Выбрать язык
Книги Ветхого Завета
Книги Нового Завета
с русским текстом1Кузё-Инмар дорысь Иеремиялы тазьы верамын вал:2«Тазьы шуэ Израильлэн Инмарез Кузё-Инмар: Мынэсьтым вань верам кылъёсме книгае гожты.3Уго тани, вуо нуналъёс, – шуэ Кузё-Инмар, – Аслэсьтым калыкме, Израиль выжыез, Иуда выжыез, пленысь берыктэм бере, – шуэ Кузё-Инмар, – берен ваё атайёссылы сётэм музъеме, сое киулазы соос возёзы!»4Тани Кузё-Инмарлэн Израиль но Иудея сярысь верам кылъёсыз.
5Тазьы шуиз Кузё-Инмар:
«Куалекъян, кышкан куараосты ми кылӥськомы,
тупаса улон куараез ум кылӥське.
6Юалэ но малпаське: пиосмурт нылпи вае-а?
Малы бен Мон котькуд пиосмуртлэсь,
нылпи вайись кышномуртлэсь кадь,
киоссэ кус бордысьтыз адӟисько,
ваньзылэн ымныръёссы но бездытэсь?
7Э, куректон-кайгу! Быдӟым со нунал, солы укшасез ӧй на вал;
та Иаков понна туж секыт вакыт, но солэсь со утемын луоз.
8Со нуналэ тазьы луоз, – шуэ Саваоф Кузё-Инмар, –
тынад чыртыысьтыд сиесэз сузмыто, жильыетъёстэ но тӥяло;
мурт кунысь калыкъёслы ужаса-тыршыса уз ни улэ,
9асьсэлэн Инмарзылы Кузё-Инмарлы но Давид эксэйзылы,
кудзэ Мон соослы выльысь ӝуто, соос ужалозы-тыршозы.
10Тон но, Иаков ляльчие, эн кышка, – шуэ Кузё-Инмар, –
Израиль, эн дэймы, уго тани, Мон тонэ кыдёкысь шаерысь потто,
пленын улон музъемысь выжыдэ мозмыто;
Иаков берытскоз но шып гинэ, каньылэн улоз,
нокин но сое уз кышкатъя;
11уго Мон тонэн валче, – шуэ Кузё-Инмар, – Мон тонэ утё;
кыӵе калыкъёс пӧлы тонэ улыны пазяй, Мон соосты одӥгтэм быдто,
нош тонэ уг быдты;
мертаса Мон тонэ вӧсь каро, но вӧсь карытэк уг кельты».
12Тазьы шуэ Кузё-Инмар:
«Вӧсь карем интыед уз бурмы, яраед – туж секыт;
13тынад ужед сярысь – вӧсь карем интыдэ бурмытон сярысь –
нокин но уг сюлмаськы; бурмытӥсь эмъяськон тон понна ӧвӧл;
14вань эшъёсыд тонэ вунэтӥзы, тонэ уг утчало,
уго Мон тонэ тушмонлэн шуккетэныз вӧсь кари,
законлы пумит туж трос ужъёсыд понна туж секыт вӧсь луон сётӥ,
малы ке шуоно сьӧлыкъёсыд трос луизы.
15Малы тон вӧсь карем интыосыд понна,
висёнэдлэн секытэз понна ӝуштӥськод?
Законлы туж трос пумит ужъёсыд понна Мон тае тыныд лэсьтӥ,
малы ке шуоно сьӧлыкъёсыд трос луизы.
16Ваньмыз тонэ сыскисьёс ньылэмын луозы;
тынад вань тушмонъёсыд асьсэос ваньзы пленэ мынозы,
тонэ таркась-куашкатӥсьёс асьсэос таркамын-куашкатэмын луозы,
ваньзэс тонэ таласьёсты таласьёс кие сёто.
17Мон тонэ бинетэн шобырто,
вӧсь карем интыостэ бурмыто, – шуэ Кузё-Инмар. –
Тонэ куштӥськем шуыса нимало вал,
шуо вал: ”Тани Сӥон, со сярысь нокин но уг юа-вера”.
18Тазьы шуэ Кузё-Инмар: тани, Иаковлэсь выжызэ пленысь берыкто,
гуртъёсызлы вожме уг ни потты, –
город нош ик ас вырйылаз ик пуктэмын луоз,
храм но азьвыл интыяз ик пуктэмын луоз.
19Отысь тау карон кылӥськоз,
шулдыръяськисьёслэн куараоссы шуккиськозы:
Мон соосты йылэто, соос уз кулэсме, данэ потто, соосты уз ултӥялэ.
20Солэн пиналъёсыз азьвыл кадь ик луозы,
солэн туж трос адямиосыз Мон азьын сылозы,
солэсь вань ёртыса-ӝикатыса возисьёссэ вӧсь каро.
21Солэн азьветлӥсез ас пӧлысьтыз луоз,
кузё-эксэй солэн пӧлысьтыз потоз;
Мон сое матэ каро но, со Мон доры лыктоз;
уго кин ас тодэмъяз Мынам матам лыктыны дӥсьтоз? –
шуэ Кузё-Инмар.
22Тӥ Мынам калыке луоды, Мон тӥледлы Инмар луо».
23Тани, кужмо сильтӧл лыктэ Кузё-Инмар дорысь, лек сильтӧл;
со сьӧлыклэсь кышкасьтэмъёслэн йыр вылазы усёз.
24Кузё-Инмарлэн ӝуась вожпотонэз Ас сюлмызлэсь
малпанъёссэ лэсьтытозь, быдэстытозь уз быры.
Берпуметӥ нуналъёсы тае валалоды.
Глава 30