Выбрать язык
Книги Ветхого Завета
Книги Нового Завета
с русским текстом1«Берыктӥськемед потэ ке, Израиль,
Мон пала берыктӥськы, – шуэ Кузё-Инмар, –
Мынам син азьысьтым юрӟым макеостэ палэнтӥд ке,
костаськыса ветлоно уд луы.
2”Инмар понна!” шуыса пӧяськытэк, шонер кыл сётод;
калыкъёс Соин бакель каремын луозы, Соин ушъяськозы.
3Уго Кузё-Инмар Иудеяысь но Иерусалимысь воргоронъёслы
тазьы шуэ:
асьтэлы выль музъем гыре, жаг турын пӧлы эн кизе.
4Кузё-Инмар понна асьтэлы вандӥськон ортчытэ,
сюлэмдылэсь вог сямзэ вандыса басьтэ,
иудей воргоронъёс, Иерусалимын улӥсьёс,
Мынам вожпотонэ тыл кадь кенжыса, кысыны луонтэм гомаса
медаз ӝуа тӥляд урод сямъёсыныды сэрен.
5Иудеяын ялэ, Иерусалимын ивортэ, вералэ,
гумыен музъем вылтӥ шудыса ветлэ;
бадӟым куараен черектӥськыса шуэлэ:
”Люкаськелэ, юнматэм городъёсы мыноме”.
6Сӥон доры знамя ӝутэ, бызе, эн дугдылэ;
уго уйпалась Мон тӥледлы шугадӟон но туж бадӟым бырон ваё.
7Куакъёс пӧлысьтыз лев потэ, калыкъёсты быдтӥсь возьматске:
со аслаз интыысьтыз потэ тынэсьтыд музъемдэ
кыр дунне карон понна;
городъёсыд таркамын луозы, улӥсьёсыз уз ни кыле.
8Со понна ик бышкись чурыт дӥськутэн думиське но
бӧрдэ, викышъялэ,
уго Кузё-Инмарлэн йыркурез асьме бордысь уз палэнскы.
9Со нуналэ тазьы луоз, – шуэ Кузё-Инмар, – эксэйлэн но, кивалтӥсьёслэн но сюлэмзы пумоз; священникъёс куалектозы, пророкъёс абдралозы».10Мон шуи: «Эй, Инмаре Кузё-Инмаре! Та калыкез, Иерусалимез лӧпкытъяд гинэ ке шат тазьы вераса: ”Тӥ дорын каньыллык луоз”, нош со дыре ик лул дорозь меч вуэ?»11«Со виын та калыклы но Иерусалимлы верамын луоз: ”Луоё кырысь вырйылъёсысь ӵушкась тӧл Мынам калыкелэн нылызлэн сюрес вылаз лыктэ, тӧлӥськон понна, чылкытатон понна со ӧвӧл.12Отысь Мон доры таизлэсь кужмоез тӧл лыктоз но, Мон соослы суд лэсьто”.13Тани, со пилем кадь ӝутске, ожмаськон уробоосыз – тӧлпери кадесь, солэн валъёсыз ӧрӟилэсь шаплыесь; куректон-кайгу асьмелы! Асьмеос уго куашкатэмын-таркамын луомы.
14Иерусалим, уроддэ-лектэ сюлэм бордысьтыд гылты –
утиськыны мед быгатод:
кудкемозь тынад пушкад лекесь малпанъёс каръяськыса улозы на?
15Тани, Дан дорысь куара-ланга вуэ ини,
бырон ивор Ефрем гурезьысь лыктэ:
16калыкъёслы ялэ, Иерусалимлы ивортэ,
кыдёкысь шаерысь городэз котыртӥсьёс вуо,
шуш куараоссы Иудеяысь городъёсы шуккисько шуыса.
17Бусыосты возьмасьёс музэн соос Иерусалимез котырто,
уго со Мыным пумит бугырскиз, – шуэ Кузё-Инмар.
18Тынад сюресъёсыд, ужъёсыд тыныд тае лэсьтӥзы;
сьӧлыклэсь кышкатэк улэменыд,
тыныд сокем ӝож – сюлэм выжыозяд ик вуэ».
19Ой, сюлмы-кӧты, сюлмы-кӧты! Вань сюлмыным куректӥсько,
сюлмы куалекъя, чус кариськеме уг луы;
уго тон, лулыкае,
гумы куараез, ожмаськонэ ӧтён куараез кылӥськод.
20Шугадӟон бӧрсьы шугадӟон вуэ: быдэс музъем тырттэм кыле,
шӧдтэк шорысь тылысъёсме куашкатӥзы,
син куспын балаганъёсме таркалозы.
21Кема-а мыным улоно на знамя шоры учкыса, гумы куара кылзыса?
22«Та соин озьы луэмын: Мынам калыке валасьтэм, Монэ уг тоды:
соос вакчи визьем нылпиос, нодтэмесь;
уродлы-леклы соос визьмоесь, нош ӟеч уж лэсьтыны уг быгато».
23Музъем шоры учкисько, но тани, со таркамын, тырттэм кельтэмын,
инъёс шоры учкисько, нош соос бордын югыт ӧвӧл ни.
24Гурезьёс шоры учкисько, но тани, соос зуркало,
вань вырйылъёс но куалекъяло.
25Учкисько, но тани, адямиос ӧвӧл ни,
вань ин тылобурдоос но лобӟыса кошкизы.
26Учкисько, но тани, Кармил – луоё кыр,
солэн вань городъёсыз Кузё-Инмарлэн азьысьтыз куашкатэмын
Солэн вожпотонэзлэн ӝуатскеменыз сэрен.
27Уго тазьы шуиз Кузё-Инмар:
«Быдэс музъем тырттэм кельтэмын луоз, но чылкак ваньзэ уг быдты.
28Та понна музъем бӧрдоз, вылын инъёс пеймытомозы, –
тае Мон верай, мае Мон тупатӥ-пуктӥ, со понна уг ӧкыны,
верам кылы бордысь уг куштӥськы.
29Вал вылын мынӥсьёслэн, ыбылӥськисьёслэн куашетэмзылы луыса
вань городъёс пазьгиськозы:
соос пеймыт нюлэсъёсы кошкозы, изгурезьёс йылэ тубозы;
вань городъёс калыктэм кылёзы, отын одӥг улӥсез но уз ни луы.
30Нош тон, тырттэм кылем, ма карод на?
Дарали дӥськутэн дӥсяськиськод ке но,
зарни чеберъянъёсын кильтыръяськиськод,
буёлъёсын син дуръёстэ буялляськод ке но, –
юнме астэ чеберъяськод;
музьыосыд тонэ кулэтэм каризы – соос тынэсьтыд лулдэ утчало».
31Нуны вайись кышномуртлэн ӝуштэмез выллем куараез
мон кылӥсько,
нырысетӥ ползэ нуны вайисьлэн ӝуштэмезлы укшась куараез,
Сӥон ныллэсь куаразэ кылӥсько,
киоссэ позыръяса, со ӝуштэ: «Э, куректон-кайгу мыным!
Мынам лулы адями виылӥсьёс азьын писыръяса курадӟе».
Глава 4