Выбрать язык
Книги Ветхого Завета
Книги Нового Завета
с русским текстом1Дас одӥгетӥ арын куинетӥ толэзьлэн нырысетӥ нуналаз Кузё-Инмар дорысь мыным верамын вал:
2«Адями пи! Египетлэн эксэезлы, фараонлы,
солэн адями уллёезлы но тазьы шу:
”Аслад быдӟымлыкеныд кинлы тон укшаськод?
3Тани, Ассур Ливанысь чебересь вайёсын,
вужер сётӥсь лысъёсын, ӝужыт мугоро кедырпу вал;
йылыз солэн пилемъёс доры вуылӥз.
4Вуос сое будэтӥзы, пыдэстэм вуос сое ӝутӥзы,
солэсь выжызэ шур вуос котыртӥзы,
ӧрысьтыз вуоссэ бусыысь вань писпуос доры ӧръялляз.
5Соин ик со бусыысь вань писпуослэсь ӝужытгес луиз,
улвайёсыз но солэн трос вал;
будыкуз трос ву ванен вайёсыз кузесь луизы.
6Улвайёсыз борды ин улысь пӧртэм тылобурдоос кар лэсьтылӥзы,
вайёсыз улын пӧртэм луд пӧйшуръёс пи поттылӥзы,
вужер улаз пӧртэм калыкъёс улӥзы.
7Со чебер адӟиське вал аслаз ӝужыт будэменыз, кузесь вайёсыныз,
уго солэн выжыез бадӟым вуос доры вуылӥз.
8Инмар садысь кедырпуос сое ӧз ӝокатылэ;
кипариспуослэн но сокем ӵемесь улвайёссы ӧй вал,
платанпуослэн но улвайёссы сокем-сокем лабресэсь ӧй вал;
Инмарлэн садысьтыз одӥгез но писпу со кадь чебер ӧй вал.
9Сое Мон трос-трос вайёсын чебер кари;
Инмарлэн садысьтыз вань Едем писпуос солы вожъяськылӥзы.
10Соин ик Инмар Кузё-Инмар тазьы шуэ: мугорыныз ӝужыт луэмез понна, зӧкесь улвайёс вискытӥ йылзэ ӝутэмез но сюлмыныз быдӟымъяськыса вылтӥяськемез понна –11сое Мон калыкъёсын кузёяськись кие сётӥ; солы со лэсьтӥз озьы, кызьы кулэ; законлы пумит улэмез понна Мон сое кулэтэм кари.
12Мурт кунысь адямиос, вань калыкъёс пӧлысь лек муртъёс кораса сое гурезь йылысь сэрпалтӥзы; вань нёжалъёсы солэн вайёсыз усьылӥзы; улвайёсыз нюк пыдэсъёсы усьылыса тӥяськылӥзы, солэн вужер улысьтыз вань калыкъёс кошкизы, сое огназзэ кельтӥзы.13Пограм писпу борды пӧртэм ин тылобурдоос интыяськизы, улвайёсыз пӧлын пӧртэм луд пӧйшуръёс улӥзы.
14Со понна та – ву дурысь нокыӵе писпуос но медаз вылтӥяське асьсэлэн ӝужыт мугорынызы, зӧк улвайёс вискытӥ асьсэлэсь йылзэс медаз ӝутэ, соослэн ӝуждалазылы луыса ву юись писпуос соос борды медаз лякиське; уго соос ваньзы кулон киулэ сётэмын луозы, шайгуэ пырем адями пиосын ӵош пыдэстэм дуннее васькытэмын луозы.
15Тазьы шуэ Инмар Кузё-Инмар: со шайгуэ пырон нуналэ, сое жаляса, Мон бӧрдон нунал ортчытыны косӥ, солы луыса пыдэстэм дуннеез ворсай, солэсь шуръёссэ дугдытӥ, бадӟымесь вуоссэ бызьыны ӧй лэзьы, со пумысен Ливанэз ӝоже уськытӥ, бусыысь вань писпуос со пумысен ӝоже усизы.16Со усьыку потэм куараен калыкъёсты куалектытӥ, пыдэстэм дуннее, шайгуэ пыремъёс доры сое вуттэм берам пыдэстэм дуннеысь вань Едем писпуос, Ливанлэн самой ӟечъёсыз, умойёсыз, ваньмыз ву юисьёс, шумпотӥзы.17Уго соос но соин ӵош пыдэстэм дуннее, мечен корамъёс доры мынӥзы, соин валче улоно-тыршоно муртъёсыз но, калыкъёс пӧлын солэн вужераз улӥсьёс ад пыдэсэ мынӥзы.
18Озьыен, данлыкын, быдӟымлыкын улыкуд, Едем садысь кудӥзлы писпулы ӵошаськод вал? Нош табере Едемысь писпуос кадь ик дунне пыдэсэ куштэмын луод, вандӥськымтэос, мечен погыртэмъёс пӧлын кыллёд. Та – фараон но солэн вань адями уллёез, – шуэ Инмар Кузё-Инмар”».
Глава 31