Выбрать язык
Книги Ветхого Завета
Книги Нового Завета
с русским текстом1Вениамин нылпиос, пегӟе Иерусалимысь,
Фекоя карысен гумыен шудэлэ,
Беф-Карем дорысен тылэн тодмет сётэлэ, –
уйпалась шугадӟон, туж бадӟым бырон вуэ.
2Чебер, эрки Сӥон нылэз Мон таркало.
3Пудо возьмасьёс со доры уллёосынызы лыктозы но
солэн котыраз балаганъёссэс пуктылозы;
котькудӥз аслаз музъем вылаз пудозэ возьмалоз.
4Солы пумит ожмаськыны дасяське;
султэлэ, нуназе шорын вырӟоме.
Кайгу милемлы! Нунал ӝытлане кошке, ӝытпал вужеръёс кузёмо.
5Султэлэ, уйин мыныса солэсь улон интызэ таркаломе!
6Уго тазьы шуэ Саваоф Кузё-Инмар: «Писпуосты коралэ но
Иерусалим котыртӥ мудэт лэсьтэ:
та город вӧсь каремын луыны кулэ;
со пушкын трос муртэ ултӥяса возё.
7Кызьы ошмес пушкысьтыз вуэз пызйыса поттэ,
озьы ик Иерусалим ас пушкысьтыз уродэз-лекез поттэ:
со пушкын эриктэман, талан-лушкам куараос кылӥсько,
Мынам син азям ялан
ӝожен-курен улӥсьёс, яраё каремъёс адӟисько.
8Визьмаськы, Иерусалим,
Мынам лулы тон дорысь медаз палэнскы но
Мон тонэ кыр дунне, улыны ярасьтэм музъем медам кары».
9Тазьы шуэ Саваоф Кузё-Инмар:
«Израильлэсь кылемзэ, виноградэз кадь, быдтытозязы бичалозы;
виноград бичась кадь, киыныд ужаса, корзинадэ тырмыты».
10Кинлы мыным верано, мед кылзӥськозы шуыса, кинлы вазиськоно?
Пельзы соослэн ӵоксаськемын, кылзэмзы уг луы;
Кузё-Инмарлэсь кылзэ соос серем каро:
соослэн со сюлмазы уг веська.
11Соин ик мон Кузё-Инмарлэн вожпотонэныз пачылмемын,
сое пушкам возьыны уг быгатӥськы;
сое ульчаысен нылпиос вылэ кисьто, егит пиослэн люкаськонзы вылэ;
картэн кышноос,
даурзэ улэм муртэн ӵош мӧйы мурт но пленэ басьтэмын луозы.
12Коркаоссэс мукетъёслы сётозы,
озьы ик бусыоссэс но, кышнооссэс но.
Кузё-Инмар шуэ:
«Та музъем вылын улӥсьёслы пумит Аслэсьтым киме ӝуто.
13Уго пичиен-бадӟымен – ваньзы соос асьсэлы пайда утчаса уло,
пророк бордысен кутскыса священник дорозь –
ваньзы ӧрекчаськыса уло;
14мылкыдзэс понытэк, калыкелэсь яраоссэ эмъяло но шуо:
”Тупаса улон! Тупаса улон!”, нош тупаса улон ӧвӧл.
15Юрӟым ужъёс лэсьтыкузы, возьдасько-а соос?
Уг, чик уг возьдасько, уг но гордэкто.
Со понна усемъёс пӧлы усёзы.
Лыктӥ ке, Мон погырто соосты», – шуэ Кузё-Инмар.
16Тазьы шуэ Кузё-Инмар: «Сюресъёсты шоры дугдыса чаклаське,
вашкалаослэн сюресъёссы сярысь юалляське,
кытын ӟеч сюрес, отӥ мынэ, лулдылы каньыллык шедьтоды.
Нош соос шуизы: ”Ум мынэ”.
17Тӥледыз утьыны возьмаськисьёсты пуктыса, Мон шуи:
”Гумылэсь куаразэ кылзэ”. Нош соос шуизы: ”Ум кылзэ”.
18Озьы бере, калыкъёс, кылзэ! Кенеше люкаськем калык, тод, мар соосын луоз.
19Кылзы, музъем: тани, та калык вылэ Мон урод малпанъёссы понна бырон ваё; соос уго Мынэсьтым верамме ӧз кылзэ, законме кулэтэм каризы.20Малы Мыным кулэ Саваысь ваем ладан, кыдёкысь кунысь вуттэм ческыт зыно тростник? Тылын сутӥськись курбонъёсты Мыным ярантэмесь, курбонъёсты Мыным уг кельшо».21Соин ик Кузё-Инмар тазьы шуэ: «Тани, та калык азе Мон сьӧлтэтъёс пуктылӥсько, соос борды атайёс нылпиосынызы валче, бускель эшеныз ӵош канжаськылозы но бырозы».
22Тазьы шуэ Кузё-Инмар: «Тани, уйпал кунысь калык лыктэ,
музъемлэн пумъёсысьтыз туж кужмо калык ӝутске;
23киосазы пукыӵ но шибоды возё;
соос лекесь, жаляны валасьтэмесь,
соослэн куаразы зарезь кадь куашетэ,
валъёсынызы, радэн султыса, одӥг мурт кадь вортто –
Сӥон ныл, тонэн ожмаськыны лыкто».
24Соос сярысь ми ивор кылӥмы но, суй-пыдмы юскиськиз,
куректон-кайгу милемыз котыртӥз,
нуны вайись кышномуртэз кадь курадӟон ёртӥз.
25Бусые эн потэ, сюрес кузя но эн ветлэ,
уго тушмонлэн палашъёсыз котыр ласянь шимес кышкан ваё.
26Калыкелэн нылыз!
Бышкись чурыт дӥськут дӥся, пенен астэ пызьна;
одӥг гинэ пиед кулэм дыръя кадь чигиськыса кужмо бӧрд;
уго шӧдтэк шорысь асьме вылэ бырон лыктоз.
27Ас калыке пушкы Мон тонэ
каланча интые пуктӥ, юбо карыса пуктӥ:
соослэсь сюрессэс тон мед тодод но чакласа-эскерыса мед улод.
28Ваньзы соос – вог сюлэмо адямиос, кыл нуллыса уло;
ваньзы соос – ыргон но корт, адями сӧрисьёс.
29Кебитысь пеллян кӧрык ӝуамын,
узвесь тыл пушкын ӝуаса быремын:
корт ӵыжатӥсь юнме ӵыжатӥз –
лек сюлэмоос ӧз люкиське, ӧз бӧлиське;
30соосты куштӥськем азвесь шуыса нималозы,
уго Кузё-Инмар соосты кулэтэм кариз.
Глава 6