Выбрать язык
Книги Ветхого Завета
Книги Нового Завета
с русским текстом1Пасхор, Еммерлэн пиез, священник, со ик Кузё-Инмарлэн храмаз чакласа-эскерыса улӥсьёслэн йырзы, Иеремиялэсь азьпалзэ тодытыса верам кылъёссэ кылэм бераз2Пасхор Иеремия пророкез мыжгиз но Кузё-Инмарлэн храм вӧзысьтыз Вениаминлэн вылысь капка дораз сылӥсь сьӧлтэтэ пуктӥз.3Нош мукетаз нуналэ Пасхор Иеремияез сьӧлтэтысь мозмытӥз, соку Иеремия солы шуиз: «Кузё-Инмар тыныд Пасхор*а ним ӧз сёты, Магор Миссавив*б ним сётӥз.4Уго тазьы шуэ Кузё-Инмар: ”Тани, Мон тонэ аслэсьтыд ачид кышкась каро, вань эшъёсыд но тынэсьтыд кышкалозы, тушмонъёссылэн тӥр-пурт улазы соос бырозы, нош тон тае ас синмыныд адӟод. Быдэс Иудеяез Вавилон эксэйлэн киулаз сёто, соосты со эксэй Вавилонэ нуоз но мечен погыртоз.5Та городлэсь вань узырлыксэ, вань люкамзэ, вань дуно тӥрлыксэ, Иудей эксэйёслэсь вань байлыксэс тушмонъёссылэн киязы сёто но, соосты качалозы-таркалозы, кутозы но Вавилонэ келялозы.6Тон но, Пасхор, озьы ик тынад вань семьяед, пленэ мыноды; Вавилонэ вуод но отчы кулод, отчы тонэ ватозы; тон но, тынад ӧрекчаськыса азьланьзэ тодытэм эшъёсыд но отчы кулозы, ватозы”».
7Кузё-Инмаре, Тон монэ нуид, – мон мынӥ;
Тон мынэсьтым кужмогес, Тон монэ вормид,
нуналлы быдэ монэ серекъяло-верало, ваньмыз монэ сантэма.
8Уго, вераны гинэ кутскисько – эриктэман сярысь кесяськисько,
таркан-куашкан сярысь бӧрдыса черекъясько,
малы ке шуоно Кузё-Инмарлэсь кылъёссэ тодытэме понна
ултӥян-веранлы, нуналлы быдэ серекъян-веранлы пӧрми.
9Мон малпай: «Кузё-Инмар сярысь уг ни тодыты,
Солэн нимыныз уг ни вераськы»;
но мынам сюлэмам, лыосы пушкын ӝуась тыл кадь макеез вал,
мон каньсырай, сое кутыса возьыса, но – ӧй быгаты.
10Уго мон тросэзлэсь супыльтэмзэс кылӥ, котырак шимес улон;
«Вазиське, – соос шуылӥзы, – ми ивортомы».
Ваньмыз, монэн тупаса улэмъёс, монэ чакласа уло: уг-а канжаськы?
«Оло нош со сюроз но, ми сое вормомы,
солы пунэмзэ берыктомы», – соос шуо.
11Нош Кузё-Инмар монэн огазьын, Со кужмо ожмаськись кадь,
соин ик мон сьӧрын уйиськисьёс канжаськозы но уз ворме,
зол возьытэ вуттэмын луозы, малы ке шуоно визьмо ӧз улэ;
возьытэ вуонзы пумтэм вапумъёс ӵожелы луоз, ноку но уз вуны.
12Ин кужымъёслэн Кузё-Инмарзы!
Тон шонер улӥсез чакласькод-эскериськод,
пушсэ-ерзэ, сюлэмзэ адӟиськод.
Соослы Тынэсьтыд пунэм берыктэмдэ мед адӟом вал,
уго мон аслэсьтым ужме Тыныд оски.
13Кузё-Инмарлы кырӟалэ, Кузё-Инмарез ушъялэ,
уго Со куанерлэсь лулзэ сьӧсь муртъёслэн киулысьтызы утёз. –
14Каргамын мынам вордскем нуналы;
монэ анаелэн вордскытэм нуналыз бакель каремын медаз луы!
15Каргамын атаелы ивор вайыса тазьы шуэм мурт:
«Тынад пиед вордскиз», кудӥз понна атае туж шумпотӥз.
16Кузё-Инмарлэн жалятэк куашкатэм городъёсызлы кадь
со адямилы мед луоз;
ӵукна со вузэмез мед кылоз,
нуназе шорын викышъяса бӧрдэмез мед кылоз, –
17монэ анай пушкысен виымтэез понна;
анай пушкысен ик монэ виысал ке,
анае мыным шайпул луысал,
солэн пушказ мон пырак ӵоже нуны куен кыльысал.
18Мар понна мон анаелэн пушкысьтыз потӥ –
ужаны но куректон-кайгу пӧлын улыны-а,
улоно нуналъёсме сӥтэм-сантэман пӧлын ортчытъяны-а?
*а 20:3 Пасхор – «котырак тупаса улон» шуэм луэ
*б 20:3 Магор Миссавив – «котырак шимес улон» шуэм луэ
Глава 20