Выбрать язык
Книги Ветхого Завета
Книги Нового Завета
с русским текстом1Навуходоносор, Вавилонлэн эксэез, солэн быдэс армиез, солэн киулаз тэрытскыса улӥсь музъем вылысь эксэйлыкъёс, вань калыкъёс но Иерусалимлы пумит, Иудеялэн вань городъёсызлы пумит ожмаськыса улыку, Кузё-Инмар дорысь Иеремиялы верамын вал:2«Тазьы шуэ Израильлэн Инмарез Кузё-Инмар: мын Иудеялэн Седекия эксэез доры но шу солы: ”Тазьы шуэ Кузё-Инмар: тани, Мон та городэз Вавилон эксэйлэн киулаз сётӥсько, – сое со тылын сутоз.3Солэн киызлэсь утиськыны тон уд быгаты, одно ик кутэмын но солэн киулаз сётэмын луод, тынад синъёсыд Вавилон эксэйлэсь ымнырзэ адӟозы, со ас ымыныз тыныд вералоз, Вавилонэ мынод.4Седекия, Иудеялэн эксэез, Кузё-Инмарлэсь верамзэ кылзы! Тон сярысь Кузё-Инмар тазьы шуэ: меч улын тон уд кулы;5каньыллыко тон кулод, атайёстэ – тынэсьтыд азьвыл луэм эксэйёсты – ватыкузы, ческыт зыно макеосты сутылӥзы, озьы ик сутозы тон понна но, ”Э, кузё-эксэй” шуыса бӧрдозы, уго Мон та кылэз верай, – шуэ Кузё-Инмар”».6Иеремия пророк вань та кылъёсты Иерусалимысен Иудеялэн Седекия эксэезлы вераз.7Нош со дыре ик Вавилон эксэйлэн армиез Иерусалимлы пумит ожмаськиз, Иудеялэн быдэс кылем вань городъёсызлы – Лахислы но Азекалы – пумит ожмаськиз; уго иудей городъёс пӧлысь та городъёс гинэ юнматэм каръёс луыса кылизы на.
8-9Иерусалиме учырам вань калыкен эрик сярысь ялыны, котькудӥз аслэсьтыз ляльчи пизэ, ляльчи кышномуртсэ эрике мед лэзёз шуыса, еврей пиез но еврей нылкышноез, – одӥгез но ляльчиын иудеез, аслэсьтыз братсэ, медаз возьы шуыса, Седекия эксэй сӥзён-косон кутэм бере, – Кузё-Инмар Иеремиялы вераз.10Сӥзён-косонэз быдэсъянэ пырем вань кивалтӥсьёс, вань калык, асьсэлэсь ляльчи пиоссэс, ляльчи кышномуртъёссэс эрике лэзён сярысь верамез кылзӥськизы – азьланяз соосты ляльчи карыса возёно ӧвӧл ни – та косонэз санэ понӥзы но, соосты лэзизы;11нош бӧрысь малпаськизы но эрике лэзем ляльчиоссэс, ляльчи кышномуртъёссэс берен вайылыны кутскизы, нош ик соосты ляльчи, ляльчи кышномурт каризы.
12Кузё-Инмар дорысь Иеремия доры Кузё-Инмарлэн кылыз вуиз:13«Тазьы шуэ Израильлэн Инмарез Кузё-Инмар: Египет музъемысь, ляльчи юртысь, поттэм берам тӥляд атайёсыныды Мон сӥзён-косон пыр кусып кылдытӥ но соослы шуи:14”Сизьыметӥ арлэн пумаз котькудды асьтэлэсь браттэс, ассэ тӥледлы вузам евреез, эрике лэзе; тыныд со куать ар мед ужалоз, нош собере сое дорысьтыд эрике лэзь”, нош тӥляд атайёсты Мынэсьтым верамме санэ ӧз понэ, пельзэс но ӧз мыкыртэ.15Али тӥ берытскиды но Мынам син азям шонер лэсьтӥды: котькудды асьтэлэн матысьтылы эрик ялӥды но Мынам нимылы сӥзем коркан, Мон азьын сӥзён-косон пыр кусып кылдытӥды.16Нош бӧрысь куштӥськиды но Мынэсьтым нимме сантэмады: котькудды асьтэлэсь эрике – отчы, кытчы лулзы куриське – лэзем ляльчидэс берен вайиды, нош табере соосты ляльчи интыын возьыны турттыса ёртӥськоды.
17Соин ик Кузё-Инмар тазьы шуэ: тӥ ваньды асьтэлэсь браттэс, асьтэлэсь матысьтэс эрике мед лэзёды шуэмме ӧд кылзӥське; со понна ик, тани, Мон тӥледыз меч улэ, сьӧдчер улэ, сютэм улон киулэ сётӥсько, тӥледыз быдэс дунне вылысь вань эксэйлыкъёслы ёртыса-ӝикатыса возьыны эрик сётӥсько, – шуэ Кузё-Инмар. –18Мынэсьтым сӥзён-косонме сӧрисьёсты, кунянэз шори ӵогыса но ӵогем люкетъёслэн вискытӥзы потыса, Мынам син азям кутэм сӥзён-косон бордын возиськыны чидамтэосты, –19Иудеяысь кивалтӥсьёсты, Иерусалимысь кивалтӥсьёсты, евнухъёсты, священникъёсты, музъем вылысь вань калыкез, кудъёсыз кунянлэн шори ӵогем мугорзылэн вискытӥз ортчылӥзы, –20соосты тушмонлэн киулаз сёто, соослэсь лулзэс утчасьёслэн киулазы сёто – соослэн шӧйёссы ин тылобурдоослы, музъем выл пӧйшуръёслы сиён луоз.21Иудеялэсь эксэйзэ Седекияез но, солэсь кивалтӥсьёссэ но тушмонъёссылэн, соослэсь лулъёссэс утчасьёслэн киулазы сёто, тӥ дорысь чигнам Вавилон эксэйлэн армиезлэн киулаз сёто.22Тани, Мон косон сёто, – шуэ Кузё-Инмар, – соосты та город доры берыкто но соос со вылэ урдскозы, киултозы сое, тылын сутозы сое, Иудеяысь городъёсты улыны ярантэм кыр дуннелы пӧрмыто».
Глава 34