Выбрать язык
Книги Ветхого Завета
Книги Нового Завета
с русским текстом1Тазьы шуиз Кузё-Инмар: «Иудей эксэйлэн корказ пыр но та кылэз вера,2шу: ”Иудей эксэй, Давидлэн престол вылаз пукись, – тон но, тынад медоосыд но, тынад калыкед но, та капкатӥ пырасьёс, Кузё-Инмарлэсь верамзэ кылзы”».3Тазьы шуэ Кузё-Инмар: «Шонер, зэмлыко судить каре, ёртыса возисьлэн киулысьтыз ултӥям муртэ мозмытэ, лыктэм муртэ, анайтэм-атайтэм нылпиез, палкышноез ёртыса-ӝикатыса эн возе, та интыын янгыштэм-сьӧлыктэм вирез эн кисьтэ.4Та кылэз быдэсъяса улӥды ке, соку та юртлэн капка пыртӥз пырылозы Давидлэн престол вылаз пукись эксэйёс, ожмаськон уробо вылын ветлӥсьёс, валъёс вылын ветлӥсьёс, – асьсэос но, медооссы но, соослэн калыксы но.5Нош та кылъёсты ӧд ке кылзэ, кыл сётӥсько: та юртэз тырттэм кельто», – шуэ Кузё-Инмар.
6Кузё-Инмар Иудей эксэйлэн юртэзлы тазьы шуэ:
«Тон мон понна Галаад, Ливанлэн гурезь йылыз,
озьы ке но Мон тонэ луоё кырлы пӧрмыто,
городъёсад улӥсьёсыз уз луэ.
7Тонэ быдтӥсьёсты дасяло, котькудзэ аслаз тӥр-пуртэныз султыто – самой веськрес кедырпуостэ коралозы но тыл пӧлы куштозы.
8Трос калыкъёс та город пыр ортчозы но ог-огзылы шуылозы: ”Мар понна Кузё-Инмар тазьы кариз та быдӟым городэз?”
9Ответ сётыса шуозы: ”Со понна: Инмарзылэсь Кузё-Инмарлэсь сӥзён-косонзэ палэнтӥзы но мукет инмаръёслы йыбыртъязы, соослы ужазы-тыршизы”».
10Кулэм мурт пумысен эн бӧрдэ, сое эн жалялэ;
нош юнгес бӧрдэ пленэ кошкись понна,
уго со уз ни берытскы, вордскем шаерзэ но уз ни адӟы.
11Уго тазьы шуэ Кузё-Инмар Иосиялэн Саллум пиез Иудей эксэй сярысь, кудӥз аслаз атаез, Иосия, бере эксэйын пукиз: «Саллум, та интыысь потыса, та интые берен уз ни берытскы,12пленэ кутыса нуэм интые со кулоз, та музъемез ноку но уз ни адӟы.
13Куректон-кайгу аслэсьтыз корказэ ӧрекчаськыса пуктӥсь муртлы,
четлыкъёссэ законлы пумит улон пыр лэсьтӥсьлы,
кин аслэсьтыз матысьсэ дунтэк ужатэ, солы уждунзэ уг сёты,
14кин шуэ: ”Аслым вӧл-вӧл корка пукто,
паськытэсь комнатаос лэсьто”, –
укноос ӵоге, кедырпуэн вӧлдэтсэ шукке но горд буёлэн буя.
15Кедырпулэсь юртъёс пуктӥськод ке, соин-а астэ эксэй шуиськод?
Тынад атаед сииз, юиз, шонер судить карылӥз,
соин ик солы умой вал.
16Куанерлэсь, кураськисьлэсь ужзэ со шонер эскериз,
соин ик солы ӟеч вал.
Та уг-а возьматы Монэ тодонэз? – шуэ Кузё-Инмар.
17Нош тынад синъёсыд, сюлэмыд ваньбур люкан пала,
янгыштэм вирез кисьтон, ёртыса, эриктэмаса ужъёс лэсьтон пала
берытскемын».
18Соин ик Иудей эксэй сярысь, Иосиялэн Иоаким пиез сярысь, Кузё-Инмар тазьы шуэ:
«”Эй, мынам, братэ!”, ”Эй, сузэре!” шуыса
со понна адямиос уз бӧрдэ;
”Эй, кузё-эксэй!”, ”Эй, солэн быдӟымлыкез!” шуыса но
адямиос уз бӧрдэ.
19Кулэм ишакез кадь сое ватозы:
поттозы но Иерусалимлэн капка сьӧраз кыдёке сэрпалтыса лэзёзы.
20Ливанэ тубыса кесяськы, Васанысен но куарадэ будэты,
Аваримысен но черекъя, тынад вань эшъёсыд сузмытэмын ук.
21Тынад майбыр улон дыръёсад Мон тыныд вералляй,
нош тон шуид: ”Уг кылзӥськы”.
Пичи дырысеныд тон озьы астэ возид,
Мынэсьтым верамме ӧд кылзӥськылы.
22Тынэсьтыд ваньзэ уллё возьмасьёстэ тӧл нуоз,
эшъёсыд пленэ мынозы,
соку тон вань сьӧсь ужъёсыд понна
возьытэ вуттэмын луод, сантэмамын луод.
23Ливанын улӥсь, кедырпуос йылэ кар лэсьтӥсь!
Кыӵе куанер тон адӟиськод,
кышномуртлэн нылпи вайыкуз вӧсь луэмез кадь
тон доры курадӟонъёс вуизы ке!
24Улӥсько Мон, – шуиз Кузё-Инмар, – Иоакимлэн пиез Иехония, Иудеялэн эксэез, Мынам бур киысьтым зундэсэ ке но луысалыд, отысь но Мон тонэ ишкалтысал.25Тынэсьтыд лулдэ утчасьёслэн, кышкано муртъёсыдлэн киязы сёто, Вавилон эксэйлэн Навуходоносорлэн киулаз, халдей калыклэн киулаз сёто,26тонэ, тынэсьтыд вордэм анайдэ но мурт шаере, кытын тӥ ӧд вордске, отчы кушто, отчы ик кулоды;27нош лулдылэн берытскем потон музъемаз уд берытске».28Куштӥськем, синазькыль карон понна кылдытэм адями-а со Иехония? Яке со – ярантэм сосуд? Мар понна соос куштэмын – со но, солэн выжыез но тодмотэм шаере куштэмын?
29Э, музъем, музъем, музъем!
Кузё-Инмарлэсь верам кылзэ кылзӥськы.
30Тазьы шуэ Кузё-Инмар:
«Та адями сярысь гожтэ, со нылпитэк кельтэмын,
уродлык пӧлы улыны кылемын шуыса,
малы ке шуоно солэн выжыысьтыз нокин но
Давидлэн престол вылаз уз ни пукы,
Иудеяын уз ни кузёяськы».
Глава 22