Выбрать язык
Книги Ветхого Завета
Книги Нового Завета
с русским текстом1Куатетӥ арын куатетӥ толэзьлэн витетӥ нуналаз аслам коркам пукисько вал, Иудеялэн тӧроосыз соку мынам азям пукизы, отысен мон вылэ Инмарлэн Кузё-Инмарлэн киыз лэзиськиз.2Тани мон тыллы, [пиосмуртлы] укшасез адӟи, кускызлэн улаз тыл пиштэ, кускызлэн вылӥяз чилекъяса-пиштыса потӥсь гомась тыл адӟиське.3Со кизэ вӧлъяз кадь, йырысьтым йырсиме кырмиз кадь, дух монэ, музъемен ин вискытӥ ӝутыса, Инмарлэн сётэм паймымон адӟытонэз пыр Иерусалиме, пуш азбарлэн уйпал капка дораз, вайиз, отын Кузё-Инмарлэсь вожзэ поттӥсь, йырзэ кур карись сульдэр-идол пуктэмын вал.4Тӥни, отын Израиль Инмарлэн пиштӥсь данлыкез вал, бусыысь азьвыл адӟем пиштӥсь данлыклы укша вал со.
5Со шуиз мыным: «Адямилэн пиез! Уйпала синъёстэ ӝут». Мон уйпала синъёсме ӝутӥ но, тани, курбон сётон ӝӧк дорысь капкалэн уйпалаз Кузё-Инмарлэсь вожзэ поттӥсь сульдэр-идол сылэ.6Инмар мыным шуиз: «Адямилэн пиез! Адӟиськод-а, мар соос лэсьто? Мон Аслам вӧсяськон интые дорысь мед кошком шуыса, израиль калык татын юрӟымлэсь но юрӟым ужъёс лэсьтэ. Берытскы, талэсь но бадӟымесьгес юрӟым ужъёсты адӟод».
7Дух монэ азбаре пырон доры вайиз, мон учки но борддорысь пасез адӟи.8Инмар мыным шуиз: «Адямилэн пиез! Борддорлэсь пасьсэ бадӟымгес карыса, отчы пыр». Мон, борддорлэсь пасьсэ бадӟымгес карыса, отчы пыри, но тани кыӵе ке ӧс.9Инмар мыным шуиз: «Пырыса учкы шимес юрӟым ужъёссы шоры, кудъёссэ соос татын лэсьто».10Мон пыри но адӟисько: быдэс борддор вылын пӧртэм пумо нюж кыстӥськыса ветлӥсьёс, жобесь пудо-животъёс, израиль калыклэн олокыӵе но сульдэръёсыз-идолъёсыз суредамын.11Израиль калыклэн сизьымдон тӧроосыз соос азьын сыло, соос пӧлын Сафанлэн Иезания пиез но сылэ; котькудзылэн киязы ӵындытонзы вань, ӵындыто но, вылӥе нап пилем ӝутӥське.
12Инмар мыным шуиз: «Адямилэн пиез, адӟиськод-а израиль калыклэн тӧроосыз пеймыт азьын ваньзы асьсэлэн суредо-сульдэро висъетазы мар лэсьто? Шуо уго: ”Кузё-Инмар милемыз уг адӟы, Кузё-Инмар та музъемез куштӥз-кельтӥз”».13Инмар мыным шуиз: «Берытскид ке, талэсь но бадӟымесьгес юрӟым ужъёссэс адӟод».
14Кузё-Инмарлэн коркаезлэн уйпалаз сылӥсь капка доры монэ вайиз, но тани, отын Фаммуз пумысен бӧрдӥсь кышномуртъёс пуко.15Инмар мыным шуиз: «Адямилэн пиез, адӟиськод-а? Берытскид ке, талэсь но юрӟымесьгес макеосты адӟод».
16Дух монэ Кузё-Инмар коркалэн пушкысь азбараз пыртӥз, но тани, мон адӟисько: Кузё-Инмарлэн храмезлэн ӧс дораз, храм бӧльмы но курбон сётон ӝӧк вискын, Кузё-Инмарлэн храмезлы мышкынызы ог кызь вить ӵошен воргоронъёс сыло, ымнырынызы шундыӝужан пала кариськыса сыло, шундыӝужан палтӥ ӝужась шундылы йыбыртъяло.17Инмар мыным шуиз: «Адямилэн пиез, адӟиськод-а? Иуда выжылы татын лэсьтэм таӵе юрӟым ужъёс уг тырмы шат? Соос музъемез но сьӧлыко ужъёсын тырмытӥзы ни уго, нимысьтыз Мынэсьтым вожме поттыса уло на; ныр улазы улвай зынъяны ваё.18Со понна Мон но йыркурен лэсьтыны кутско; Мон соосты уг жаля, пунэмзэ берыктытэк уг кельты; Мынам пелям бадӟым куараен вазиськылӥзы ке но, Мон соосты уг кылы».
Глава 8