Выбрать язык
Книги Ветхого Завета
Книги Нового Завета
с русским текстом1Кузё-Инмар дорысь мыным верамын вал:2«Тон, адямилэн пиез, [шу]: ”Тазьы шуэ Инмар Кузё-Инмар: Израиль музъемлы бырон, быдэс Израиль музъемлы бырон вуиз.
3Табере тыныд пум вуиз; йыркурме тон вылэ кисьто,
йӧнтэм улонлэн сюресъёсыз кузя ветлэмед понна тонэ судить каро,
вань юрӟым ужъёс лэсьтэм понна кылдэ юало.
4Мон тонэ уг жаля, пунэмзэ берыктытэк уг кельты,
йӧнтэм улонлэн сюресъёсыз кузя ветлэмед понна
тыныд пунэмзэ берыкто,
вань юрӟым ужъёсыд бордад улозы,
соку тӥ тододы, Мон – Кузё-Инмар.
5Тазьы шуэ Инмар Кузё-Инмар:
одӥг шугадӟон, тани, шугадӟон лыктэ.
6Пум вуиз, вуиз пум, тон вылэ султӥз; тани вуиз,
7бырон тон доры вуиз, музъем вылын улӥсь!
Дыр вуэ, огыр-бугыр улонлэн нуналыз вуэ,
гурезьёсын шулдыръяськон-шумпотон куараос уз ни кылӥське.
8Тани, ӝоген тон вылэ йыркурме кисьто,
тыныд вожпотонме возьмато,
йӧнтэм улонлэн сюресъёсыз кузя ветлэмед понна тонэ судить каро,
вань юрӟым ужъёс лэсьтэмед понна кылдэ юало.
9Мон тонэ уг жаля, пунэмзэ берыктытэк уг кельты.
Йӧнтэм улонлэн сюресъёсыз кузя ветлэмед понна
тыныд пунэмзэ берыкто,
юрӟым ужъёсыд бордад улозы;
соку тӥ тододы, Мон – кылэз чурыт юась Кузё-Инмар.
10Тани нунал! Тани вуиз, тӥляд матады бырон вуиз.
Вӧсь карон корт боды сяськаяськиз но, вылтӥяськон пушйиз.
11Сьӧлыклэсь кышкатэк улонлэн корт бодыез вылэ кужым ӝутске;
узырлыксылэсь но куаш поттыса улонзылэсь но,
чеберлык пӧлын улонзылэсь но номыриз но уз кыльы.
12Дыр вуиз, нунал вордскиз;
басьтэм мурт медаз шумпоты, вузам мурт медаз бӧрды,
уго вожпотон ваньзы-ваньзы вылын улэ.
13Уго вузкарись муртъёс вузам вуззы доры уз берытске,
соос улэп ке но кыльысалзы;
уго соослэн вань-вань адямиоссы сярысь
азьпалзэ тодытӥсь адӟон уз воштӥськы,
аслаз законлы пумит улэменыз нокин но аслэсьтыз улонзэ
уз юнматы.
14Гумыен пельтозы но, ваньзы дасяськозы,
нош нокин но оже уз мыны:
уго Мынам вожпотонэ вань-вань адямиоссы вылын улэ.
15Ульчаосын мечен корало,
нош корка пушкы сьӧдчер но сютэм улон пыремын.
Бусые учырамъёс меч улын кулозы, нош кин городэ кылемын,
сое сютэм улон но сьӧдчер погыртозы.
16Соос пӧлысь улэп кылемъёс нёжалъёсысь дыдыкъёс музэн
пегӟыса гурезьёсын улозы;
котькудӥз аслаз законлы пумит улэмез понна
ваньзы соос ӝуштыса улозы.
17Ваньзылэн суйзы-пыдзы юскиськоз,
ваньзылэн пыдесъёссы ву кадь дыр-р куалекъялозы.
18Соку соос чурыт бышкись дӥськутэн куссэс думозы но
куалекъяса улозы;
ваньзылэн ымнырзы возьдаськыса улоз,
ваньзылэн йырзы гольык кылёз.
19Азвесьсэс соос ульчае зӥртозы,
зарнизы но кулэтэм-юрӟым макелы пӧрмоз.
Кузё-Инмарлэн вожпотон нуналаз
азвесьсы но, зарнизы но уз быгатэ соосты утьыны.
Зарниен, азвесен соос лулзэс тыр уз каре,
кӧтпушсэс но пачыл уз каре;
зарниен азвесь пыр уго соос законлы пумит улыны кутскизы.
20Чеберъяськон дӥськутэн дӥсяськыса,
вылтӥяськыса-данъяськыса улыны кутскизы,
со чеберъяськонъёссылэсь юрӟым сульдэръёс-идолъёс лэсьтылӥзы;
со понна ик соослэсь узыр чеберъяськон арбериоссэс
юрӟым макелы пӧрмыто.
21Со сульдэръёсты мурт киосы люкетлы-мылеслы сёто,
музъем выллэн законлы пумит улӥсьёсызлы турканы-тарканы сёто,
соос сапталозы соосты.
22Та калык бордысь ымнырме палэнто но,
Мынэсьтым дунолэсь но дуно лушкем интыме сапталозы;
отчы таласьёс-лушкасьёс лыктозы но сапталозы сое.
23Жильы лэсьты, уго та музъем вирын тырмемын,
сьӧсь ужъёсын пачылмемын ни,
город но виылонъёсын-эриктэманъёсын пачылмемын.
24Мурт калыкъёс пӧлысь тужгес но лекъёссэ Мон ваё но,
соос та калыклэсь коркаоссэс киултозы.
Кужмоослэн вылтӥяськыса улонзылы пум поно,
соослэн вӧсяськон интыоссы саптамын луозы.
25Бырон лыктэ; каньыллык утчалозы, но уз шедьтэ.
26Шугадӟон бӧрсьы шугадӟон вуоз,
урод ивор сьӧры урод иворъёс вуозы;
пророкез азьпал улонэз тодытӥсь адӟонэз вераны курозы но,
священникъёс дышетэмысь-валэктэмысь дугдозы,
визьнодо пересьёс визь-кенеш уз ни сётэ.
27Эксэй кӧтӝожен улоз, кивалтӥсез кышкан шобыртоз,
музъем вылын улӥсь калыклэн киосыз дыр-р куалекъялозы.
Йӧнтэм улонлэн сюресъёсыз кузя ветлэмзы понна
пунэмзэ берыкто,
кыӵе судэн соос мукетъёсты судить карылӥзы,
сыӵе ик судэн соосты судить каро;
соку соос тодозы, Мон – Кузё-Инмар”».
Глава 7