Выбрать язык
Книги Ветхого Завета
Книги Нового Завета
с русским текстом1Э, мынам йырылы кин ву сётоз, синъёсылы ошмес кадь синву!
Мон уй но нунал бӧрдысал
ас калыкелэн нылызлэн погыртэмъёсыз понна.
2Э, луоё кырын кин мыным сюресчиослы дасям кӧлан инты сётысал!
Кельтысал мон аслэсьтым калыкме, кошкысал соос дорысь:
уго ваньзы соос азыса-калгыса улӥсьёс,
кескич муртъёслэн уллёзы.
3«Кылзэс пукыӵез кадь ӧрекчаськон понна золто,
ӧрекчаськыса музъем вылын кужым басьто;
одӥгысьтыз урод уж бордысь мукетаз выжо,
Монэ уг тодо», – шуэ Кузё-Инмар.
4«Котькудды ас эштылэсь утиське,
одӥгезлы но агай-вындылы эн оске,
уго котькудӥз агай-вын мукетызлы канжаськон пуктэ,
ваньзы ог-огзы вылэ кыл нуллыса ветло.
5Котькудӥз ас эшсэ пӧя, зэмлыкез уг верало:
асьсэлэсь кылзэс ӧрекчаськыны дышетӥзы,
жадьытозязы кескич ужъёс лэсьто.
6Кескичлык пӧлын тон улӥськод;
кескич сямо луэменызы,
соос Монэ тодонлэсь куштӥсько», – шуэ Кузё-Инмар.
7Соин ик тазьы шуэ Саваоф Кузё-Инмар:
«Тани, Мон ӵыжатыса соосты эскеро;
уго, мукет ласянь, мар кароно Аслам калыкелэн нылыныз?
8Соослэн кылзы – виылӥсь ньӧл,
ымысьтызы кескич кылъёс пото;
матысьёсынызы небыт кылын верасько,
нош сюлмазы соослы сьӧлтэт дасяло.
9Оло нош со понна Мон соосты вӧсь уг кары-а? – шуэ Кузё-Инмар. –
Та выллем калыклы Мон пунэмзэ уг берыкты-а?»
10Гурезьёс понна куараен зар бӧрдэ,
кыр музъемысь пудо возьман интыос понна викышъяса бӧрдэ,
малы ке шуоно соос сутӥськыса быремын,
соин ик отӥ нокин но уг ортчылы,
ыжъёслэн но бӧксэмзы уг кылӥськы;
ин тылобурдоос бордысен кутскыса пудо-живот дорозь –
ваньзы пазьгиськизы, кошкизы.
11«Иерусалимез из люклы, шакалъёслы улон интылы пӧрмыто,
Иудеяысь городъёсты кыр дунне каро, улӥсьёстэк кельто».
12Вань-а тае валась визьлыко мурт? Кузё-Инмарлэн ымыз кинлы вера – мед валэктысал, мар понна кун-страна куашказ, ӵушкамын, луоё кырлы укшась луиз, со вылтӥ нокин но ветлӥсь ӧвӧл ни?
13Кузё-Инмар шуиз: «Мынэсьтым соос понна пуктэм законме кулэтэм каремзы, Мынэсьтым верамме кылзӥськымтэзы, соя улымтэзы понна тазьы луиз;14нош сюлэмзы вог луэмен, атайёссылэн дышетэмзыя Вааллэн сюрес кузяз ветлӥзы».15Соин ик тазьы шуэ Израильлэн Инмарез Саваоф Кузё-Инмар: «Та калыкез Мон курытпотэн сюдо, сэпен сурам вуэн сектало;16мурт калыкъёс пӧлы соосты пазяло, кудъёссэ асьсэос но, атайёссы но уг тодо вал, соосты быдтытозямлы пытьы кузязы меч ысто».
17Тазьы шуэ Саваоф Кузё-Инмар: «Малпаське, кулэм мурт дорын бӧрдыса кылбурасьёсты чортэ, та удысысь усточиосты ӧтьыны лэзе, ваньзы мед лыктозы».18Ӝоггес лыктыса, ми понна бӧрдыны мед кутскозы, – милям синмысьтымы синкыли мед кисьтӥськоз, синлысъёсысьтымы ву мед виялоз.
19Уго Сӥонысь бӧрдэм куара кылӥське:
«Милемыз номыртэк кельтӥзы!
Ми туж возьытэ вуттэмын,
улон интыосмес куашкатӥзы бере,
музъеммес куштыса кельтӥськомы ни».
20Озьыен, кышномуртъёс, Кузё-Инмарлэсь верамзэ кылзӥське;
Солэн ымысьтыз потэм кылъёсты пеляды понэ;
нылъёстэс бӧрдыны дышетэ, огдэс огды бӧрдон гуръёслы нодъялэ.
21«Укноосмы пыр кулон пыре,
улон юртъёсамы со чуртнаське
ульчаосысь нылпиосты, падвожъёсысь егит пиосты быдтон понна».
22Соослы шу: «Тазьы шуэ Кузё-Инмар:
”Адямиослэн шӧйёссы бусыысь кыед выллем,
арасьлэн мышкысьтыз культоос музэн куямын луозы, –
соосты октӥсь-калтӥсь уз луы”».
23Тазьы шуэ Кузё-Инмар:
«Визьнодо мурт аслаз визьмыныз медаз ушъяськы,
кужмо мурт аслаз кужмыныз медаз ушъяськы,
узыр мурт аслаз узырлыкеныз медаз ушъяськы.
24Нош ушъяськись мурт мед ушъяськоз Монэ тодэменыз, валаменыз,
Мон – Кузё-Инмар, музъем вылын гажан-жалян возьматӥсь,
зэмлыко, шонерлыко суд лэсьтӥсь луисько шуыса:
та гинэ Мыным ярамон уго», – шуэ Кузё-Инмар.
25«Тани, вуо нуналъёс, – шуэ Кузё-Инмар, – куке Мон вань вандӥськемъёс но, вандӥськымтэос доры но вуыло:26Египетэ но Иудеяе, Едоме но Аммон пиос доры, Моаве, йырвекчиысьтызы йырсизэс ӵышкисьёс доры, луоё кырын улӥсьёс доры: уго ваньзы та калыкъёс вандӥськон сямез ортчытымтэос, нош быдэс Израиль юрт – вандӥськымтэ сюлэмо».
Глава 9