Выбрать язык
Книги Ветхого Завета
Книги Нового Завета
с русским текстом1Иудеяысь эксэйлэн, Иосиялэн пиезлэн Иоакимлэн, эксэе пуксён араз Кузё-Инмар дорысь таӵе кылъёс верамын вал:2«Тазьы шуэ Кузё-Инмар: Кузё-Инмарлэн юртэзлэн азбараз султыса, Иудеяысь вань городъёсысьтыз Кузё-Инмарлэн корказ йыбырттыны ветлӥсьёслы, тыныд вераны косэм кылъёсме вера; одӥг кылзэ но вератэк эн кельты.3Оло нош соос кылзӥськозы но асьсэлэн урод сюрес вылысьтызы кожозы, соку Мон лек ужъёссы понна соослы лэсьтыны малпам шугадӟонэз вошто.4Вера соослы: ”Тазьы шуэ Кузё-Инмар: тӥ Монэ ӧд ке кылзӥське, тӥледлы сётэм законэя ӧд ке улэ,5Мынам ляльчиосылэсь, тӥ доры ыстэм пророкъёслэсь, верамзэс пеляды ӧд ке понэ, кудъёссэ Мон вазь ӵукна ик ыстӥсько, нош тӥ соослэсь верамзэс уд кылзӥське, –6соку Мон та коркаен Сӥломен кадь ик каро, нош та городэз музъем вылысь вань калыкъёслы карганы сёто”».
7Та кылъёсты Кузё-Инмарлэн корказ вераса улыкуз, священникъёс но, пророкъёс но, вань калык но Иеремияез кылзӥзы.8Кузё-Инмарлэсь вань косонзэ калыклы верам бераз священникъёс, пророкъёс, вань калык Иеремияез кутӥзы но шуизы: «Тон кулыны кулэ.9Малы тон Кузё-Инмарлэн нимыныз азьпалзэ тодытыса вераськод но шуиськод: ”Та корка – Сӥлом выллем луоз, та город тырттэм кылёз, улӥсьёсыз уз ни луэ?”» Кузё-Инмарлэн корказ вань калык Иеремиялы пумит султӥз.10Та сярысь Иудеяысь кивалтӥсьёс кылӥзы но, эксэйлэн юртысьтыз Кузё-Инмарлэн корказ лыктыса, Кузё-Инмар коркалэн выль капка выжыяз пуксизы.11Соку священникъёс, пророкъёс кивалтӥсьёслы, вань калыклы тазьы шуизы: «Та адямиез виёно, малы ке шуоно со асьмелэн городмылы пумит азьпалзэ тодытыса вера, тае тӥ асьтэлэн пельыныды кылӥды!»
12Вань кивалтӥсьёслы, вань калыклы Иеремия шуиз: «Монэ Кузё-Инмар та коркалы пумит, та городлы пумит азьпалзэ тодытыса, вань та кылэм кылъёстэс вераны ыстӥз.13Озьыен, шонертэлэ асьтэлэсь сюресъёстэс, ужъёстэс но Инмардылэсь Кузё-Инмарлэсь верамзэ кылзӥське, соку Кузё-Инмар тӥледлы сӥзем шугадӟонэз воштоз.14Нош мон сярысь ке верано, тани, мон тӥляд кияды; монэн озьы каре, кызьы тӥляд син азяды ӟечлыко но шонерлыко адӟиськоз.15Но ӟеч тодэ: монэ вииды ке, асьтэ вылэ янгыштэм вирез басьтыса поноды, городды вылэ но, отын улӥсьёс вылэ но; уго зэм ик Кузё-Инмар тӥ доры, вань со кылъёсты тӥляд пеляды поныны монэ ыстӥз».
16Соку кивалтӥсьёс, вань калык но священникъёслы, пророкъёслы шуизы: «Та адямиез виыны уг яра, малы ке шуоно со Инмармылэн Кузё-Инмарлэн нимыныз асьмелы вераз».17Нош та музъемысь тӧроос пӧлысь куд-огез султӥзы но вань калыклэн люкаськем кенешезлы шуизы:18«Езекиялэн, Иудеяысь эксэйлэн, кивалтон нуналъёсаз Морасфитысь Михей азьпалзэ тодытыса улӥз, со Иудеяысь вань калыклы шуиз:
”Тазьы вера Саваоф Кузё-Инмар:
Сӥон бусы выллем гыремын луоз,
Иерусалим из люкъёслы пӧрмоз,
та коркалэн гурезез нюлэсо вырйыллы пӧрмоз”.
19Со понна сое Езекия, Иудеялэн эксэез, быдэс иудей калык виизы-а? Кузё-Инмарлэсь со ӧз кышка-а, Кузё-Инмарез сюлворыса ӧз куры-а? Кузё-Инмар соос вылэ вуоно шугадӟон нуналъёсты воштӥз; нош асьмеос лулъёсмылы эшшо но бадӟымгес уродлык лэсьтэммы потэ-а?»
20Кузё-Инмарлэн нимыныз азьпалзэ тодытыса озьы ик кыӵе ке но Урия, Кириаф-Иаримысь Шемаиялэн пиез, та городлы пумит, та музъемлы пумит чылкак Иеремиялэн кадь ик кылъёсын вералляз.21Солэсь кылъёссэ Иоаким эксэй, солэн вань кузёйыръёсыз, вань кивалтӥсьёсыз кылэм бере эксэй сое виыны вылысь утчаз. Та сярысь кылэм бераз Урия кышкаса пегӟиз, Египетэ кошкиз.22Нош Иоаким эксэй Египетэ но адямиосты ыстӥз: Елнафанэз, Ахборлэсь пизэ, соин ӵош мукетъёссэ но.23Урияез Египетысь поттӥзы но Иоаким эксэй доры вайизы, сое мечен ӵогыса вииз, солэсь шӧйзэ огшоры калыклэн шӧй ватон интыез доры куштӥзы.
24Нош Сафанлэн Ахикам пиез Иеремия палан вал – калык кие сое виыны сётонлы со пумит вал.
Глава 26