Выбрать язык
Книги Ветхого Завета
Книги Нового Завета
с русским текстом1Иерусалимысен Иеремия пророк Вавилонэ улыны выжемъёс пӧлы кылем тӧроослы, священникъёслы, пророкъёслы, Навуходоносорен Иерусалимысь поттэм вань калыклы таӵе кылъёсын гожтэт ыстӥз, –2Иехония эксэй, эксэйлэн анаез, евнухъёс, Иудеялэн но Иерусалимлэн кивалтӥсьёсыз, лэсьтӥськисьёс, дуриськисьёс Иерусалимысь потэм бере3Иудеялэн Седекия эксэез Вавилонысь Навуходоносор эксэй доры ыстэм Сафанлэн Елеаса пиез пыр но Хелкиялэн Гемария пиез пыр таӵе кылъёсын гожтэт ыстӥз:
4«Тазьы шуэ Израильлэн Инмарез Саваоф Кузё-Инмар ваньмызлы пленэ шедемъёслы, Мынэсьтым Иерусалимысь Вавилонэ улыны нуэмъёсылы:5коркаос пуктылэ но отын улэ, садъёс мерттэ, соослэсь емышсэс сие.6Кышно басьтэ, нылъёс, пиос будэтэ; пиостылы кен вае, нылъёстэс картлы сётэ – соос но пиос, нылъёс мед вордозы, йылэ-будэ, эн кулэсме отын.7Тӥледыз улыны выжытэм городлэн тупаса улонэз сярысь сюлмаське, со понна Кузё-Инмарлы вӧсяське, уго со ваньлыкен улӥз ке, тӥледлы но каньыл луоз.
8Уго тазьы шуэ Израильлэн Инмарез Саваоф Кузё-Инмар: пӧлысьтыды пророкъёс, тунаськисьёс визьдэс медаз суралэ, уйин адӟем вӧтъёстэс санэ эн понэ;9Мынам нимыным соос ӧрекчаськыса азьпалзэ тодыто; Мон соосты ӧй ыстылы, – шуэ Кузё-Инмар.10Уго тазьы шуэ Кузё-Инмар: Вавилонын тӥледлы сизьымдон ар тырмем бере Мон тӥ доры лыкто но Аслэсьтым тӥ сярысь верам ӟеч кылме быдэсто – та интые берен тӥледыз ваён понна.11Мон тодӥсько тӥ пумысен Аслэсьтым малпанъёсме-мылкыдъёсме, – шуэ Кузё-Инмар, – ӟеч каронлы со малпанъёс, уродлы ӧвӧл – тӥледлы азьпал улон но оскиськон сётон понна.12Мыным вазиськоды, мыныса Мыным вӧсяськоды, Мон тӥледыз кыло;13Монэ утчаса шедьтоды, вань сюлмыныды утчады ке.14Тӥ Монэ шедьтоды, – шуэ Кузё-Инмар, – соку Мон тӥледыз пленысь берыкто, вань калыкъёс пӧлысь, улляса лэзем вань интыосысь тӥледыз огазе люкало, – шуэ Кузё-Инмар, – кытысен поттӥ вал, со интые ик тӥледыз берыкто.15Тӥ шуиськоды: ”Кузё-Инмар Вавилонысен но милемлы пророкъёс сётӥз”.
16Давидлэн престол вылаз пукись эксэй сярысь Кузё-Инмар тазьы шуэ, та городын улӥсь вань калык сярысь но, тӥледын ӵош пленэ нуымтэ агай-вынъёсты сярысь но, –17соос сярысь тазьы шуэ Саваоф Кузё-Инмар: тани, Мон соос вылэ меч, сютэм улон, сьӧдчер лэзё но соосты шакшы луэменызы сэрен сиыны ярасьтэм, номырлы ярасьтэм смоква мульыосты кадь каро.18Меч улын, сютэм улонэн, сьӧдчерен соосты ёртыса возё, музъем вылысь вань эксэйлыкъёслы соосты ёртыса-ӝикатыса возьыны эрик сёто; вань калыкъёс пӧлын, кытчы гинэ мон соосты улляса уг лэзьы, соосты каргалозы, соослэсь кышкалозы, серем карозы, тышкаськозы, –19Мынэсьтым верам кылъёсме кылзӥськымтэзы понна, – шуэ Кузё-Инмар, – соос доры Мон Аслэсьтым ляльчиосме, пророкъёсты, со кылъёсты вераны ыстылӥ, вазь ӵукнаысен ик ыстылӥ, нош соос ӧз кылзӥське, – шуэ Кузё-Инмар.
20Нош тӥ, ваньды улыны выжемъёс, Мынам Иерусалимысь Вавилонэ келям муртъёсы, кылзэлэ Кузё-Инмарлэсь верам кылзэ:21тазьы шуэ Израильлэн Инмарез Саваоф Кузё-Инмар Колиялэн Ахав пиез сярысь, Маасеялэн Седекия пиез сярысь, кудъёсыз Мынам нимыным азьпалзэ тодытыса ӧрекчаськон верало: тани, Мон соосты Вавилон эксэйлэн Навуходоносорлэн киулаз сёто но, со тӥляд син азяды соосты виылоз.22Вавилонэ улыны выжем вань иудейёс кабыл басьтозы тазьы юриськонэз: ”Кузё-Инмар тыныд Седекиялы но Ахавлы кадь мед лэсьтоз”, соосты Вавилон эксэй тыл вылын пыжиз.23Израильын жоб ужъёс лэсьтэмзы понна, матысь муртъёссылэн кышноосынызы азыса улэмзы понна, Мынам нимыным косымтэ, ӧрекчаськон кылъёс вераллязы; Мон та сярысь тодӥсько, Мон сое адӟись луисько, – шуэ Кузё-Инмар.
24Нехеламысь Шемаиялы вера:25”Тазьы шуэ Израильлэн Инмарез Саваоф Кузё-Инмар: аслад нимыныд Иерусалимысь вань калыклы гожтэтъёс ыстылэмед понна, Софония священниклы, Маасеялэн пиезлы, нош озьы ик вань священникъёслы тазьы гожъямед понна:26”Кузё-Инмар тонэ Иодай священник интые священнике пуктӥз, Кузё-Инмарлэн корказ визьзэ ыштыса, азьпалзэ тодытыса верась котькуд адями сьӧрын чаклась-учкись мед луод, сыӵе муртэ тон пытсэтэ, жильыетэ мед пуктод шуыса:27малы бен тон Анафофысь Иеремияез тӥ дорын азьпалзэ тодытыса верамысь уд дугдытӥськы?28Уго со ми доры но Вавилонэ тазьы вераны ыстылӥз: ”Пленын улон кема кыстӥськоз: коркаос пуктылыса отын улэ, емышо писпуос мерттылэ, соослэсь емышсэс сиыса улэ”».29Софония священник Иеремия пророклы та гожтэтсэ шара лыдӟем бераз30Иеремиялы Кузё-Инмар дорысь тазьы верамын вал:31«Вань улыны выжемъёс доры тазьы вераны ысты: ”Нехаламысь Шемаия сярысь тазьы шуэ Кузё-Инмар: Шемаия тӥ дорын азьпалзэ тодытыса вера, нош Мон сое тӥледыз ӧрекчаськон вылэ оскиськытыны ӧй ысты,32со понна, – шуэ Кузё-Инмар, – тани, Нехаламысь Шемаияез но солэсь выжызэ вӧсь каро; со бордысь та калык пӧлын улӥсь адями уз поты, Аслам калыкелы лэсьтэм ӟечлыкез со уз адӟы, – шуэ Кузё-Инмар, – уго со Кузё-Инмарлэсь кылзӥськытэк вера”».
Глава 29