Выбрать язык
Книги Ветхого Завета
Книги Нового Завета
с русским текстом1Египетысь Магдолэ, Тафнисэ, Нофе, Пафрос музъеме улыны интыяськем вань иудейёс сярысь Иеремиялы тазьы верамын вал:
2«Тазьы шуэ Израильлэн Инмарез Саваоф Кузё-Инмар: Иерусалим вылэ, Иудеяысь вань городъёс вылэ лэзем вань шугадӟонэз тӥ адӟиды; тани, табере соос тырттэмесь, нокин но отын уг ни улы,3сьӧлыко ужъёс лэсьтылыса улэмзы понна, Мынэсьтым вожме поттыса, мурт инмаръёслы ӵындытыны, йыбыртъяны ветлэмзы понна со, кудъёссэ соос но, тӥ но, тӥляд атайёсты но ӧз тодылэ.4Тӥ доры Аслэсьтым вань ляльчиосме, пророкъёсты, ыстылӥ, вазь ӵукнаысен ик тазьы вераны ыстылӥ: ”Мынэсьтым адӟемпотостэм карем, та юрӟым ужез эн лэсьтэ”.5Нош соос ӧз кылзӥське, сьӧлыко ужъёссылэсь палэнскон понна пельзэс ӧз мыкыртэ, мурт инмаръёслы ӵындытэмысь ӧз дугдэ.6Кисьтӥськиз Мынам йыркуре, вожпотонэ, Иудеяысь городъёсын, Иерусалимысь ульчаосын со ӝуатскиз; кызьы адӟиськоды, соос куашкам интылы, кыр дуннелы пӧрмизы табере.
7Израильлэн Инмарез Саваоф Инмар Кузё-Инмар табере тазьы шуэ: асьтэлэн лулдылы пумит та туж бадӟым уродлыкез малы тӥ лэсьтӥськоды, асьтэ дорысь воргоронъёсты, кышномуртъёсты, быдэ вуэмъёсты, вож нуныосты, асьтэлы люкетлы но кельтытэк, иудей калык пӧлысь быдтӥськоды,8асьтэ киын лэсьтэм арбериосыныды вожме поттӥськоды, улыны лыктэм Египет музъемын мурт инмаръёслы ӵындытыса, асьтэдыз быдтыны но музъем вылысь вань калыкъёс пӧлын карганлы, серекъян-веранлы пӧрмон понна-а?9Тӥ вунэтӥды шат атайёстылэсь сьӧлыклэсь кышкатэк улэмзэс, Иудей эксэйёслэсь, кивалтӥсьёстылэсь сьӧлыклэсь кышкатэк улэмзэс, асьтэлэсь сьӧлыклэсь кышкатэк улэмдэс, кышноостылэсь Иудей музъем вылын, Иерусалимысь ульчаосын сьӧлыклэсь кышкатэк улэмзэс?10Туннэ нуналозь но соос ӧз на зӥбломе, уг кышкало, Мынам законэя уг лэсьто, тӥледлы но, тӥляд атайёстылы но сётэм Мынам пуктон-косонъёсыя уг уло.
11Соин ик тазьы шуэ Израильлэн Инмарез Саваоф Кузё-Инмар: тани, Мон Аслэсьтым ымнырме тӥледлы пумит, быдэс Иудеяез быдтонлы, быронлы берыкто12но кылемзэ иудейёсты, Египет музъеме мыныны но отын улыны асьсэлэсь ымнырзэс берыктэмъёсты басьто; ваньзы соос быдтэмын луозы, усёзы Египет музъем вылэ; мечен, сютэм улыса, быдтэмын луозы; пичиысен кутскыса бадӟымозь меч улын, сютэм улыса кулозы; карганлы, курдатонлы, тышкаськонлы, серекъян-веранлы пӧрмозы.13Иерусалиме мечен, сютэм улонэн, сьӧдчерен лыктэме кадь ик Египет музъемын улӥсьёс доры но лыкто.14Египетэ улыны лыктэм, нош собере берен Иудей музъеме берытскыны малпам иудейёслэн люкетсы пӧлысь нокин но уз пегӟы, одӥгез но быдэс уз кыльы. Вань лулынызы-сюлмынызы отын улыны, бертыны мылкыд каро ке но, нокин но уз берытскы, отысь пегӟыса кошкисьёсыз сяна».
15Кышнооссы мурт инмаръёслы ӵындыто шуыса тодӥсь вань воргоронъёс но, отын туж трос ӵошен сылӥсь кышномуртъёс но, Египет музъемын, Пафросын улӥсь вань калык но Иеремиялы ответ сётыса шуизы:16«Кузё-Инмарлэн нимыныз тынэсьтыд верам кылъёстэ ми ум кылзӥське;17нош одно ик лэсьтом сое, мар милям ымысьтымы потӥз: инлэн нылкышно инмарезлы*а ӵындытомы, солы курбон-салам кисьтомы, кызьы ми Иудеяысь городъёсын, Иерусалимысь ульчаосын лэсьтӥськомы вал, ми но, милям атайёсмы но, милям эксэйёсмы, милям кивалтӥсьёсмы но, малы ке шуоно со виын ми тыресь вал, шудоесь вал, курадӟонэз ӧм адӟылэ.18Нош инлэн нылкышно инмарезлы ӵындытэмысь, солы курбон-салам кисьтонъёс ортчытъямысь дугдэм берамы котьмар ласянь ӟудыса улыны кутскимы, меч улын, сютэм улыса быриськомы.
19Куке ми инлэн нылкышно инмарезлы ӵындытылӥмы, солы курбон-салам кисьтылӥмы, асьмелэн кузпалъёсмылы ивортылытэк шат солэсь тусбуйзэ возьматӥсь пирожкиос лэсьтылӥмы, солы курбон-салам кисьтылӥмы?»
20Соку Иеремия вань калыклы, пиосмуртъёслы но, кышномуртъёслы но, тазьы ответ сётӥсь калыклы шуиз:21«Тӥлесьтыд, тӥляд атайёстылэсь, эксэйёстылэсь, кивалтӥсьёстылэсь, со музъемысь калыклэсь Иудеяысь городъёсын, Иерусалимысь ульчаосын ӵындытъян ортчытъямдэс Кузё-Инмар тодаз ӧз вайы-а? Со Солэн малпаназ ӧз ӝутскы-а?22Кузё-Инмар тӥлесьтыд лэсьтэм лек ужъёстэс, юрӟым ужъёстэс азьланяз чиданы ӧз ни быгаты; со понна ик тӥляд музъемды кыр дуннелы, кышкатон макелы, каргам интылы пӧрмиз, улӥсьёстэк кылиз, – табере сое тӥ асьтэос адӟиськоды.23Уго тӥ, со ӵындытонэз ортчытъяса, Кузё-Инмар азьын сьӧлыкады, Кузё-Инмарлэсь верамзэ ӧд кылзӥське, Солэн законэзъя ӧд лэсьтэ, Солэн пуктон-косонъёсызъя но, Солэн куронъёсызъя но ӧд лэсьтэ, со понна ик та шугадӟон тӥ вылэ вуиз, – табере тӥ сое асьтэос адӟиськоды».
24Вань калыклы, вань кышномуртъёслы Иеремия шуиз: «Египет музъемысь вань иудейёс, Кузё-Инмарлэсь верамзэ кылзэлэ:25”Тазьы шуэ Израильлэн Инмарез Саваоф Кузё-Инмар: тӥ но, тӥляд кышноосты но, мар тӥ ымыныды верады, сое ик киыныды лэсьтылӥды но; тӥ шуиськоды: ”Инлэн нылкышно инмарезлы ӵындытыны, солы курбон-салам кисьтыны асьмелэсь сӥзиськеммес быдэсъяломе”, – та сӥзиськонъёстэс тӥ юн утиськоды, сӥзиськонъёстэс ас дыраз быдэсъяськоды.26Со понна, Египет музъемын улӥсь иудейёс, Кузё-Инмарлэсь верамзэ кылзэ: ”Тани, Мон Аслам быдӟым нимыным кыл сётӥ, – шуэ Кузё-Инмар, – быдэс Египет музъемын одӥг но иудей, ”Улэп Инмар Кузё-Инмар!” шуыса, Мынэсьтым нимме уз ни вера.27Азинлыкты медаз ни луы, бырондэс чакласа уло; Египет музъемысь вань иудейёс меч улын, сютэм улыса кулозы, – одӥгтэм бырозы.28Мечлэсь утиськыны быгатэм ӧжыт люкетэз гинэ Египет музъемысь Иудей музъеме берытскоз на, но ваньмыз Египет музъеме лыктыса отчы кылем иудейёс тодозы, кинлэн кылыз быдэсмоз: Мынамез-а, соослэнэз-а.
29Тӥ мед тододы, – шуэ Кузё-Инмар, – тӥ сярысь Мынам верам кылъёсы тӥледлы бырон понна быдэсмозы шуыса, Мон та интые тӥ доры лыктыса тышкало шуыса, тани, тӥледлы паймымон тодмет:30тазьы шуэ Кузё-Инмар: тани, Египетлэсь эксэйзэ Вафрий фараонэз Мон тушмонъёсызлэн киулазы сёто, солэсь лулзэ утчасьёслэн киулазы, кызьы Иудеялэсь эксэйзэ Седекияез Вавилон эксэйлэн Навуходоносорлэн, солэн тушмонэзлэн, солэсь лулзэ утчасьлэн киулаз сётӥ».
*а 44:17 инлэн нылкышно инмарез – татын вераськон мынэ язычникъёслэн Астарта нимо нылкышно ”инмарзы” сярысь
Глава 44