Выбрать язык
Книги Ветхого Завета
Книги Нового Завета
с русским текстом1«Со вакытэ, – шуэ Кузё-Инмар, –
вань Израиль выжыослы Мон Инмар луо,
нош соос – Мынам калыке луозы».
2Тазьы шуэ Кузё-Инмар:
«Мечлэсь быдэс кылем калык
аслыз ӟечлык луоё кырысь шедьтӥз;
мыно Израилез буйгатыны».
3Кыдёкысен мон доры Кузё-Инмар лыктыса шуиз:
«Бырисьтэм яратонэн Мон тонэ яратӥ,
соин ик тыныд ӟеч эрикме мычи.
4Мон нош ик тонэ интыяло, тон интыямын луод,
Израиль ныл, нош ик тимпанъёсыныд чеберъяськод,
шулдыръяськисьёслэн шудон пӧлазы потылод;
5Самарияысь гурезьёсы нош ик виноградпудъёс мерттылод;
виноград будэтӥсьёс, соосты мерттылӥсьёс,
асьсэос ик емышсэ бичалозы.
6Вуоз нунал, куке возьмаськисьёс Ефрем гурезьын ялозы:
”Султэлэ, Сӥонэ, Инмармы Кузё-Инмар доры тубоме”.
7Уго тазьы шуэ Кузё-Инмар: шумпотыса Иаков сярысь кырӟалэ,
калыкъёслэн йырзы азьын кеськыса ӟечкылалэ;
ивортылэ, данъяса шуэлэ:
”Кузё-Инмаре, Аслэсьтыд калыктэ,
Израильлэсь кылем люкетсэ, уть!”
8Тани, Мон соосты уйпал шаерысь ваё,
музъемлэн пумъёсысьтыз люкало;
синтэм но чутӥсь, нылпи ваёно но нылпи ваем мурт
соосын огазьын, –
туж бадӟым адями уллё татчы берытскоз.
9Синвуэн соос кошкизы, нош Мон соосты буйгатыса нуо;
ву ӧръёс вӧзтӥ, ӵошкыт сюрес кузя соосты нуо,
со вылэ соос уз канжаське,
уго Мон – Израильлы атай,
Ефрем но – Мынам нырысь вордскем нуные.
10Калыкъёс, Кузё-Инмарлэсь верам кылзэ кылзӥське,
кыдёкысь шормуӵъёслы ивортылэ но шуэлэ:
”Кин Израилез пазяз, Со ик сое люкалоз,
аслэсьтыз пудо уллёзэ возьмась кадь сое возьмалоз”;
11Кузё-Инмар Иаковез сьӧлыклэсь мозмытоз,
кин солэсь кужмогес вал,
солэн киулысьтыз но мозмытоз.
12Соос лыктозы но Сӥонлэн ӝужыт интыосаз
шумпотозы-шулдыръяськозы;
Кузё-Инмарлэн ӟечлыказ лыктозы но лыктозы,
чабей, вина, вӧй дуре, ыжпиос но ошъёс дуре,
соослэн лулзы ву кисьтаса тыр карем сад кадь луоз,
азьланяз соос пашмыса уз ни улэ.
13Соку нылмурт бергаса шудон пӧлын шулдыръяськоз,
огазьын луозы егит пиос но, пересьёс но;
мӧзмонзэс шумпотонэн вошто, буйгато соосты,
куректон-кайгыронзы бере соосты шумпотто.
14Священникъёслэсь лулзэс кӧй-вӧйын тыр каро,
калыке Мынам ӟечлыкъёсыным тыр луоз”, – шуэ Кузё-Инмар.
15Тазьы шуэ Кузё-Инмар:
”Рама карын зар бӧрдэм, викышъям, ӝуштэм куара кылӥське;
Рахиль нуныосыз понна бӧрдэ,
соос ӧвӧлысь буйгатскемез уг ни поты солэн”.
16Тазьы шуэ Кузё-Инмар: ”Викышъяса бӧрдонлэсь куарадэ уть,
синъёстэ синкылиослэсь уть,
уго ужамед понна тыныд мед-кузьым вань, – шуэ Кузё-Инмар, –
тушмонлэн музъем вылысьтыз соос берытскозы.
17Азьпал улонэдлы оскиськон вань, – шуэ Кузё-Инмар, –
тынад нылпиосыд асьсэ музъеме берытскозы.
18Кылӥсько бӧрдӥсь Ефремез: ”Тон монэ вӧсь карид –
мон вӧсь каремын кутыса возьыны луонтэм ошпи кадь;
берыкты монэ – берытско, уго Тон – Кузё-Инмар, мынам Инмаре.
19Берытскем берам мон сьӧлыкме вераса ӧпкели,
визьмамзы бере асме ачим макесам чабкылӥ;
мон возьытэ вуттэмын вал, кепыратэмын вал,
малы ке шуоно пинал дырылэсь сӥтэм-сантэм луонзэ нуи”.
20Дуно ӧвӧл-а Мыным Ефрем пие? Яратоно пие ӧвӧл-а со?
Уго, со сярысь вераськыны гинэ кутскисько,
котьку но гажаса сое тодам вайисько;
пушкы-еры со понна шумпотэ,
солы вожпотонме дугдыто, – шуэ Кузё-Инмар.
21Аслыд сюрес пусъёс пукты, аслыд юбоос пукты,
сюлэмдэ сюрес пала берыкты – лыктэм сюрес вылад берыкты;
Израиль ныл, берытскы, та аслад городъёсад берытскы.
22Кема на-а тыныд костаськыса ветлоно, усем нылмурт?
Кузё-Инмар музъем вылэ маке но выльзэ кылдытоз:
кышномурт пиосмуртэз утьыса возёз.
23Тазьы шуэ Израильлэн Инмарез Саваоф Кузё-Инмар: азьланьын, соослэсь пленэ сюремъёссэс берыктэм берам, Иудей музъемын, солэн городъёсаз та кылэз вералозы: ”Кузё-Инмар тонэ бакель мед кароз, шонерлыклэн улон интыез, святой гурезь!”24Отчы Иуда улыны интыяськоз, вань городъёсаз улӥсьёс но, музъем ужасьёс но, пудо сьӧрын ветлӥсьёс но огазе кариськозы.25Уго Мон каньсырам лулэз сектало, котькудзэ куректӥсь-кайгырись лулэз тыр каро».26Та дыръя мон сайкай но учки, уйвӧтэ мыным аслым кельшымон вал.27«Тани, вуо нуналъёс, – шуэ Кузё-Инмар, – куке Израиль юртэз, Иуда юртэз адями кидысэн, пудо кидысэн кизё.28Кызьы Мон соосты чакласа улӥ выжытэм быдтыку, погыръяку, куашкатыку, виылыку, сӧрылыку, озьы ик соосты чакласа уло кылдытыку-выльдыку, мерттыку, – шуэ Кузё-Инмар.
29Со нуналъёсы уз ни вераллялэ:
”Атайёс чырс виноград мульы сиизы,
нош нылпиослэн пиньёссы долказы”.
30Нош котькудӥз кулоз аслаз законлы пумит улэмез понна; кин чырс виноград сиёз, солэн ик пиньыз но долкалоз.
31Тани, вуо нуналъёс, – шуэ Кузё-Инмар, – куке Мон Израиль юртэн-выжыен, Иудалэн юртэныз-выжыеныз выль сӥзён пыр кусып кылдыто.32Таиз сыӵе кусып ӧвӧл, кыӵезэ Мон соослэн атайёсынызы кылдытӥ, соосты, китӥзы кутыса, Египет музъемысь поттыкум. Созэ сӥзён-косон пыр кылдытэм кусыпме соос сӧризы, соосын кусып возьыса ке но Мон улӥсько вал, – шуэ Кузё-Инмар.33Со нуналъёс бере тани кыӵе сӥзён-косон Израиль юртлы-выжылы сёто: Аслэсьтым законме соослэн пушказы пырто, сюлэм вылазы гожто. Соослы Мон Инмар луо, нош соос Мынам калыке луозы, – шуэ Кузё-Инмар.34Азьланяз огзэс огзы, выныз вынзэ, уз ни дышетэ, уз ни шуэ: ”Кузё-Инмарез тод-тодма”, уго ваньзы асьсэос Монэ тодозы, пичиысен бадӟымозь, – шуэ Кузё-Инмар, – малы ке шуоно соослэсь законлы пумит улэмъёссэс Мон кушто, азьланяз сьӧлыкъёссэс но тодам уг ни вайы.
35Тазьы шуэ Кузё-Инмар,
Кудӥз нуназеез югыт карыны шунды сётӥз,
толэзьлы, кизилиослы уез югыт карон понна пуктон-косон сётӥз,
Кудӥз зарезез тулкымъяськытэ, соин ик тулкымъёс вузо;
Солэн нимыз – Саваоф Кузё-Инмар.
36Та пуктон-косонъёс Мынам азям
быдэсъяськемысь дугдӥзы ке, – шуэ Кузё-Инмар, –
соку Израиль выжы но пырак ӵожелы Мынам азям
калык луэмысь дугдоз.
37Тазьы шуэ Кузё-Инмар: инбамез йылӥысен мертаны быгатӥзы ке,
музъемлэсь инъетсэ улӥысен эскеремзы луиз ке,
соку Мон вань Израиль выжыез палэнто со понна,
мар соос лэсьтӥзы, – шуэ Кузё-Инмар.
38Тани, вуо нуналъёс, – шуэ Кузё-Инмар, – куке город Кузё-Инмарлэн данэз понна пуктэмын-интыямын луоз Анамеил каланча дорысен Сэрег капка дорозь,39азьланяз музъем мертан гозызы шонерак мыноз Гарив вырйылозь, отысен Гоаф пала кожоз.40Шӧйёслэн но пень кисьтанлэн быдэс нёжалыз, Кедрон ӧр дорозь быдэс бусы, шундыӝужанысен Вал капкалэн сэрегозяз Кузё-Инмарлэн святой интыез луоз; пумтэм вапумъёс ӵоже уз куашка, уз но люкиськылы».
Глава 31