Выбрать язык
Книги Ветхого Завета
Книги Нового Завета
с русским текстом1Иудей эксэйлэн, Иосиялэн пиезлэн Иоакимлэн, кивалтонэзлэн ньылетӥ араз, Вавилон эксэйлэн Навуходоносорлэн кивалтонэзлэн нырысетӥ араз вань иудей калык сярысь Иеремиялы верамын кыл.2Сое Иеремия пророк быдэс иудей калыклы, Иерусалимын ваньмызлы улӥсьёслы вераз, со шуиз:3«Иудеялэн эксэезлэн Амон пилэн Иосиялэн дас куинь арзэ кивалтонэз бордысен кутскыса туннэ нуналозь, тани, кызь куинь ар тырме ини, кызьы Кузё-Инмар дорысь мыным верамын вал, нош мон тӥледлы вазь ӵукна ик кутскыса вералляй – тӥ ӧд кылзӥське.4Кузё-Инмар тӥ доры Аслэсьтыз вань ляльчиоссэ, пророкъёсты, ыстылӥз, вазь ӵукнаысен ик ыстылӥз, нош тӥ ӧд кылзӥське, кылзӥськыны пельдэс ӧд мыкыртэлэ.5Тӥледлы шуылӥзы: ”Ваньды урод сюрес вылысь палэнске, лек ужъёстылэсь куштӥське, соку Кузё-Инмарлэн вапумъёсысь вапумъёсы тӥледлы но, тӥляд атайёстылы но сётэм музъем вылаз улоды;6мукет инмаръёслэн пытьы кузязы эн ветлэ соослы ужан понна, соослы йыбыртъян понна, асьтэ киостылэн ужъёсынызы Мынэсьтым вожме эн поттэ, соку тӥледлы уродзэ-лексэ уг лэсьты”.7Нош тӥ Монэ ӧд кылзӥське, – шуэ Кузё-Инмар, – асьтэлы уродлы, асьтэ киостылэн ужъёсынызы Мынэсьтым вожме поттылӥды.
8Соин ик тазьы шуэ Саваоф Кузё-Инмар: Мынэсьтым верамме кылзӥськымтэды понна,9тани, Мон ысто но уйпал выжыосты ваньзэс татчы ваё, – шуэ Кузё-Инмар, – Аслэсьтым ляльчиме, Вавилонлэсь эксэйзэ, Навуходоносорез, но та музъем вылэ ваё, солэн улӥсьёсыз вылэ, вань котыр калыкъёс вылэ; соосты чылкак быдто, соосты кышкатонлы, серекъян-веранлы пӧрмыто, пырак ӵожелы тырттэм кельто.10Со дорысь шумпотон куараез, шулдыръяськон куараез, эмеспи куараез, вылькен куараез, кикӧ куараез, лампадалэсь югытсэ быдто.11Быдэс та музъем кыр дуннелы, курдан-кӧшкеманлы пӧрмоз; та калыкъёс Вавилон эксэйлы сизьымдон ар ӵоже ужаса-тыршыса улозы.
12Тазьы луоз: сизьымдон ар тырмем бере Вавилон эксэез, со калыкез вӧсь каро, – шуэ Кузё-Инмар, – сьӧлыклэсь кышкатэк улэмзы понна Халдей музъемез но пырак дауръёс ӵожелы кыр дуннелы пӧрмыто.13Со музъем выллы Аслэсьтым вань веранъёсме, та книгае гожтэм Иеремиялэсь вань калыкъёс сярысь азьпалзэ тодытыса верамзэ быдэсто.14Лыдтэм трос калыкъёс, быдӟымесь эксэйёс соосты ляльчи карозы; ас киынызы лэсьтэм ужъёссыя, выросъёссыя Мон соослы пунэмзэ берыкто».
15Уго тазьы мыным шуиз Израильлэн Инмарез Кузё-Инмар: «Басьты киысьтым вожпотон винаен тырмытэм чашаез, со винаен вань калыкъёсты секта, кинъёс доры Мон тонэ ыстӥсько.16Сое юозы но шонаськыса ветлозы, соос вылэ Мынэсьтым ыстэм мечме адӟыса, визьтэммозы».17Кузё-Инмарлэн киысьтыз чашаез мон басьтӥ но вань калыкъёсты сектай, кинъёс доры монэ Кузё-Инмар ыстӥз:18Иерусалимез но иудей каръёсты, солэсь эксэйёссэ, кивалтӥсьёссэ таркан-пазян понна, соосты кӧшкематон макеослы, серекъян-веранлы, карганлы пӧрмытон понна, – со али ик адӟиське ини,19фараонэз, Египетлэсь эксэйзэ, солэсь медооссэ, кивалтӥсьёссэ, солэсь вань калыксэ но,20вань сураськем калыкез, Уц музъемысь вань эксэйёсты, Филистим музъемысь вань эксэйёсты, Аскалонэз но Газаез, Екронэз но Азотлэсь кылем люкетсэ,21Едомез но Моавез, Аммон пиосты,22Тирлэсь вань эксэйёссэ, Сӥдонлэсь вань эксэйёссэ, зарезь сьӧрысь шормуӵъёсысь эксэйёсты,23Деданэз но Фемаез, Бузэз, ваньзэс, йырвекчиысьтызы йырсизэс ӵышкисьёсты,24Аравиялэсь вань эксэйёссэ, луоё кырын улӥсь пӧртэм выжы калыкъёслэсь вань эксэйёссэс,25Зӥмвриялэсь вань эксэйёссэ, Еламлэсь вань эксэйёссэ, Мидиялэсь вань эксэйёссэ,26уйпалась вань эксэйёсты, ог-огзылы матысьёссэ но, кыдёкысьёссэ но, музъем вылысь, музъемлэн ымныр вылысьтыз вань эксэйлыкъёсты, нош Сесахлэн эксэез соос бӧрсьы юоз.
27«Соослы шу: ”Тазьы шуэ Израильлэн Инмарез Саваоф Кузё-Инмар: юэлэ но кудӟелэ, ӧскелэ но погралэ, Мынэсьтым тӥ вылэ лэзем мечме адӟиды ке, эн султэлэ”.28Юыны тынад киысьтыд чашаез басьтыны пумитъяськизы ке, соослы шу: ”Тазьы шуэ Саваоф Кузё-Инмар: тӥ одно ик юоды.29Уго тани, та город вылэ, кудӥз бордын Мынам нимы улэ, шугадӟонъёс лэзьяны Мон кутскисько; тӥ-а вӧсь карытэк кельтэмын луоды? Уд, вӧсь карытэк кельтэмын уд луэ, уго Мон музъем вылын вань улӥсьёс вылэ меч вайытӥсько, – шуэ Саваоф Кузё-Инмар”.
30Соин ик, азьпал адӟонзэс тодытыса,
вань та кылъёсты соослы вера но тазьы шу:
”Кузё-Инмар йылысен гудыртоз,
святыняезлэн улон интыысеныз куаразэ сётоз;
Аслаз город вылаз кышкыт гудыртоз;
вина нюртон гуын лёгаськисьёс кадь
музъем вылын ваньмыз улӥсьёс шоры Со кеськоз.
31Куашетэм куара музъемлэн пумозяз вуоз,
уго Кузё-Инмар калыкъёслэсь кылзэс юалоз,
котькыӵе лулмугорез Со судить кароз,
сьӧлыклэсь кышкасьтэмъёсты Со меч улэ сётоз, – шуэ Кузё-Инмар”».
32Тазьы шуэ Саваоф Кузё-Инмар:
«Тани, курадӟон калык дорысь калык доры мыноз,
музъемлэн пумъёсысьтыз кужмо тӧлпери ӝутскоз».
33Со нуналэ музъем пумысен музъем пумозь
Кузё-Инмарлэн погыртэм муртъёсыз кыллёзы,
соос понна бӧрдӥсь уз луы, октэмын-калтэмын, ватэмын уз луэ,
музъемлэн ымныр вылаз соос кыед интыын луозы.
34Викышъялэ, уллё возьмасьёс,
уллёослэн азьветлӥсьёссы, лулӟылӥське,
асьтэдыз тузонэн пызьналэ;
уго вандӥськон нуналъёсты, пазьгиськон дырды вуизы,
дуно сосуд кадь усёды.
35Уллё возьмасьёслы ватӥськон инты уз луы,
уллёлэн азьветӥсьёсызлы утиськон уз луы.
36Уллё возьмасьёслэн викышъямзы кылӥське,
уллёослэн азьветлӥсьёссылэн зар бӧрдэмзы пеле пыре,
уго Кузё-Инмар пудо возьман интызэс тырттэм кельтӥз.
37Кузё-Инмарлэн вожпотонэзлэн лекеныз быдтӥсько
шыпыт улӥсь гуртъёс.
38Лев музэн Со Аслэсьтыз улон интызэ кельтыса кошкиз;
Солэн ӝуатскем вожпотонэзлы,
таркась-туркасьлэн лек йыркурезлы луыса
соослэн музъемзы тырттэм кыр интылы пӧрмиз.
Глава 25