Выбрать язык
Книги Ветхого Завета
Книги Нового Завета
с русским текстом1Со дыре, – шуэ Кузё-Инмар, – Иудей эксэйёслэсь лыоссэс поттыса куштозы, солэн кивалтӥсьёсызлэсь но, священникъёслэсь но, пророкъёслэсь но, Иерусалимын улӥсьёслэсь но лыоссэс шайгуосысьтызы поттыса куштозы.2Соосты шунды азе, толэзь азе, инмысь вань воинъёс*а азе зӥртылозы, соосты соос яратӥзы, соослы ужазы но пытьы кузязы ветлӥзы, соосты утчало но соослы йыбыртъяло вал; соосты басьтыса уз ватэ: музъем вылын соос кыед луозы.3Та лек выжыез пӧртэм интыосы улляса лэзем берам кылем люкетэз кулонэз улон сярысь умоенгес лыдъялозы, – шуэ Саваоф Кузё-Инмар.
4Вера соослы: «Тазьы шуэ Кузё-Инмар:
усё ке, уг ни султо шат,
сюрес вылысь кожыса йыромо ке, уг ни берытско шат?
5Иерусалим, малы та калык ялан мыдлане кожыса улэ?
Туж ӧрекчаськыса улэ, Мон пала берыктӥськемез но уг поты.
6Мон чакласа улӥ, кылзӥськи: шонерлыкез соос уг верало,
сьӧлыклэсь кышкатэк улэмез понна нокин но уг ӧкыны,
нокин но уг шуы: ”Мар мон лэсьтӥ?”,
котькудӥз, ожмаськон пушкы ворттӥсь вал музэн
ас сюрес вылаз дыртэ.
7Инбам улын улӥсь аист тылобурдо но тодэ солы сётэм дыръёсты,
кыр дыдык но, ваёбыж но, тури но чаклало лобӟыса лыктон дырзэс,
нош Мынам калыке Кузё-Инмарлэсь пуктон-косонзэ уг тоды.
8Кызьы тӥ шуиськоды: ”Ми визьнодоесь,
Кузё-Инмарлэн законэз ми дорын?”
Нош тани, книга тодӥсьёслэн алдаськон гожъян перозы
Инмар законэз ӧрекчаськонлы пӧрмытэ.
9Визьнодчиос возьытэ усизы,
куалектӥзы но калтон пушкы дэмӟылӥзы:
Кузё-Инмарлэсь веранзэ соос кулэтэм каризы;
мар бордын бен соослэн визь-нодзы?
10Со понна Мон соослэсь кышнооссэс мукетъёслы сёто,
бусыоссэс мукет кузёослы сёто,
малы ке шуоно соос, пичиен-бадӟымен –
ваньзы узырлык люкан борды кутскизы;
пророк бордысен кутскыса священник дорозь –
ваньзы ӧрекчаськыса уло.
11Калыкелэн нылызлэсь яраоссэ сюлэмзэс понытэк эмъяло но шуо:
”Тупаса улон, тупаса улон!”, нош тупаса улон ӧвӧл.
12Юрӟым ужъёс лэсьтыкузы, возьдасько-а соос?
Уг, соос чик уг возьдасько, уг но гордэкто.
Со понна соос усемъёс пӧлы усёзы;
Мон соос доры лыктӥ ке, соосты сэрпалто, – шуэ Кузё-Инмар.
13Номыртэк кельто соосты, – шуэ Кузё-Инмар, –
виноградпудэ одӥг мульы но уз кыльы,
смоквапуэ одӥг смоква но уз кыльы, куарез но усёз,
мар соослы Мон сётӥ, ваньмыз соос бордысь кошкоз».
14«Мар-о асьмеос пукиськомы?
Люкаськелэ, юнматэм каръёсы мыноме но отчы куломе;
уго асьмелэн Инмармы Кузё-Инмар асьмемыз бырон киулэ сётӥз,
Кузё-Инмар азьын сьӧлыкаса улэммы понна
Со асьмелы сэпен суро ву юыны сётэ».
15Тупаса улон витиськомы, нош номыр но ӟечез ӧвӧл,
бурмыны дыр витиськомы, но со ӧвӧл,
одӥг шимес, кышкаса улонъёс гинэ кылемын на.
16Дан дорысь валъёсызлэн соргетэмзы кылӥське;
ужпиосызлэн кужмо гырдаллямысьтызы, быдэс музъем зурка;
лыктыса музъемез но ваньзэ мар вань со вылын,
городэз но отысь вань улӥсьёссэ быдтозы.
17«Соку Мон тӥ вылэ кыйёсты, василиск кыйёсты лэзё,
соосты тунаса-пелляса дугдытыны уг луы,
соос тӥледыз лекалозы-куртчылозы», – шуэ Кузё-Инмар.
18Куректон-кайгулэсь ку мон буйгало!
Пушкам сюлмы писыръяса улэ.
19Тани, кыдёкысь шаерысь Ас калыкелэн нылызлэсь
викышъяса бӧрдэмзэ кылӥсько:
«Кузё-Инмар Сӥонын ӧвӧл ни шат?
Отын Эксэез ӧвӧл ни шат?» –
«Малы соос Монэ асьсэлэн окты-калты сульдэръёсынызы,
мурт музъемысь ваемъёсынызы, вожме поттӥзы?»
20Аран дыр ортчиз, гужем быриз, нош ми утиськон ӧм басьтэ.
21Ас калыкелэн нылызлэн чигиськыса улэмез понна
мон куректӥсько,
усем мылкыдын ветлӥсько, шимес кышкан монэ ӟыгыртӥз.
22Галаадын бальзам ӧвӧл шат? Отын эмъясь ӧвӧл шат?
Ас калыкелэн нылызлы малы бурмон ӧвӧл?
*а 8:2 инмысь вань воинъёс – татын: кизилиос
Глава 8