Выбрать язык
Книги Ветхого Завета
Книги Нового Завета
с русским текстом1Кузё-Инмарлэн Иеремиялы верам кылыз:2«Кузё-Инмарлэн коркаезлэн капка азяз султыса вера та кылэз, шу: ”Вань иудейёс, Кузё-Инмарлы йыбырттыны та капкатӥ пырисьёс, кылзэлэ Кузё-Инмарлэсь верам кылзэ”.
3Тазьы шуэ Израильлэн Инмарез Саваоф Кузё-Инмар: ”Шонертэ асьтэлэсь сюресъёстэс, ужъёстэс но, соку Мон тӥледыз та интые улыны кельто.4Ӧрекчи кылъёслы эн оскиське: ”Татын Кузё-Инмарлэн храмез, Кузё-Инмарлэн храмез, Кузё-Инмарлэн храмез”.5Нош сюрестэс, асьтэлэсь ужъёстэс но чылкак шонертӥды ке, ог-огеныды куспады тупаса, шонер улӥды ке,6ёртыса ӧд ке возе мурт кунысь адямиез, анайтэм-атайтэм нылпиез, палкышноез, та интыын янгыштэм вирез ӧд ке кисьтэ, асьтэлы кайгу-шугадӟон утчаса, мукет инмаръёслэн пытьы кузязы ӧд ке мынэ, –7соку Мон тӥледыз та интые, та музъем вылэ, улыны кельто, со музъемез Мон выжыосысь выжыосы атайёстылэн киулазы мед луоз шуыса сётӥ.
8Тани, тӥ тӥледлы пайда вайисьтэм ӧрекчи кылъёслы оскиськиськоды.9Кызьы озьы? Тӥ лушкаськиськоды, виылӥськоды, азон сьӧлыке пырыса улӥськоды, ӧрекчаськыса кыл сётӥськоды, Вааллы ӵындытӥськоды, тодмотэм инмаръёслэн пытьы кузязы ветлӥськоды,10собере та храме лыктӥськоды но Мынам син азям султӥськоды, та храм Мынам нимыным нимамын, тӥ шуиськоды: ”Ми утемын” – нош асьтэос азьланяз но вань та юрӟым ужъёсты лэсьтӥськоды.11Тӥляд син азяды та Мынам нимыным нимам храм йырвандӥсьёслэн люкаськон интызылы ӧз пӧрмы-а? Мон адӟисько, мар тӥ лэсьтӥськоды, – шуэ Кузё-Инмар.
12Мынэлэ ук Сӥломысь Мынам нимылы сӥзем вӧсяськон интые но учкелэ, Израиль калыкелэн сьӧлыклэсь кышкатэк улэмез понна мар Мон соин кари.13Нош али, та вань ужъёсыз лэсьтӥськоды бере, – шуэ Кузё-Инмар, – Мон тӥледлы вазь ӵукнаысен ик вералляй, нош тӥ ӧд кылзӥськелэ, – ӧтьылӥ тӥледыз, нош тӥ ӧд вазиськелэ, –14Мон Сӥломлы кадь ик каро тӥляд оскиськоно, Мынам нимылы сӥзем храмлы, атайёстылы сётэм интылы но озьы ик каро.15Аслам син азьысьтым агай-вынъёстэс, быдэс Ефрем выжыез кадь тӥледыз пазьго.
16Нош тон та калык понна эн куры, соос понна эн вӧсяськы, эн куриськы. Мон азьтӥ, палазы пырыса, эн ветлы, куремдэ санэ уг поны.17Уд адӟиськы-а, мар соос каро Иудеяысь городъёсын, Иерусалимлэн ульчаосаз?18Нылпиос пу люкало, нош атайёс тыл поно; инлэн нылкышно инмарезлы кышномуртъёс пирог пыжыны нянь нырко, мукет инмаръёслы курбон-салам кисьтыса, Монэ ӝоже уськытон понна та ужез лэсьто.19Монэ-а соос ӝоже уськыто? – шуэ Кузё-Инмар, – асьсэзыз асьсэос возьытэ уг-а вутто?”20Соин ик тазьы шуэ Инмар Кузё-Инмар: ”Тани, Мынам йыркуре, Мынам вожпотонэ та инты вылэ кисьтӥське, адямиос вылэ, пудоос вылэ, лудысь писпуос вылэ, музъемлэн емышъёсыз вылэ кисьтӥське, со ӝуатскоз но уз ни кысы”.
21Тазьы шуэ Израильлэн Инмарез Саваоф Кузё-Инмар: ”Тылын сутӥськись курбонъёстэс мукет курбонъёсты вӧзы понэлэ но сӥль сие;22уго Египет музъемысь поттон нуналам тӥляд атайёстылы курбон сярысь курон-косон ӧй сёты, тылын сутӥськись курбон сярысь но ӧй вера.23Но таӵе курон-косон соослы сётӥ: ”Кылзэлэ Мынэсьтым верамме, Мон тӥляд Инмарды луо, нош тӥ Мынам калыке луоды, тӥледлы умой мед луоз шуыса, сӥзьыса сётэм сюрес вылтӥм ветлэ”.24Нош соос ӧз кылзӥське, пельзэс ӧз мыкыртэ, лек сюлэмзылэн курем-косэмезъя, вог сямзыя улӥзы, Мон пала мышкынызы султӥзы, ымнырынызы ӧз султэ.25Тӥляд атайёстылэн Египет музъемысь потэм нуналысенызы туннэ нуналозь тӥ доры Мон вань ляльчиосме – пророкъёсты – ыстылӥ, нуналлы быдэ, вазь ӵукна ик, соосты ыстылӥ;26нош соос Монэ ӧз кылзӥське, пельзэс ӧз усьтэ, йырзэс урдӥзы, атайёссылэсь но уродгес ужъёс лэсьтыны кутскизы”.27Тон соослы та кылъёсты вераны кутскид ке, соос тонэ уз кылзэ; тон соосты ӧтьыны кутскид ке, соос тыныд уз вазиське.28Соослы соку шу: тани, та ас Инмарезлэсь Кузё-Инмарлэсь верамзэ кылзӥсьтэм, дышетэмзэ-нодъямзэ кабыл басьтӥсьтэм калык! Соос дорын зэмлык ӧвӧл ни, соослэн кыл-ымысьтызы со басьтэмын ни.
29Йырсидэ ӵышкыса кушты, гурезьёсын бӧрдыны кутскы, уго Кузё-Инмар вожзэ поттӥсь выжыез бордысьтыз палэнтӥз.
30Иудалэн пиосыз Мынам син азям урод уж лэсьто, – шуэ Кузё-Инмар, – Мынам нимыным нимам храме сое саптан понна юрӟым макеоссэс пуктӥзы;31Енном пиослэн нёжалазы, Тофет вырйылъёсы, пиоссэс, нылъёссэс тылын сутон инты лэсьтӥзы, сое Мон ӧй косы, сыӵе малпан тодам но ӧз лыктылы.
32Со понна, тани, вуо нуналъёс, – шуэ Кузё-Инмар, – куке та интыез Тофет шуыса уз ни нималэ, нёжалзэ но ”Енном пиослэн нёжалзы” уз ни шуэ, сое ”Виылон нёжал” шуыса нималозы, инты тырмымтэен сэрен Тофетэз кулэм мурт ватон инты карозы.33Та калыклэн шӧйёсыз ин тылобурдоослы, кыр пӧйшуръёслы сиён луозы, нокин но соосты уллясь уз ни луы.34Иудеяысь городъёсысь, Иерусалимысь ульчаосысь шумпотон, шулдыръяськон куараосты дугдыто, эмеспилэсь, вылькенлэсь куаразэс поттыны уг лэзьы, малы ке шуоно та музъем кыр дуннелы пӧрмоз».
Глава 7