Выбрать язык
Книги Ветхого Завета
Книги Нового Завета
с русским текстом1Дас кыкетӥ арын дас кыкетӥ толэзьлэн нырысетӥ нуналаз Кузё-Инмар дорысь мыным верамын вал:2«Адями пи! Египетлэн эксэез, фараон, пумысен кыласа-бураса бӧрдыны кутскы, солы шу:
”Тон калыкъёс пушкысь егит лев кадь,
зарезьысь шимес маке кадь, шуръёсысеныд урдскылӥськод,
пыдыныд вуэз пожаськод, кошкись вуоссэс лёгаськод.
3Тазьы шуэ Инмар Кузё-Инмар:
трос калыкъёслэн люкаськонысенызы Мон тон вылэ казьме кушто,
соку соос тонэ калтонэным шедьытыса поттозы.
4Музъем вылэ тонэ сэрпалто, кыр бусые тонэ кушто,
тон вылэ ин улысь пӧртэм тылобурдоос пуксьылозы,
быдэс музъем вылысь пӧйшуръёс, тонэ сиыса, кӧтсэс тырозы.
5Гурезьёс вылэ сӥльдэ куяло, нёжалъёсты шӧйыныд пачылмыто.
6Музъемдэ гурезьёс йылозь виреныд пачылмыто,
музъемдэ уян инты каро; нюкъёсты-гопъёсты виреныд тырмыто.
7Кысэм берад инъёсты ворсало, кизилиосты пеймытомыто,
шундыез пилемъёсын возъяло,
толэзь но югытэныз пиштыса уз ни улы.
8Инмысь вань пиштӥсь макеосты тынад йылад пеймыт каро,
музъем вылад пеймыт лэзё, – шуэ Инмар Кузё-Инмар.
9Трос калыкъёслэсь сюлэмъёссэс куалекъято, тынад усемед сярысь тыныд тодмотэм шаеръёсысь пӧртэм калыкъёслы иворто.10Тон пыр трос калыкъёсты кышкато, соослэн ымныр азязы меченым сэзъяны кутски ке, эксэйёссы тон пумысен курдаса куалектозы, тынад усён нуналад котькудӥз аслаз лулыз понна ялан куалекъяса улоз.11Уго тазьы шуэ Инмар Кузё-Инмар: Вавилон эксэйлэн мечез тон вылэ вуоз.12Кужмо муртъёслэн мечъёссы улэ калыкед погралоз; ваньзы соос – калыкъёс пӧлысь лек муртъёс, соос Египетэз вылтӥяськемысь дугдытозы, солэн адями уллёез одӥгтэм кулоз-быроз.13Бадӟым вуос дурысь вань пудозэ погырто, азьланяз адямилэн пыдыз соосты уз ни пожа, пудоос но пыдынызы-гижыосынызы соосты уз ни пожалэ.14Соку вуоссылы шыпыт улон сёто, шуръёссэс вӧй кадь бызись каро, – шуэ Инмар Кузё-Инмар.15Египетэз кыр дуннелы пӧрмытӥ ке, музъем вылзэ тырттэм-буш кельтӥ ке, со вылын улӥсьёсты ваньзэс погыртӥ ке, соку тодозы, Мон – Кузё-Инмар.
16Та – бӧрдыса кырӟан гур; мурт калыкъёслэн нылъёссы сое кырӟалозы; Египет сярысь, солэн быдэс адями уллёез сярысь сое кырӟалозы, – шуэ Инмар Кузё-Инмар”».
17Дас кыкетӥ арын толэзьлэн дас витетӥ нуналаз Кузё-Инмар дорысь мыным верамын вал:18«Адями пи! Египет калыклэн адями уллёез пумысен кырӟаса бӧрд, сэрпалтыса кушты сое; сое но, тодмо калыкъёслэсь нылъёссэс но шайгуэ пырисьёсын ӵош дуннелэн пыдсаз кушты.
19Кинлэсь тон умойгес?
Улэ васькы, вандӥськымтэосын огазе выд.
20Мечен виемъёс пушкы соос усёзы, Египет меч улэ сётэмын;
поттэ сое, вань адями уллёзэ но.
21Дуннелэн пыдсаз со сярысь, солэн эшъёсыз сярысь
кужмолэсь но кужмо батыръёс вералозы:
”Соос улэ васькизы, мечен корам вандӥськымтэосын огазе выдӥзы”.
22Отын Ассур но солэн быдэс уллёез, солэн котыраз шайпулъёссы,
ваньмыз мечен погыртэм, уськытэм муртъёс.
23Шайпулъёссы дунне пыдэслэн самой пыдсаз пуктылэмын,
солэн адями уллёез кылле шӧйзэ ватон котырын,
соос ваньзы виемын, мечен погыртэмын,
куке но соос улэпъёслэн музъем вылазы
калыкъёсты куалекъятыса возё вал.
24Отын Елам вань адями уллёеныз
эксэезлэсь шӧйзэ ватон котырын кылле;
ваньзы соос виемын, мечен погыртэмын,
улэпъёслэн музъем вылазы калыкъёсты
куалекъятыса возён вакытазы,
вандӥськымтэ дыръязы кулыса дунне пыдсы пыризы,
табере шайгуэ пыремъёсын огазьын сӥтэм-сантэм луонэз
ас вылазы чидано луо.
25Погыртэмъёс пушкы солы но солэн вань адями уллёезлы
кыллён инты сётӥзы;
солэн котыраз шайпулъёссы сыло,
ваньзы вандӥськымтэос, мечен погыртэмъёс отын кыллё;
улэпъёслэн музъем вылазы улыкузы,
вань калыкъёсты куалекъятыса возизы бере,
соин ик соос табере шайгуэ пыремъёсын ӵош
возьытэ вуонэз чидано луо,
погыртэмъёс пӧлы ик ватэмын но.
26Отын Мешех но Фувал трос калыкенызы ӵош;
со котырын шайпулъёссы сыло,
ваньзы вандӥськон сямез ортчытымтэос,
мечен погыртэмъёс отын кыллё,
малы ке шуоно улэпъёслэн музъем вылазы улыкузы,
соос калыкъёсты куалекъятыса возьылӥзы.
27Соос но кулэ ӧвӧл-а вандӥськымтэослэн оже бырем батыръёсынызы огазьын кылльыны, кудъёсыз ожмаськон тӥрлыкъёсынызы валче дуннелэн пыдсаз васькизы, мечъёссэс йыр улазы понӥзы, нош законлы пумит улэмзы лыоссы вылэ кылиз, малы ке шуоно соос, кужмоос, улэпъёслэн музъем вылазы улыкузы, куалекъяса улон вайылӥзы.28Тон но вандӥськон сямез ортчытымтэос пӧлын сузмытэмын луод, мечен погыртэмъёсын огазьын кыллёд.29Отын Едом, солэн эксэйёсыз, солэн вань кивалтӥсьёсыз, соос туж ке но кышкасьтэмесь вал, табере мечен погыртэмъёс пӧлы понэмын; шайгуэ пырем вандӥськон сямез ортчытымтэосын огазьын кыллё.30Отын уйпал шаерлэн кивалтӥсьёсыз, ваньзы соос, вань Сӥдон калык но отчы погыртэмъёсын ӵош пыризы, уго куке но соос калыкъёсты куалекъятыса возизы, табере бадӟым кужыменызы валче возьытэ вуттэмын, вандӥськон сямез ортчытымтэосын, мечен погыртэмъёсын огазьын кыллё, шайгуэ пыремъёсын огазьын сӥтэм-сантэм луонэз ас вылазы нуо.
31Фараон соосты адӟиз ке, мечен погыртэм адями уллёез понна уз ни куректы, буйгатскоз, фараон но солэн вань ожмаськись муртъёсыз, – шуэ Инмар Кузё-Инмар.32Уго Мон улэпъёслэн музъем вылазы улӥсьёс доры кышкан-куалекъян вӧлмытӥсько, фараон но солэн адями уллёез мечен погыртэм вандӥськон сямез ортчытымтэосын огазе понэмын луоз», – шуэ Инмар Кузё-Инмар.
Глава 32