Выбрать язык
Книги Ветхого Завета
Книги Нового Завета
с русским текстом1Израиль юрт, кылзэлэ Кузё-Инмарлэсь тӥледлы верам кылзэ.
2Тазьы шуэ Кузё-Инмар: «Язычникъёслэн сюрессылы эн дышетске,
инлэн паймымон тодметъёсызлэсь эн кышкатске,
соослэсь язычникъёс куалекъяло.
3Уго язычникъёслэн осконъёссы – тырттэм уж:
нюлэскысь писпуэз погырто,
лэсьтӥськисьлэн киыз тӥрен вӧлэ-лусъе сое,
4азвесен, зарниен шобырто,
медаз выры шуыса, кортӵоген, молотэн юнмато.
5Соос – бакча сульдэр кадесь, уг но верасько;
соосты ӝутыса нулло, малы ке шуоно ветлыны уг быгато.
Соослэсь эн кышкалэ, соос уродзэ лэсьтыны уг быгато,
ӟечлык лэсьтыны но кужымзы ӧвӧл».
6Кузё-Инмаре, Тыныд укшасез ӧвӧл!
Тон быдӟым, Тынад нимыдлэн кужымез но мертантэм быдӟым.
7Калыкъёслэн Эксэйзы, кин Тынэсьтыд уз кышка?
Тынад огнадлэн киулад та ваньмыз,
малы ке шуоно вань калыкъёс пӧлын, вань эксэйлыкъёсын но
Тон кадь визьнодоез ӧвӧл.
8Одӥгтэм ваньзы соос чик кулэтэмесь, укылтэмесь:
номыр сётӥсьтэм дышетон – со писпуослы йыбыртъян.
9Листъёслы вандылэм азвесь Фарсисысь ваемын, зарни – Уфазысь,
суредась но ӵыжатӥсь-дурись та бордын ужазы;
соос вылэ чагыр, нап-горд буёло дӥськут дӥсяло:
ваньзэ тае кибашлы адямиос лэсьтӥзы.
10Нош Инмар Кузё-Инмар – со зэмлык;
Со – Улэп Инмар, пумтэм вапумъёслы Эксэй.
Со вожзэ поттэ ке, музъем зурка,
Солэсь вожпотонзэ калыкъёс чиданы уг быгато.
11Тазьы соослы шуэ:
инэз но музъемез кылдытӥсьтэм инмаръёс
музъем вылысь, инъёс улысь ышозы-бырозы.
12Со музъемез Аслаз кужыменыз кылдытӥз,
дунне вылэз Аслаз визь-нодэныз юнматӥз,
инъёсты Аслаз тодон-валанэныз вӧлдӥз.
13Со куаразэ поттэ но, инъёсын вуос шаугето,
музъемлэн пумъёсысьтыз Со пилемъёсты ӝутэ:
зор пӧлын чилекъянъёс кылдытэ,
аслаз шыкысъёсысьтыз тӧлэз поттэ.
14Адями ас тодэменыз улыса, укылтэм уж лэсьтэ,
дуриськись аслаз кисьтэм сульдэреныз ассэ возьытэ вуттэ,
уго солэн ӵыжатыса лэсьтэм идолэз – со пӧяськон,
со пушкын дух ӧвӧл.
15Со – чылкак кулэтэм маке, йыромонлэн ужез,
суд нуналэ со сульдэръёс ышозы-бырозы.
16Иаковлэн улон азез-адӟонэз язычникъёслэн кадь ӧвӧл;
уго солэн Инмарез – ваньзэ Кылдытӥсь Инмар,
Израиль но солэн люкет басьтонэзлэн кивалтэт бодыез луэ;
Солэн нимыз – Саваоф Кузё-Инмар.
17Музъем вылысь ваньбурдэ окты,
котыртэм пушкын ватӥськыса пукись;
18тазьы шуэ Кузё-Инмар:
«Та музъем вылын улӥсьёсты та радаз ыргыто но
ёркыт интые улляса пырто – соосты мед киултозы».
19Эй, мискинь, каръян лулы!
Курадӟытэ монэ ярае, но мон аслым ачим шуисько:
«Зэм ик, та мынам курадӟонэ, но мон сое чиданы кулэ;
20тылысэ мынам таркамын, вань гозыосы чигтылэмын;
нылпиосы мон дорысь кошкизы, соос ӧвӧл ни;
нокинлы ни тылысме пуктыны,
шобретъёсме но ошылӥсьёсы ӧвӧл ни:
21уллё возьмасьёс валасьтэмесь луизы, Кузё-Инмарез ӧз ни утчалэ,
соин ик соос сэрен улонзылэн азинлыкез ӧз ни луы –
вань уллёзы пазьгиськиз».
22Вераськон ветлэ: «Тани, уйпал шаерысь кужмо куара кылӥське, –
Иудеяысь городъёсты кыр дуннелы, шакалъёслы улон интылы
пӧрмытыны тушмон лыктэ».
23Тодӥсько, Кузё-Инмаре, адямилэн улон сюресэз ас киулаз ӧвӧл,
мынӥсьлэн но вамышъянэз ас тодэмъяз ӧвӧл.
24Монэ покчи каронтэм понна, Кузё-Инмаре,
шонер законэдъя монэ вӧсь кар,
вожед потон дыръя вӧсь эн кары.
25Аслэсьтыд йыркурдэ Тонэ тодӥсьтэм калыкъёс вылэ кисьты;
Тынад нимыдлы вазиськисьтэм калык выжыос вылэ кисьты;
уго соос Иаковез сиизы, ньылӥзы, быдтӥзы сое,
улон интызэ но солэсь тырттэм кельтӥзы.
Глава 10