Выбрать язык
Книги Ветхого Завета
Книги Нового Завета
с русским текстом1Кузё-Инмар дорысь мыным верамын вал:2«Адями пи! Ас калыкедлэн пиосызлы кыл вера, соослы шу: ”Кыӵе ке но музъем вылэ Мон меч лэзё но, отысь калык, ас пӧлысьтыз адямиез басьтыса, ас дораз возьмаськись карыса пуктоз,3со, музъем вылэ лыктӥсь мечез адӟыса, гумызэ пелляны кутскоз но ас калыксэ сак кариськыны косоз.4Кин гумы куараез кылыса вылысь сак ӧз ке кариськы, соку со доры меч лыктоз но сое киултоз, солэн вирыз ас вылаз вуоз.5Гумылэсь куаразэ со кылыса вылысь сак ӧз ке кариськы, соку солэн вирыз ас вылаз вуоз, нош кин сак кариськиз ке, со аслэсьтыз улонзэ утьыны быгатоз.6Нош возьмаськись лыктӥсь мечез адӟиз но гумызэ пельтымтэен сэрен калык та сярысь тодытэк кылиз ке, соку меч лыктыса соос пӧлысь кудӥзлэсь ке но улонзэ басьтӥз ке, сьӧлыкез понна со басьтэмын луоз, соку солэн вирыз понна возьмаськисьлэсь кылзэ юало”.
7Тонэ, адямилэн пиез, израиль калыклы возьмаськись карыса пуктӥ, тон Мынам ымысьтым потэм кылэз кылзод но Мынам нимыным соосты визьнодалод.8Законлы пумит улӥсьлы Мон шуи ке: ”Законлы пумит улӥсь! Тон кулонэн кулод”, нош тон номыр но ӧд ке вера законлы пумит улӥсез урод сюрес вылысьтыз утён понна, со законлы пумит улӥсь сьӧлыкез понна кулоз, соку Мон солэн вирыз понна тынэсьтыд кылдэ юало.9Нош тон законлы пумит улӥсез урод сюрес вылысьтыз кожыса утиськыны валэктӥд ке, нош со урод сюрес вылысьтыз ӧз ке кожы, соку со сьӧлыкез понна кулоз, нош тон аслэсьтыд лулдэ утёд.
10Нош тон, адямилэн пиез, израиль калыклы шу: ”Тӥ тазьы шуиськоды: ”Милям йыружъёсмы, сьӧлыкъёсмы ми вылын уло, ми соос пӧлын катьтэммыса быриськомы: кызьы бен улыны ми быгатомы на?”11Тазьы шу соослы: ”Улӥсько Мон! – шуэ Инмар Кузё-Инмар, – сьӧлыко муртлэсь кулонзэ кулэ уг кариськы, сьӧлыко муртлэсь урод сюрес вылысьтыз берытскемзэ но улэп кылемзэ кулэ карисько. Урод-лек сюрес вылысьтыды берытске, берытске; ма понна тӥ бырыны кулэ, израиль калык?”
12Тон но, адямилэн пиез, ас калыкедлэн пиосызлы шу: ”Шонер улӥсез йыруж лэсьтон нуналаз шонер улэмез уз утьы; законлы пумит улӥсь но законлы пумит улон сюрес вылысь берытскон нуналаз законлы пумит улэмез понна уз канжаськы; шонер улӥсь но сьӧлыкан нуналаз шонер улэмез понна улэп кыльыны уз быгаты.13Шонер улӥсьлы шуи ке: ”Тон улэп кылёд”, нош со, шонер улэмез вылэ оскиськыса, урод уж лэсьтӥз ке, соку солэн вань ӟеч ужъёсыз буре ваемын уз луэ, – урод уж лэсьтэмез понна со кулоз.14Законлы пумит улӥсьлы шуи ке: ”Тон кулонэн кулод”, нош со сьӧлыко ужъёслэсь палэнскиз но законъя, шонерлыко улыны кутскиз ке,15та законлы пумит улӥсь мурт пунэм тыроно муртэзлэсь басьтэм залогзэ берыктӥз ке, талам-лушкамез понна дунзэ тыриз ке, улонлэн законъёсызъя ветлыны кутскиз ке, номыр но уродзэ ӧз ни ке лэсьты, со улэп кылёз, уз кулы.16Одӥгез но лэсьтэм сьӧлыкез тодэ ваемын уз ни луы; со законъя, шонерлыко улыны кутскиз бере, со улэп кылёз”.
17Нош тынад калыкедлэн пиосыз шуо: ”Кузё-Инмарлэн сюресэз шонертэм”, шонерзэ верано ке, соослэн асьсэлэн сюрессы шонертэм.18Шонер улӥсь шонер улонэзлэсь куштӥськиз ке, законлы пумит ужъёс лэсьтыны кутскиз ке, со понна со кулоз.19Законлы пумит улӥсь законлы пумит улонэзлэсь куштӥськиз ке, законъя, шонерлыко ужъёс лэсьтыса улыны кутскиз ке, со понна со улэп кылёз.20Нош тӥ шуиськоды: ”Кузё-Инмарлэн сюресэз шонертэм!” Израиль калык, Мон ваньдэс лэсьтэм ужъёстыя судить каро».
21Улыны выжеммылэн дас кыкетӥ араз, дасэтӥ толэзьлэн витетӥ нуналаз, мон доры Иерусалимысь утиськыны быгатэм мурт лыктыса шуиз: «Город куашкатэмын!»22Но та утиськыны быгатэм муртлэн лыктэмезлэсь азьлогес ӝытазе мон вылын Кузё-Инмарлэн киыз улӥз, та муртлэн ӵукна мон доры лыктэмезлэсь азьло Кузё-Инмар мынэсьтым кылме-ымме усьтӥз. Соку, мынам ымы усьтӥськем бере, мон кылтэм-ымтэм ӧй улы ни.
23Кузё-Инмар дорысь мыным верамын вал:24«Адями пи! Израиль музъемысь таркам-тырттэм кылем интыосын улӥсьёс шуо: ”Авраам одӥг вал, та музъемез со люкетлы басьтӥз, нош асьмеос трос кузя; та музъем асьмелы люкетлы сётэмын”.25Соин ик соослы шу: ”Тазьы шуэ Инмар Кузё-Инмар: тӥ сӥлез вирыныз валче сииськоды, синъёстэс сульдэръёсты-идолъёсты пала ӝутӥськоды, вир кисьтӥськоды, – музъемез киулады возьыны ӧдъяськоды-а?26Тӥ меч вылады пыкиськиськоды, кырсь-жоб ужъёс лэсьтӥськоды, ог-огдылэсь кышнодэс саптаськоды, – музъемез киулады возьыны ӧдъяськоды-а?”
27Тани, мар соослы шу: ”Тазьы шуэ Инмар Кузё-Инмар: улӥсько Мон! Кинъёс таркам-тырттэм кылем интыосын уло, меч улэ погралозы, нош кинъёс кыр бусыын, соосты кыр пӧйшуръёслы сиыны сёто; кинъёс юнматэм каръёсын, пещераосын, соосты сьӧдчер погыртоз.28Музъемез кыр дунне пӧлысь кыр дунне каро, быдӟым луэменыз вылтӥяськонэз быроз, Израиль гурезьёс тырттэм-буш кылёзы, мынӥсь-ветлӥсез но уз луы.29Юрӟым-кырсь ужъёс лэсьтэмзы понна музъемез кыр дунне пӧлысь кыр дунне карем берам тодозы, Мон Кузё-Инмар шуыса”.
30Нош тон сярысь, адямилэн пиез, ас калыкедлэн пиосыз верасько борддор вӧзын, корка ӧс выжыосын, соос ог-огзылы, котькудӥз аслаз матысезлы шуэ: ”Мынэлэ, кылзӥське, кыӵе кыл Кузё-Инмар дорысь потӥз”.31Калык люкаськон интые кадь соос тон доры лыкто но тынад син азяд Мынам калыке пуксе, тынэсьтыд верам кылдэ кылзо, но сое уг быдэсто; уго ымынызы соос чеберъяськыса верало, нош сюлмынызы узырлык сьӧры уйисько.32Тани, тон соос понна чебер куараё сюлэмез вырӟытӥсь кырӟась кадь, умой крезьчи кадь; соос тынэсьтыд верам кылдэ кылзо, но сое уг быдэсто.33Нош верам кылы быдэсмиз ке, – тани, быдэсме но ини, – соку тодозы, соос пӧлын пророк вал шуыса».
Глава 33