Выбрать язык
Книги Ветхого Завета
Книги Нового Завета
с русским текстом1«Уллёысьтым ыжъёсты быдтӥсь, пазясь ыж возьмасьёслы куректон-кайгу», – шуэ Кузё-Инмар.2Соин ик тазьы шуэ Израильлэн Инмарез Кузё-Инмар Ас калыксэ возьмасьёслы: «Тӥ пазьгиды Мынэсьтым ыжъёсме, улляды, ӧд учке соосты; тани, лек ужъёсты понна Мон тӥледыз вӧсь каро, – шуэ Кузё-Инмар. –3Улляса лэзем уллёелэсь кылем люкетсэ вань шаеръёсысь огазе люкало, асьсэлэн гидкуаосазы соосты берыкто, йылозы, трос луозы.4Соослы возьмасьёсты пукто, соосты возьмалозы, соос уз ни кышкалэ, уз ни курдалэ, уз но ышылэ ни, – шуэ Кузё-Инмар.
5Тани, вуо нуналъёс, – шуэ Кузё-Инмар, –
Давид юртысь шонерлыко Пушъетэз будэто,
Со Эксэй луоз, ваньзэ визьмын лэсьтоз,
музъем вылэз шонерлыко судить кароз.
6Солэн нуналъёсаз Иуда утиськоз, Израиль кышкатэк улоз;
Сое тазьы нималозы: ”Кузё-Инмар – милям шонере потонмы!”
7Соин ик, тани, вуо нуналъёс, – шуэ Кузё-Инмар, – куке уз ни шуэ: ”Израиль пиосты Египет музъемысь поттӥсь Кузё-Инмар понна”.
8Но: ”Кузё-Инмар понна! Со Израиль юртлэсь выжызэ уйпалась, улляса лэзем вань музъемъёсысь вайиз”; табере соос ас музъемазы улозы».
9Пророкъёс сярысь.
Сюлмы пушкам чигиське, вань лыосы куалекъяло,
мон – кудӟем мурт кадь, винаен погыртэм адями кадь,
Кузё-Инмар понна, Солэн святой кылъёсыз понна.
10Малы ке шуоно музъем выл азыса улӥсьёсын пачылмемын;
каргаськон-юриськон трос луэмен, музъем бӧрдэ;
кыр дуннеысь пудо возьман интыос куасьмизы,
соос уродлык лэсьтыны тыршо, ӧрекчаськонын – кужмоесь.
11«Пророк но, священник но – чеберъяськисьёс;
Аслам храмысьтым но Мон сьӧлыклэсь кышкатэк улонэз шедьтӥ, –
шуэ Кузё-Инмар. –
12Со понна ик соослэн сюрессы
пеймыт азьысь волег инты кадь луоз:
соосты донгозы – соос отчы усёзы;
соос вылэ шугадӟон лэзё, вӧсь карон дырзы вуэ, – шуэ Кузё-Инмар. –
13Самарияысь пророкъёслэсь но визьтэмъяськонзэс адӟи:
Вааллэн нимыныз соос азьпалзэ тодытыса вераллязы –
Мынэсьтым Израиль калыкме йыромытӥзы.
14Нош Иерусалимысь пророкъёс пӧлысь эшшо но шимессэ адӟисько:
соос азыса уло, ӧрекчаськыса ветло,
урод муртъёслы сьӧсь ужъёссэс лэсьтыны юртто,
аслаз сьӧлыко ужезлэсь нокин но медаз палэнскы шуыса;
Мон азьын ваньзы соос Содом кадесь,
отын улӥсьёсыз – Гоморра кадесь».
15Соин ик Саваоф Кузё-Инмар пророкъёс сярысь тазьы шуэ:
«Тани, Мон соосты курытпотэн сюдо, сэпен сурам вуэн сектало,
уго Иерусалимысь пророкъёс бордысен кутскыса
сьӧлыко уж быдэс музъем вылэ вӧлмиз».
16Тазьы шуэ Саваоф Кузё-Инмар:
«Пророкъёслэсь тӥледлы азьпалзэ тодытыса верамзэс эн кылзӥське:
соос тӥледыз пӧяло, ас сюлэмзылэсь малпанъёссэс соос верало,
Кузё-Инмарлэн ымысьтыз потэм кылэз уг верало.
17Монэ кулэтэм карисьёслы соос ялан верало:
”Кузё-Инмар шуиз: тӥ дорын каньыллык луоз”.
Ваньмызлы ас сюлмынызы вогъяськыса улӥсьёслы шуо:
”Тӥ доры шугадӟон уз лыкты”».
18Кин Кузё-Инмарлэн кенешаз сылӥз,
адӟиз но кылӥз Солэсь верамзэ?
Кин Сое сак кылзӥз но Солэсь верамзэ санэ понӥз?
19Тани, Кузё-Инмарлэн бадӟым вожпотонэн сильтӧлэз лыктэ,
лек сильтӧл, сьӧлыклэсь кышкасьтэмъёслэн йыр вылазы со усёз.
20Кузё-Инмарлэн вожпотонэз уз быры,
Ас сюлмызлэсь малпанъёссэ быдэстытозь, лэсьтытозь;
вуоно нуналъёсы тае тӥ ӟеч валалоды.
21«Та пророкъёсты Мон ӧй ыстылы, соос асьсэос бызьыса мынӥзы;
Мон соослы ӧй вера, нош соос асьсэос азьпалзэ тодытыса вераллязы.
22Соос Мынам кенешам сылысалзы ке,
соос калыкелы Мынэсьтым кылъёсме ялысалзы,
соосты урод сюрес вылысь палэнтысалзы,
урод ужъёссылэсь утьысалзы.
23Мон – матысь ёросъёслы гинэ-а Инмар, – шуэ Кузё-Инмар, –
быдэс дуннелы Инмар ӧвӧл шат?
24Быгатэ-а адями лушкем, Мыным адӟыны луонтэм интые
ватӥськыны? – шуэ Кузё-Инмар. –
Инмын но, музъем вылын но – котькытын но Мон ӧвӧл шат? –
шуэ Кузё-Инмар. –
25Мон кылӥ, мар верало Мынам нимыным ӧрекчаськыса азьпалзэ тодытӥсь пророкъёс. Соос шуо: ”Мыным уйвӧтын возьматскиз”, ”Мон уйвӧт адӟи”.26Кема на-а та улоз пророкъёслэн сюлмазы: ӧрекчаськыса азьпалзэ тодытыса веранъёс, ас сюлмынызы ӧрекчаськыса тодытыса веранъёс?27Ог-огзылы уйвӧтъёссэс вераса, Мынэсьтым калыкме Мынэсьтым нимме вунэтытонэ вуттыны малпало-а, кызьы соослэн атайёссы Ваалэн сэрен Мынэсьтым нимме вунэтӥзы?28Уйвӧт адӟись пророк сое уйвӧт шуыса мед вералоз, нош кинлы Мынам кылы сётэмын, со Мынэсьтым кылме шонер мед вералоз.
Тӧлберлэн но чылкытатэм юлэн
мар огкадез вань? – шуэ Кузё-Инмар.
29Мынам кылы тыллы, изгурезез пыргытӥсь молотлы
уг укша-а? – шуэ Кузё-Инмар.
30Со понна ик, тани, Мон –
ог-огзылэсь Мынэсьтым кылъёсме лушкась пророкъёслы пумит
султӥсько, – шуэ Кузё-Инмар.
31Тани, ас тодэмзыя, ”та Инмарлэн кылъёсыз” шуыса
ӧрекчаськыса верась пророкъёслы пумит султӥсько, –
шуэ Кузё-Инмар.
32Тани, ӧрекчи уйвӧт верась пророкъёслы Мон пумит, – шуэ Кузё-Инмар, – уйвӧтъёс вераса, соос калыкме ӧрекчаськыса, визьзэс тугаса йыромыто, – Мон соосты та понна ӧй ыстылы ук, таӵе ужъёс лэсьтыны ӧй косылы, та калыклы соос нокыӵе но пайда уг ваё, – шуэ Кузё-Инмар.
33Та калык яке пророк, яке священник тынэсьтыд юазы ке: ”Кузё-Инмар дорысь кыӵе секыт адӟон”, тон шу: ”Кыӵе секыт адӟон? Мон тӥледыз куштыса кельто, – шуэ Кузё-Инмар”.34Нош пророк яке священник, яке калык шуизы ке: ”Кузё-Инмар дорысь секыт адӟон”, сыӵе адямиосты, соослэсь семьяоссэс но Мон вӧсь каро.35Огдылы огды, выныз вынызлы тазьы шуэ: ”Кузё-Инмар та пумысен кыӵе ответ сётӥз?” яке ”Кузё-Инмар мар шуиз?”36Нош та кылэз: ”Кузё-Инмар дорысь секыт адӟон” – азьланяз кылады-ымады эн ни понэ: уго таӵе адямилы аслаз кылъёсыз секыт адӟон луоз, малы ке шуоно Инмармылэсь Саваоф Кузё-Инмарлэсь, улэп Инмарлэсь, кылзэ тӥ мыдланьтӥськоды.37Пророклы тазьы шу: ”Кузё-Инмар та пумысен тыныд кыӵе ответ сётӥз?” яке ”Кузё-Инмар мар шуиз?”38Нош тӥ эшшо верады на ке: ”Кузё-Инмар дорысь секыт адӟон”, соку Кузё-Инмар шуэ: ”Та кылэз ”Кузё-Инмар дорысь секыт адӟон” шуэмды понна Мон тӥледлы вераны ыстӥ ке но вал: ”Эн вералэ: ”Кузё-Инмар дорысь секыт адӟон”, –39со понна, тани, Мон тӥледыз чылкак вунэто, кулэтэм каро, тӥледлы, тӥляд атайёстылы сётэм та городэз но Аслам син азьысьтым палэнто.40Но пырак дауръёс ӵоже возьдаськыса, сӥтэм-сантэм улыны кельто, ялан озьы луоз».
Глава 23