Выбрать язык
Книги Ветхого Завета
Книги Нового Завета
с русским текстом1Иудей эксэйлэн Седекиялэн кивалтонэзлэн дасэтӥ араз Кузё-Инмар дорысь Иеремиялы таӵе кылъёс верамын вал; та ар Навуходоносорлэн дас тямысэтӥез арез вал.2Соку Вавилон эксэйлэн армиез Иерусалимез котыртыса-ёртыса возиз, Иеремия пророк Иудей эксэйлэн корка бордысьтыз возьмаськисьёслэн азбаразы пытсамын вал.3Седекия, Иудеялэн эксэез, сое отчы пытсакуз, шуиз: «Малы тон азьпалзэ тодытыса вераськод но шуиськод: ”Тазьы шуэ Кузё-Инмар: тани, Мон та городэз Вавилон эксэйлэн киулаз сётӥсько, со киултоз сое;4Седекия но, Иудеялэн эксэез, халдейёслэн кизылэсь уз мозмы, одно ик Вавилон эксэйлэн киулаз сётэмын луоз, соин ваче султыса вераськозы, огзылэсь огзы синзэс ваче адӟозы;5со Седекияез Вавилонэ нуоз, Мон со доры лыктытозь, со отын улоз, – шуэ Кузё-Инмар. – Халдейёсын тӥ ожмаськиды ке, соосты уд ворме”».
6Иеремия шуиз: «Кузё-Инмар дорысь мыным таӵе кыл верамын вал:7тани, Анамеил, Саллум агаедлэн пиез, тон доры вераны лыктэ: ”Мынэсьтым Анафофысь музъемме аслыд басьты, малы ке шуоно ӵыжы-выжыос луиськомы бере, тыныд басьтыны кулэ сое”».8Анамеил, мынам агаелэн пиез, Кузё-Инмарлэн верамезъя мон доры, возьмаськисьёслэн азбаразы, лыктыса шуиз: «Басьты мынэсьтым Анафофысь, Вениамин музъемысь, бусыме, уго люкет басьтыны но, дунэн басьтыны но правоед вань; басьты аслыд». Та Кузё-Инмарлэн кылыз вал шуыса, соку мон тодӥ.9Басьтӥ мон аслам агаелэн Анамеил пиезлэсь Анафофысь бусызэ, мертаса сизьым сӥкль азвесь но дас азвесь коньдон солы сётӥ.10Гожтэт гожтӥ, печатен нюртыса ворсай, тае возьматыны адӟисьёсты ӧти но вес вылын азвесь мертаса сётӥ.11Законъя, пуктон-косонъя печатен нюртыса ворсам вузан-басьтон сярысь гожтэтэз басьтӥ, печатен нюртыса ворсамтэзэ но басьтӥ, –12со вузан-басьтон сярысь гожтэтэз ас агаелэн Анамеил пиезлэн син азяз Масеялэн Нирия пиезлэн Варух пиезлы сётӥ, вузан-басьтон сярысь та гожтэтлэн улаз гожтӥськем адӟисьёслэн син азязы сётӥ, возьмаськисьёслэн азбаразы пукись вань иудейёслэн син азязы сётӥ.13Соос азьын Варухлы курон-косон сётӥ:14«Тазьы шуэ Израильлэн Инмарез Саваоф Кузё-Инмар: та гожъямъёсты басьты, печатен нюртыса ворсам вузан-басьтон сярысь гожтэтэз басьты, тазэ, печатен нюртыса ворсамтэзэ но, басьты, соосты горшоке пон – трос нуналъёс отын мед кыллёзы.15Тазьы шуэ Израильлэн Инмарез Саваоф Кузё-Инмар: та музъемысь коркаосты но, бусыосты но, виноград бакчаосты но адямиос нош ик асьсэлы басьтозы».
16Вузан-басьтон сярысь гожтэтэз Нириялэн Варух пиезлы сётыса, мон Кузё-Инмарлы вӧсяськи:
17«Э, Инмаре Кузё-Инмар! Аслад быдӟым кужыменыд но вӧлъям суйбыгытэныд Тон инмез но, музъемез но кылдытӥд; Тон понна номыр но лэсьтыны луонтэмез ӧвӧл;18сюрсъёсызлы Тон гажан-жаляндэ возьматӥськод, атайёслэн законлы пумит улэмзы понна, соос бере нылпиоссылэн пушказы пунэм берыктондэ понӥськод: Быдӟым Инмаре, кужымо, Тынад нимыд – Саваоф Кузё-Инмар!19Кенешын – быдӟым, ужын – кужмо, Тынад синъёсыд усьтэмын, адями пиослэн сюресъёссы шоры учко, котькудӥзлы солэн сюресъёсызъя, ужезлэн емышъёсызъя пунэмзэ тырон вылысь20Египет музъемын паймымон ужъёс, паймымон тодметъёс лэсьтӥз, та нуналозь Израильын но, вань калыкъёс пӧлын но Тон лэсьтӥськод, со нуналэ кадь ик, Аслыд дано ним басьтӥд,21паймымон тодметъёс, паймымон ужъёс лэсьтыса, кужмо киын, вӧлъям суйбыгытэн, туж бадӟым кышкан вайыса, Аслэсьтыд израиль калыктэ Египет музъемысь поттӥд.22Атайёссылы кыл сётыса сӥзем та музъемез – йӧлын но чечыен ӧръяськись музъемез – соослы сётӥд.
23Соос пыризы но сое киултӥзы, нош Тынэсьтыд верам кылдэ санэ ӧз понэ, Тынад законэдъя улыны ӧз кутске, мар соослы лэсьтыны косӥд, соос сое ӧз лэсьтэ, со понна Тон соос вылэ вань та шугадӟонъёсты лэзид.24Тани, городэз киултон понна ӝутэм сюй мудэтъёс со доры вуо ини; мечен жугиськыса, сютэм улыса, сьӧдчер вӧлмемен, городлы пумит ожмаськись халдейёслэн киулазы со сётӥське ини; мар Тон верад вал, со ик быдэсме ини, тани, Тон тае Ачид адӟиськод ни.25Нош Тон, Инмаре Кузё-Инмаре, мыным шуид: ”Азвесен аслыд музъем басьты, адӟисьёсты ӧть,” – нош со вакытэ город халдейёс кие сётӥське».
26Иеремиялы Кузё-Инмар дорысь тазьы верамын вал:27«Тани, Мон – Кузё-Инмар, котькыӵе лулмугорлэн Инмарез; вань-а мар ке но сыӵе, мае Мон лэсьтыны медам быгаты?28Соин ик тазьы шуэ Кузё-Инмар: тани, Мон та городэз халдейёс кие, Вавилонлэн Навуходоносор эксэез кие сётӥсько, со сое киултоз.29Та городэз котыртыса-ёртыса возись халдейёс отчы пырозы, тылын городэз ӝуатозы, солэсь коркаоссэ сутозы, кудъёсызлэн липет йылъёсазы, Мынэсьтым вожме поттон понна Вааллы ӵындытон курбон сётъязы, мурт инмаръёслы курбон-салам кисьтон сямъёс ортчытъязы.30Израильлэн пиосыз, Иудалэн пиосыз Мынам син азям пинал дырысеныз урод ужъёс гинэ лэсьтылӥзы; Израильлэн пиосыз ас киынызы лэсьтэм ужъёсын Мынэсьтым вожме поттылӥзы, – шуэ Кузё-Инмар.31Та город пуктыны кутскон нуналысеныз та нуналозь юри Мынэсьтым йырме кур карыны, вожме поттыны пуктэмын кадь, сое Мон Ас азьысьтым мед палэнтом шуыса.32Израильлэн пиосыз, Иудалэн пиосыз Мынэсьтым вожме поттылӥзы вань лек ужъёсынызы, соослэн эксэйёссы, кивалтӥсьёссы, священникъёссы, соослэн пророкъёссы, Иудеяысь воргоронъёс, Иерусалимын улӥсьёс лек ужъёс лэсьтылӥзы.33Соос Мынам азям мышкынызы султӥзы, ымнырынызы ӧз, куке мон соосты дышетылӥ, вазь ӵукнаысен ик дышетылӥ, соослэн визь-нод сётонэз кабыл басьтэмзы ӧз поты,34Мынам нимылы сӥзем корка пушкы сое саптась юрӟым макеоссэс пуктылӥзы.35Енном пиослэн нёжалазы, Вааллы сӥзьыса, Молохлы сӥзьыса, асьсэлэсь пиоссэс, асьсэлэсь нылъёссэс тыл вамен поттон понна куалаос пуктылӥзы, – Иудаез сьӧлыке пыртыса, та юрӟым ужез мед лэсьтозы, – Мынам тодам но ӧй вал, сыӵе косон Мон соослы ӧй сётылы.
36Нош табере Израильлэн Инмарез Кузё-Инмар та город сярысь тазьы шуэ, кудӥз сярысь тӥ шуиськоды: ”Вавилон эксэйлэн киулаз мечен, сютэм улонэн, сьӧдчерен сётӥське”, –37вожпотон дыръя, йыры кур луон дыръя, лек потонэ ӝуатскыку уллямъёсме вань шаеръёсысь люкало, та интые соосты берен ваё но кышкатэк улон сёто.38Соос Мынам калыке луозы, нош Мон соослы Инмар луо.39Вань улон ӵожазы Мынэсьтым мед кышкалозы шуыса, асьсэлы, асьсэ бере кылем нылпиоссылы но ӟечлы мед луоз шуыса, соослы одӥг сюлэм, одӥг сюрес сёто.40Соосын пумтэм вапумъёс ӵожелы сӥзён-косон пыр кусып кылдыто; со сӥзён-косонъя Мон соослэсь уг палэнскы, соослы ӟеч ужъёс лэсьтэмысь уг дугды; Мынэсьтым медаз куштӥське шуыса, соослэн сюлмазы Мон Мынэсьтым кышкан пырто.41Соослы ӟеч карыса, соос понна шумпотыса уло, вань сюлмысьтым, вань лулысьтым та музъем вылэ соосты йыг-йыг пуктыло».
42Тазьы шуэ Кузё-Инмар: «Кызьы та калык вылэ туж бадӟым уродлыкез лэзи, озьы ик Аслэсьтым сӥзем вань ӟечлыкме соос вылэ лэзё.43Та музъемысь, дун тырыса, бусы октозы, кудӥз сярысь тӥ шуиськоды: ”Та – калыктэм, пудотэм кыр дунне; со халдейёс кие сётэмын”.44Азвесь тырыса, бусы октозы, гожтыса книгае пыртозы, печатен нюртозы, адӟисьёсты ӧтёзы – Вениамин музъемын, Иерусалим котырын но, Иудей городъёсын, гурезё пал городъёсын, улыгысь городъёсын, лымшорысь городъёсын; уго соосты пленысь берыкто», – шуэ Кузё-Инмар.
Глава 32