Выбрать язык
Книги Ветхого Завета
Книги Нового Завета
с русским текстом1Седекия эксэй Иеремия доры Молхиинлэсь Пасхор пизэ но Маасея священниклэсь Софония пизэ солы вераны ыстэм дыръя Кузё-Инмар дорысь Иеремиялы верамын вал.2Ыстэм муртъёс шуизы: «Ми понна Кузё-Инмарлэсь юа, уго Навуходоносор, Вавилонлэн эксэез, милемлы пумит ожмаське; оло нош Кузё-Инмар милемлы кыӵе ке но паймымон уж лэсьтоз но, соку тушмон ми дорысь чигналоз».
3Соослы Иеремия шуиз: «Тазьы шуэ Седекиялы:4”Тазьы шуэ Израильлэн Инмарез Кузё-Инмар: тани, Мон киосысьтыды ыбылӥськон макеостэс берлань берыкто, кудъёсыныз тӥ Вавилон эксэйлы, халдейёслы пумит ожмаськиськоды, кудъёсыз тӥледыз борддорлэн палэназ ӝикатыса возё; соосты та городлэн шораз люкало;5Ачим ӝутэм киыным, кужмо суйбыгытэным, йыркурен, вожме поттыса, туж зол лекъяськыса, тӥледлы пумит ожмасько;6та городын улӥсьёсты погырто – адямиосты но, пудоосты но; туж зол висись яралы чидатэк, соос кулозы”.7”Нош собере, – шуэ Кузё-Инмар, – Иудеялэсь Седекия эксэйзэ, солэсь медооссэ, калыксэ, та городэ сьӧдчер, меч, сютэм улон бере кылемъёсты, Вавилонлэн Навуходоносор эксэезлэн киулаз сёто, тушмонъёссылэн киулазы, лулзэс утчасьёслэн киулазы сёто; соосты со лэчыт мечен погыртоз, уз жаля, быдэс уз кельты”.
8Та калыклы вера: ”Тазьы шуэ Кузё-Инмар: тани Мон тӥледлы ӵектӥсько улон сюрес но кулон сюрес:9кин та городэ кылёз, со меч улын, сютэм улыса, сьӧдчерен висьыса кулоз, нош кин ке потӥз но тӥледыз котыртыса-ёртыса возись халдейёс кие сётӥськиз ке, со улэп кылёз, солэн лулыз киултэм узырлык интыын луоз.10Аслэсьтым ымнырме Мон та городлы пумит берыктӥ, – шуэ Кузё-Инмар, – уродзэ лэсьтыны, ӟечсэ лэсьтыны ӧвӧл; со Вавилон эксэйлэн киулаз сётэмын луоз, нош соиз тылын сутоз сое”.
11Иудей эксэйлэн юртэзлы шу: ”Кузё-Инмарлэсь верамзэ кылзэ:
12Давидлэн юртэз! Кузё-Инмар тазьы шуэ:
вазь ӵукнаысен ик шонер суд лэсьтыса улэ,
ултӥям муртэ ултӥясь муртлэн киызлэсь уте –
тӥляд уродэсь ужъёсыныды сэрен
Мынам вожпотонэ тыл кадь медаз поты,
кысыны быгатонтэм медаз кенжы.
13Тани, Мон – тыныд пумит,
нёжалын улӥсь, ӵошкыт интыысь изгурезь, – шуэ Кузё-Инмар, –
тӥледлы пумит, ”Кин милемлы пумит мыноз,
кин милям улон интыямы пырыны быгатоз?” шуисьёслы пумит.
14Ужъёстылэн емышезъя Мон тӥледыз корало, – шуэ Кузё-Инмар, –
нюлэскады тыл поныса ӝуато но,
солэсь котырзэ быдэсак тыл ньылоз”».
Глава 21