Выбрать язык
Книги Ветхого Завета
Книги Нового Завета
с русским текстом1Матфанлэн Сафатия пиез, Пасхорлэн Годолия пиез, Селемиялэн Юхал пиез, Малхиялэн Пасхор пиез кылӥзы Иеремиялэсь вань калыклы тазьы верам кылзэ:2«Тазьы шуэ Кузё-Инмар: кин та городэ кылёз, со меч улын, сютэм улыса, сьӧдчерлэсь кулоз, нош кин халдейёс доры потоз, со улэп кылёз, солэн лулыз солы киултэм байлык интыын луоз, со улэп кылёз.3Тазьы шуэ Кузё-Инмар: та город одно ик Вавилон эксэйлэн армиезлэн киулаз сётэмын луоз, со басьтоз сое».
4Соку кивалтӥсьёс эксэйлы шуизы: «Та адямиез виыны кулэ, малы ке шуоно та город пушкы кылёно ожмаськисьёслэсь суйзэс-пыдзэс юске, таӵе кылъёс вераса, со вань калыклэсь суйзэ-пыдзэ юске, уго та адями та калыклы ӟечлык уг утча, курадӟон-шугадӟон утча».5Седекия эксэй шуиз: «Тани, со тӥляд киулады, тӥледлы вожмин мыныса, эксэй номыр но карыны уг быгаты уго».6Соку Иеремияез кутӥзы но эксэйлэн Малхия пиезлэн возьмаськисьёслэн азбаразы гудӟем гуаз куштӥзы, Иеремияез отчы гозыен лэзизы; со гуын вуэз ӧй вал, дэриез вал, Иеремия дэри пӧлы выйиз.
7Эфиоп пи Авдемелех, эксэй коркан улӥсь евнухъёс пӧлысь одӥгез, кылӥз, Иеремияез гуэ пуктӥзы шуыса; нош эксэй со виын Вениамин капка азьын пуке вал.8Авдемелех эксэй коркась потӥз но эксэйлы шуиз:9«Кузё-эксэе, эксэе мынам! Та адямиос урод лэсьтӥзы, Иеремия пророкез гуэ куштыса; со отын сютэм кулоз, малы ке шуоно городын нянь ӧвӧл ини».10Эксэй Авдемелехлы, эфиоп пилы, таӵе косон сётӥз вераса: «Татысь куамын адямиез сьӧрад басьты но Иеремия пророкез кулэмезлэсь азьло гуысь потты».11Авдемелех сьӧраз адямиосты басьтӥз но, эксэй юртысь кеносэ пырыса, ярасьтэм вуж басмаосты, вуж ӟустариосты басьтӥз но гуэ Иеремия доры гозы кузя лэзиз.12Эфиоп пи Авдемелех Иеремиялы шуиз: «Та куштӥськем вуж басмаосты, ӟустариосты кунулад, гозы улэ пон». Иеремия озьы ик кариз.13Иеремияез гозы кузя кыскыса, гуысь поттӥзы; возьмаськисьёслэн азбаразы Иеремия кылиз.
14Соку Седекия эксэй Иеремия пророкез ас дораз, Кузё-Инмарлэн корказ куинетӥяз пырон доры, ӧтьытӥз, эксэй Иеремиялы шуиз: «Мон тынэсьтыд мар ке юай ке, мынэсьтым номыре но эн ваты».15Иеремия Седекиялы шуиз: «Мон тыныд усьтӥ ке, виыны уд сёты-а? Мон тыныд визь-кенеш сётӥ ке, тон уд кылзы монэ».16Лушкемен Седекия эксэй Иеремиялы кыл сётыса шуиз: «Асьмелэсь та лулмес кылдытӥсь Кузё-Инмар улэп, тонэ виыны уг сёты, тынэсьтыд лулдэ утчась та адямиослэн киулазы тонэ уг сёты».
17Соку Иеремия Седекиялы шуиз: «Тазьы шуэ Израильлэн Инмарез, Саваоф Инмар Кузё-Инмар: Вавилон эксэйлэн кивалтӥсьёсыз доры потӥд ке, тынад лулыд улэп кылёз, та город но тылын сутэмын уз луы, тон улэп кылёд, тынад семьяед но;18нош Вавилон эксэйлэн кивалтӥсьёсыз доры ӧд ке поты, соку та город халдейёслэн киулазы сётэмын луоз, соос тылын сое сутозы, соослэн киулысьтызы тон пегӟыны уд быгаты».19Седекия эксэй Иеремиялы шуиз: «Мон кышкасько халдейёс доры выжем иудейёслэсь, соослэн киулазы монэ медаз сётэ вал, нош соос монэ медаз сантэмалэ вал».
20Иеремия шуиз: «Уз сётэ, кылзы Кузё-Инмарлэсь куаразэ, сое мон тыныд верасько, тыныд ӟеч луоз, тынад лулыд улэп кылёз.21Нош тынад потэмед ӧз ке поты, тани кыл, кудзэ мыным Кузё-Инмар усьтӥз:22тани, Иудей эксэйлэсь корказ кылем вань кышнооссэ Вавилон эксэйлэн кивалтӥсьёсыз доры нуозы, соос шуозы:
”Тынэсьтыд визьдэ тугазы, эшъёсыд тонэ вормизы;
пыдъёсыд дэрие выйизы, соос тон бордысь палэнскизы”.
23тынэсьтыд вань кышноостэ но, вань нылпиостэ но халдейёс доры нуозы, соослэн киулысьтызы тон пегӟыны уд быгаты; Вавилон эксэйлэн киыныз тонэ басьтозы, лэсьтод озьы: та город тылын сутэмын луоз».
24Седекия Иеремиялы шуиз: «Нокин но та кылъёсты тодыны кулэ ӧвӧл, соку тон уд кулы.25Тонэн вераськи шуыса, кивалтӥсьёс кылӥзы ке, тон доры лыктыса, тыныд шуозы: ”Вера милемлы, мар тон эксэйлы верад, милесьтым эн ваты, соку ми тонэ виыны ум сётэ, – нош озьы ик: мар тыныд эксэй вераз”.26Соку тон шу: ”Эксэйлэн азяз аслэсьтым куронме понӥ, – со монэ Ионафанлэн корказ медаз берыкты, отчы медам кулы”».
27Вань кивалтӥсьёс, Иеремия доры лыктыса, солэсь юазы, нош со вераз ваньзэ, кызьы сое эксэй косӥз, соос шыпытак со дорысь кошкизы, малы ке шуоно эксэйлы Иеремиялэсь верамзэ ӧз тодэ.28Возьмаськисьёслэн азбаразы Иеремия Иерусалимез басьтон нуналозь улӥз. Иерусалим киултэмын вал.
Глава 38