Выбрать язык
Книги Ветхого Завета
Книги Нового Завета
с русским текстом1Иудей эксэйлэн, Иосиялэн Иоаким пиезлэн, ньылетӥ арзэ эксэйын пукыкуз, Иеремиялы Кузё-Инмар дорысь тазьы верамын вал:2«Гожъяны кагаз басьты но Израиль сярысь, Иудея сярысь, вань калыкъёс сярысь тыныд вераны кутскем нуналысен, Иосиялэн эксэйын пукон нуналысеныз, туннэ нуналозь вань верам кылъёсме гожты.3Оло нош Иуда юрт кылоз Мынэсьтым соослы лэсьтыны малпам вань шугадӟонъёсы сярысь, соослэсь ӧрекчи ужъёссэс, сьӧлыкъёссэс но мед куштом шуыса, соос ваньзы урод-лек сюрессы вылысь мед кожозы».
4Иеремия Варухез, Нириялэсь пизэ ӧтиз но Варух Иеремиялэн ымысьтыз потэм Кузё-Инмарлэсь солы верам вань кылъёссэ кагаз вылэ гожтӥз.5Иеремия Варухлы косон сётыса шуиз: «Монэ чакласа уло, Кузё-Инмарлэн корказ мыныны уг быгатӥськы.6Озьыен, тон мын но мынам ымысьтым потэм Кузё-Инмарлэсь кылъёссэ, кудъёссэ тон кагаз вылэ гожтӥд, Кузё-Инмарлэн корказ визян нуналэ калыклы кылӥськымон шара лыдӟы, озьы ик асьсэ городъёсысь лыктэм вань иудейёслы кылӥськымон лыдӟы соосты.7Оло нош соос Кузё-Инмарлэн азяз лякыт сюлмын вӧсяськозы но асьсэлэн урод-лек сюрес вылысьтызы кожозы; уго та калык вылэ туж бадӟым вожпоттон, йыркуръяськон луоз шуыса, Кузё-Инмар ялӥз».8Кагаз вылэ гожтэм Кузё-Инмарлэсь кылъёссэ Кузё-Инмарлэн корказ лыдӟыны Иеремия пророклэсь косэмзэ Нириялэн пиез Варух ваньзэ быдэстӥз.
9Иудей эксэйлэн Иосиялэн Иоаким пиезлэн эксэйын витетӥ арзэ пукыкуз, укмысэтӥяз толэзьын, Кузё-Инмарлэн азяз, Иерусалимысь вань калыклы, Иудей городъёсысь Иерусалиме вань лыктэм калыклы визь утёно шуыса ялӥзы.10Кузё-Инмарлэн корказ, Сафанлэн Гемария пиезлэн, подъясьлэн бӧльмыяз, вылысь азбараз, Кузё-Инмарлэн коркаезлэн выль капкатӥз пырон дорын, Иеремиялэсь кагаз вылэ гожтэм кылъёссэ Варух бадӟым куараен, вань калыклы кылӥськымон лыдӟиз.
11Сафанлэн Гемария пиезлэн Михей пиез кагаз вылэ гожтэм Кузё-Инмарлэсь вань кылъёссэ кылӥз,12эксэйлэн корказ васькиз; эксэй подъясьлэн бӧльмыяз пыриз, но тани, отын вань кивалтӥсьёс пуко вал: эксэйлэн подъясез Елисам, Семаиялэн Делаия пиез, Ахборлэн Елнафан пиез, Сафанлэн Гемария пиез, Ананиялэн Седекия пиез но вань кивалтӥсьёс.13Варух калыклы кагаз вылысь лыдӟыку кылэм вань кылъёсты Михей соослы вераз.
14Соку вань кивалтӥсьёс Варух доры Иегудиез – Хусиялэсь Селемия пиезлэсь Нафания пиезлэсь пизэ – солы вераны ыстӥзы: «Калыклы шара лыдӟем кагаздэ кияд кут но лыкты». Варух, Нириялэн пиез, кагазэз кияз кутӥз но соос доры лыктӥз.15Соос солы шуизы: «Пуксьыса милемлы шара лыдӟы». Варух соослы шара лыдӟиз.16Вань кылъёсты кылзэм беразы соос туж куалектыса огзы шоры огзы учкизы но Варухлы шуизы: «Та кылъёсты ми одно ик эксэйлы вераломы».17Варухлэсь юазы: «Вера ук милемлы, ваньзэ та кылъёсты тон солэн ымысьтыз кызьы гожтӥд?»18Варух соослы шуиз: «Ваньзэ та кылъёсты со аслаз ымыныз вераз, нош мон соосты чернилаен та кагаз вылэ гожъяй».19Соку кивалтӥсьёс Варухлы шуизы: «Мын, пегӟы, тон но, Иеремия но, нокин но медаз тоды, кытын тӥ».20Мынӥзы соос эксэй доры, солэн юртаз пыризы, нош кагазэз Елисамлэн, эксэй подъясьлэн, бӧльмыяз кельтӥзы, ваньзэ та кылъёсты эксэйлы шара веразы.
21Эксэй Иегудиез кагазэз вайыны ыстӥз, со сое Елисамлэн, эксэй подъясьлэн, бӧльмыысьтыз басьтӥз; Иегудий сое эксэйлы кылӥськымон лыдӟиз, эксэй вӧзын сылӥсь кивалтӥсьёслы но кылӥськымон вал.22Эксэй соку, укмысэтӥ толэзьын, тол коркан пуке вал, солэн азяз сӥль кебатон гур ӝуа вал.23Иегудий куиньзэ яке ньыльзэ чурез лыдӟем бере эксэй со чуръёсты, гожъяськон пуртэн вандылыса, гурысь тыл пӧлы куяз, кагазэз тыл пӧлын, ӝуась корт гурын, быдэсак бырытозь.24Ӧз кышкатске, дӥськутсэс ӧз кесялэ эксэй но, солэн та кылъёсты кылэм медоосыз но.25Елнафан, Делаия, Гемария эксэез кагазэз медаз суты шуыса сюлворизы ке но, со соосты ӧз кылзы.26Эксэйлэсь пизэ Иерамеилэз, Азрииллэсь Сераия пизэ, Авдииллэсь Селемия пизэ подъясь Варухен Иеремия пророкез эксэй кутыны косӥз. Нош Кузё-Инмар соосты ватӥз.
27Эксэй кагазэз, Варухлэсь Иеремиялэн ымысьтыз потэм кылъёсты гожтэмзэ, сутэм бере Кузё-Инмар дорысь верамын вал, тазьы шуэмын вал солы:28«Нош ик аслыд мукет кагаз басьты но нырысетӥяз – Иудеялэн Иоаким эксэезлэн сутэм кагазаз – пумиськем вань кылъёсты отчы нош ик гожты.29Нош Иудеялэн эксэезлы Иоакимлы шу: тазьы шуэ Кузё-Инмар: тон та кагазэз тазьы вераса сутӥд: ”Малы тон отчы гожтӥд ”Одно ик Вавилон эксэй лыктоз но та музъемез туркалоз-таркалоз, отысь калыкез но, пудоез но быдтоз” шуыса?”30Со понна Иудеялэн Иоаким эксэез сярысь Кузё-Инмар тазьы шуэ: со бордысь потэм мурт Давидлэн престолаз уз ни пуксьы, солэн шӧез сэрпалтэмын луоз нуназе пӧсь шоры, уйлэн – кезьытаз.31Сое, солэсь выжызэ но, солэсь медооссэ но шонертэм улэмзы понна жуго, соос вылэ, Иерусалимын улӥсьёс вылэ но, Иудеяысь воргоронъёс вылэ но вань уродэз-лекез лэзё, кудзэ Мон соослы верай, нош соос ӧз кылзӥське».
32Иеремия мукетсэ кагазэз басьтӥз но сое подъясь Варухлы, Нириялэн пиезлы, сётӥз, нош соиз отчы гожъяз соысьтыз кагазысь Иеремиялэн ымысьтыз потэм вань кылъёсты, со кагазэз Иудеялэн эксэез Иоаким тыл вылын сутӥз; эшшо соос вӧзы соослы укшась трос кылъёс ватсамын на вал.
Глава 36