Выбрать язык
Книги Ветхого Завета
Книги Нового Завета
с русским текстом1Иерусалимлэн ульчаосыз кузя ветлэ, учкелэ, чаклалэ-эскере,
падвожъёсысьтыз но утчалэ, уд шедьтэ-а адямиез,
шонерлыкез утись мурт, зэмлыкез утчась мурт
кылемын ӧвӧл ни меда? –
Соку Мон Иерусалимез жалясал.
2«Инмар понна!» соос шуо ке но, верам кылзылы оскыны уг луы.
3Э, Кузё-Инмаре! Тынад синъёсыд зэмлык пала уг-а учко?
Тон соосты погыртӥськод, нош соос вӧсь луэмзэс уг шӧдо;
Тон соосты быдтӥськод, нош соослэн визьмаськемзы уг поты;
ымнырзэс излэсь чурыт каризы – берытскемзы уг поты.
4Ас поннам ачим шуи: «Куанеръёс, дыр, соос; нодтэмесь соос,
малы ке шуоно Кузё-Инмарлэсь сюрессэ, ас Инмарзылэсь законзэ
соос уг тодо.
5Нимо-даноос доры мон мыно но соосын верасько,
уго соос Кузё-Инмарлэсь сюрессэ, ас Инмарзылэсь законзэ тодо.
Но соос зӥбетэз сэрпалтӥзы, сьӧлтэтэз тӥязы.
6Со понна соосты нюлэскысь сьӧсь пӧйшур погыртоз,
кыр дуннеысь кион соосты таркалоз,
городъёссы вӧзын соосты барс возьмаса улоз:
отысь потӥсь мурт кесямын луоз;
уго соослэн йыружъёссы йылӥзы,
Инмар бордысь куштӥськонъёссы трос луизы».
7«Кызьы бен со понна Мон тонэ простить каром?
Нылпиосыд Мынэсьтым куштӥськизы но
инмар луисьтэм макеосын кыл сёто.
Мон соослэсь кӧтсэс тырыса вози, нош соос азыса улӥзы,
калгись кышноослэн юртъёсазы уллёосын ветлӥзы.
8Соос – куайытэм ужпиос:
ваньзы соос муртлэн кышноез шоры гырдалто.
9Со понна Мон соосты вӧсь уг кары шат? – шуэ Кузё-Инмар, –
та выллем калыклы Мон пунэмзэ уг берыкты-а?
10Борддор йылъёсаз тубыса, сое куашкатъялэ, но пумозяз эн таркалэ:
пинь кадь мычиськем люкетъёссэ гинэ тӥялэ,
малы ке шуоно соос Кузё-Инмарлэсь ӧвӧл;
11уго Израиль юрт, Иуда юрт
Мыным пумит туж кескич ужъёс лэсьтыса улӥзы, –
шуэ Кузё-Инмар.
12Соос Кузё-Инмар сярысь урод кылъёс веразы, шуизы:
”Со – ӧвӧл, асьме доры шугадӟон уз лыкты,
тӥр-пуртэз, сютэм улонэз но ум адӟе.
13Пророкъёс но тӧллы пӧрмозы,
[Кузё-Инмарлэн] кылыз соос бордын ӧвӧл;
соос вылэ та шугадӟон мед вуоз”».
14Соин ик Саваоф Инмар Кузё-Инмар шуэ:
«Таӵе кылъёс верамды понна Мон Аслэсьтым верам кылъёсме
ым пушкад тыллы пӧрмыто,
нош та калыкез пу каро, соку та тыл соосты ньылоз.
15Тани, Израиль юрт, тӥ вылэ кыдёкысь калыкез ваё, –
шуэ Кузё-Инмар, –
кужмо калыкез, вашкала калыкез,
со калыклэсь кылзэ тон уд тодӥськы,
уд вала, мар со вералоз.
16Солэн ньӧл тырон сепысэз усьтӥськем шайгу кадь;
ваньзы соос – кышканэз тодӥсьтэм муртъёс.
17Арано юдэ, няньдэ но соос сиёзы,
пиостэ, нылъёстэ сиёзы,
ыжъёстэ, ошъёстэ но, винограддэ, смокваостэ но сиёзы;
оскиськиськыса улоно юнматэм городъёстэ
тӥр-пуртэн куашкатозы.
18Но со нуналъёсы но тӥледыз пумозяз уг быдты, – шуэ Кузё-Инмар.
19”Мар понна Инмармы Кузё-Инмар милемлы ваньзэ тае лэсьтӥз?” шуиды ке, соку тазьы ответ сёт: ”Мон бордысь куштӥськыса, ас музъемады мурт инмаръёслы йыбыртъямды понна мурт музъемын мурт калыкъёслы ужаса-тыршыса улоды”.
20Та сярысь Иаков юртын ивортэ, Иудеяын ялэ но тазьы шуэ:
21”Синмыз вань вылысь адӟисьтэм, пельыз вань вылысь кылӥсьтэм,
нодтэм, валасьтэм калык, кылзы тае:
22Мынэсьтым-а уд кышкаське, – шуэ Кузё-Инмар, –
Мон азьын-а уд куалекъяське?
Мон луоез зарезьлы бесмен карыны кисьтӥ,
пумтэм вапумъёс ӵоже со вамен зарезь ву уз выжы;
тулкымъёсыз урдӥсько ке но, нош сое вормыны уг быгато;
соос куашето ке но, нош со пыр выжыны уг быгато.
23Нош та калыклэн сюлмыз шаян, бугыръяськись:
берлань чигнаса кошкизы;
24ас сюлмазы ӧз шуэ:
”Ас Инмармылэсь Кузё-Инмарлэсь кышкаломе,
Со асьмелы ас дыраз вазь лыктӥсьсэ но, бер вуисьсэ но зорез сётэ,
аранмес быдэстыны сэзь нуналъёссэ дасяса возе”.
25Тӥляд законлы пумит улонъёсты та радлыкез сӧризы,
сьӧлыкъёсты та ӟечлыкез тӥ дорысь палэнтӥзы.
26Уго мынам калыке пӧлын сьӧлыклэсь кышкасьтэмъёс вань:
тылобурдо кутылӥсьёс музэн возьмаськыса уло, музъем вылэ выдо,
нальыкъёс-выос пуктылыса, адямиосты кутыло.
27Тылобурдоен тырмытэм четлык кадь
соослэн коркаоссы ӧрекчаськонэн пачылмемын;
та пыр соос вылэ ӝутскизы, узырмизы,
28зӧкомизы, кӧесь луизы, урод уж лэсьтонлэн сьӧраз потӥзы,
судэ сётэм ужъёсты, анайтэм-атайтэм нылпиослэсь ужъёссэс
уг эскеро;
майбыр уло, кураськисьёслэн шонерлыко ужзылы уг дурбасьто.
29Та понна Мон соосты вӧсь уг кары шат? – шуэ Кузё-Инмар. –
Та выллем калыклы Мон пунэмзэ уг берыкты-а?
30Паймымон, шимес ужъёс лэсьтӥсько та музъем вылын:
31пророкъёслэн азьпалзэ тодытыса веранзы – пӧяськон,
соослэн юрттэменызы,
священникъёс ас тодэмзыя лэсьто,
нош Мынам калыке таӵе улонэз яратэ.
Таослы пум вуэм бере мар бен тӥ лэсьтоды на?”»
Глава 5