Выбрать язык
Книги Ветхого Завета
Книги Нового Завета
с русским текстом1Иеремия пророклы мукет калыкъёс сярысь Кузё-Инмарлэн верамез:2Египет сярысь, Евфрат шур дурысь Кархемис кар доры вуэм Нехао фараонлэн армиез сярысь, кудзэ Иудей эксэйлэн Иосиялэн Иоаким пиез эксэйын ньылетӥ арзэ пукыкуз, Вавилонлэн Навуходоносор эксэез пазьгиз.
3«Щитъёс, шибодыос дасялэ но ожмаськыны кутске;
4валъёсты вылэ энер поныса пуксе, вал вылын мынӥсьёс,
шлемъёс изьыялэ; шибодыостэс лэчыт каре, корт дэрем дӥсялэ.
5Малы бен, Мон адӟисько, соос куалектӥзы но берлань чигназы?
Соослэн кужмооссы погыртэмын, берзэс учкытэк бызё,
котыр ласянь шимес кышкан, – шуэ Кузё-Инмар.
6Шаплы пыдо уз пегӟы, кужмо мурт но уз утиськы;
уйпалан, Евфрат шур дурын, соос канжаськыса усёзы.
7Кин со шур кадь ӝутӥське,
зарезь ву кадь тулкымъясько солэн вуосыз?
8Шур кадь Египет ӝутӥське,
зарезь ву кадь тулкымъясько солэн вуосыз,
со шуэ: ”Ӝутӥськыса музъемез шобырто,
быдто городэз, улӥсьёссэ но”.
9Валъёс вылэ пукселэ, ворттэ, ожмаськон уробоос,
ӝутӥське, кужмоос, Эфиопияын улӥсьёс,
Ливияын улӥсьёс, щитъёсын ожмаськисьёс,
Лидияын улӥсьёс, пукыӵ кутӥсьёс, соосты золтӥсьёс;
10уго таиз нунал Саваоф Инмарлэн Кузё-Инмарлэн
тушмонъёсызлы пунэм берыктон нуналыз;
меч соосты сиёз,
соослэн вирынызы солэн кӧтыз тыроз, сюэз юзмалоз;
уго та луоз Саваоф Инмарлы Кузё-Инмарлы
уйпал музъемын, Евфрат шур дурын, курбон сётон.
11Галаадэ мыныса, бальзам басьты, нылмурт, Египет ныл;
юнме шорысь тон кема эмъяськод, но тон уд бурмы.
12Калыкъёс кылӥзы тынэсьтыд возьытэ вуондэ,
викышъяса бӧрдэмед быдэс музъем вылэ кылӥськиз;
уго кужмоен кужмоос ваче шуккиськизы но
кыксы но ӵош погразы».
13Вавилон эксэйлэн Навуходоносорлэн Египет музъемез куашкатыны
лыктонэз пумысен Кузё-Инмарлэн Иеремия пророклы верамез:
14«Египетын ивортэ, Магдолын тодытэ,
Нофын но Тафнисын тодытэ, шуэлэ:
”Султыса дасяськы, меч сие котыр ёростэ”.
15Малы тынад кужмоосыд кымалтэмын? – Сылыны ӧз чидалэ,
Кузё-Инмар соосты улляз уго.
16Пограсьёс тросгес но тросгес луизы, огзы вылэ огзы но усьылӥзы,
ог-огзылы шуылӥзы: ”Султы, ойдо асьме калык пӧлы,
вордӥськем музъемамы, бертомы, быдтӥсь мечлэсь утиськомы”.
17Нош отын кесясько:
”Египетлэн эксэезлы, фараонлы, нимзэ вералэ:
со трос куашетӥз но дырез келяз!”
18Улӥсько Мон, – шуэ Эксэй, Кинлэн нимыз Саваоф Кузё-Инмар,
гурезьёс пӧлысь Фавор кадь, зарезь вӧзысь Кармил кадь со лыктоз.
19Египет – нылмурт – мукет азе улыны кошкыкудлы,
мар тыныд кулэ, дася,
уго Ноф таркамын луоз, тырттэм кылёз, улӥсьёстэк кылёз.
20Египет – чебер ветыл;
но солы кулон-бырон уйпалась лыктэ, лыктэ.
21Пӧлысьтыз, куайытэм ветыл кадь медъяськем ожгарчиосыз,
асьсэос берлань чигназы,
ваньзы бызьыса кошкизы, сылыны ӧз чидалэ,
малы ке шуоно соос доры бырон нуналзы вуиз,
соосты тышкан дыр вуиз.
22Табере Египетлэн куараез ӝог кошкись кыйлэн кадь
пичи гинэ на кылӥське;
соос войскоен лыкто,
нюлэс корасьёс кадь со вылэ тӥръёсын лыктозы;
23солэсь нюлэссэ выжытэм коралозы, – шуэ Кузё-Инмар, –
уго соос саранчалэсь но тросгес, лыдъяса быдтонтэм трос соос.
24Сантэмамын Египет ныл, уйпалась вуэм калыклэн киулаз сётэмын.
25Израильлэн Инмарез Саваоф Кузё-Инмар шуэ: ”Тышкало Ноысь Аммонэз, фараонэз но, Египетэз но, солэсь инмаръёссэ но, эксэйёссэ но, фараонэз, солы оскиськыса улӥсьёсты но.26Соосты лулзэс утчасьёслэн киулазы сёто, Навуходоносорлэн, Вавилон эксэйлэн, киулаз сёто, солэн ляльчиосызлэн киулазы сёто; нош собере, азьвыл нуналъёсы кадь ик, отчы улыны интыяськозы”, – шуэ Кузё-Инмар.
27”Нош тон, Иаков ляльчие, эн кышка, эн но куалекты, Израиль:
Мон тонэ, тынэсьтыд кидыстэ но
пленэ шедем музъемысьтызы, кыдёкысь шаерысь утё;
Иаков бертоз но каньылэн, тупаса улоз, нокин но сое уз ни кышкатъя.
28Иаков ляльчие, эн кышка, – шуэ Кузё-Инмар, – Мон тонэн,
кинъёс доры, кыӵе калыкъёс пӧлы Мон тонэ улляй,
ваньзэс быдто,
нош тонэ уг быдты;
чидамонад вӧсь каро, но вӧсь карытэк уг кельты”».
Глава 46