Бугыръяськись-пумитъяськись нылпиос, берытске:
тӥлесьтыд тэрытскытэк улондэс Мон бурмыто».
– «Тани, ми Тон доры мынӥськомы,
уго Тон – милям Инмармы Кузё-Инмар.
23Зэм ик, юнме гинэ ми
вырйылъёслы, трос гурезьёслы оскиськылӥмы;
зэмзэ ик, Инмармы Кузё-Инмар бордын Израильлэн утиськонэз!
24Милям пинал дырысенымы та юрӟымлык
атайёсмылэсь ужам ужзэс,
ыжъёссэс но, ошъёссэс но, пиоссэс но, нылъёссэс но сиылӥз.
25Инмармы Кузё-Инмар азьын сьӧлыкаса улэммы понна
возьдаськон пӧлын улӥськомы, керпотон милемыз шобыртэ, –
ми но, милям атайёсмы но пинал дырысенымы туннэ нуналозь
Инмармылэсь Кузё-Инмарлэсь верамзэ ӧм кылзӥськылэ уго».
Глава 3