Выбрать язык
Книги Ветхого Завета
Книги Нового Завета
с русским текстом1Кузё-Инмар дорысь мыным верамын вал:2«Адями пи! Израильлэн возьмасьёсызлы пумит азьпал адӟонзэ тодытыса вера, азьпалзэ тодытыса вера, возьмасьёслы шу: ”Тазьы шуэ Инмар Кузё-Инмар: куректон-кайгу Израильысь возьмасьёслы, соос асьсэзыз асьсэос возьмаса улӥзы! Ыжъёсты возьманы кулэ ӧвӧл-а возьмасьёс?3Кӧйзэ сииды, ыжгонэн шобырскиды, куайытэм ыжъёсты вандылӥды, нош уллёез ӧд возьмалэ.4Лябӟемъёссэ ӧд юнматылэ, висись ыжез ӧд эмъялэ, яраё луэмзэ ӧд биньылэ, йыромемзэ берен ӧд вае, ышемзэ ӧд утчалэ, вӧсь карыса, курадӟытыса, соосын кузёяськыса тӥ улӥды.5Возьмасьтэк кыльыса, соос пазьгиськизы; пазьгиськем беразы соос пӧртэм кыр пӧйшуръёслы сиён луизы.6Мынам ыжъёсы вань гурезьёс кузя, вань ӝужытэсь мувыръёс кузя йыромыса ветло; музъемлэн вань палъёсаз пазьгиськизы ыжъёсы, нокин но соос сярысь уг юалляськы, нокин но соосты уг утча.
7Соин ик, возьмасьёс, Кузё-Инмарлэсь верам кылзэ кылзэлэ.8Улӥсько Мон! – шуэ Инмар Кузё-Инмар, – Мынам ыжъёсы турканы-тарканы кельтэмын, Возьмасьтэк кыльыса, ыжъёсы кыр пӧйшуръёслы сиёнлы пӧрмизы, возьмасьёсы ыжъёсме ӧз утчалэ, возьмасьёс асьсэзыз асьсэос гинэ возьмазы, нош ыжъёсме ӧз возьмалэ, –9со понна, возьмасьёс, кылзэлэ Кузё-Инмарлэсь верам кылзэ.10Тазьы шуэ Инмар Кузё-Инмар: тани, Мон та возьмасьёслы пумит султӥсько, Аслам ыжъёсы понна соослэсь кылзэс юало; соослы ыжъёсме возьманы уг ни сёты, азьланяз возьмасьёс асьсэзыз асьсэос уз ни возьмалэ, соослэн пинь улысьтызы ыжъёсме потто, соослы соос сиён уз ни луэ.
11Уго тазьы шуэ Инмар Кузё-Инмар: тани, Мон Ачим ыжъёсме утчаса шедьто, соосты эскеро-учко.12Кызьы пудо возьмась, пазьгиськыса улэм уллёез пӧлын улыкуз, аслэсьтыз пудо уллёзэ эскере, озьы ик Мон но ыжъёсме эскеро-чаклало но пилемо, пеймыт нуналэ пазьгиськыса улыны кылем вань интыосысьтызы соосты мозмыто, огазе люкало.13Мурт калыкъёс пӧлысь соосты потто, пӧртэм кунъёсысь соосты люкало но ас музъемазы соосты ваё, Израиль гурезьёсын, шуръёс дурын, та музъемлэн вань улыны ярамон интыосаз соосты возьмало.14Ӟеч возь вылын соосты возьмало, улон интызы Израильлэн ӝужыт гурезьёсаз луоз; отын соос ӟеч ворсэтын шутэтскозы, узыр возь вылъёстӥ, Израильлэн гурезь вылъёстӥз ветлозы.15Ыжъёсме Мон Ачим возьмало, соослы кӧлыны-шутэтскыны эрик сёто, – шуэ Инмар Кузё-Инмар.16Ышемзэ утчаса шедьто, йыромемзэ берен ваё, яраё луэмзэ биняло, висисьсэ эмъяло, нош куаемзэ, йӧнтэмзэ быдто; соосты Мон кызьы кулэ, озьы утё-возьмало.
17Нош тӥледыз, Мынам ыжъёсы, – тазьы шуэ Инмар Кузё-Инмар, – ыжен ыж куспын, такаен кечтака куспын тэрымтэос луизы ке, Мон соослы Судья луо.18Ӟеч возь вылын ӟеч турын сиемды тӥледлы уг тырмы шат, эшшо ке, возь вылэ мар кылиз, сое пыдыныды лёгаськоды, чылкыт ву юиськоды, нош кылемзэ пыдыныды пожаськоды.19Озьыен, Мынам ыжъёсы кӧтсэс тыроно луо пыдыныды лёгам бервылысьтыды, юоно луо пыдыныды пожам интыысьтыды.
20Соин ик Инмар Кузё-Инмар соослы шуэ: тани, Мон куаемзэ но, начарзэ но ыжме Ачим судить каро.21Вань лябъёсты поттыса лэзьытозяды урдэскыныды но, пельпумыныды но донгаськоды бере, соосты сюрыныды лекаськоды бере,22Мон Аслэсьтым ыжъёсме утё, соку соосты уз ни лушкалэ, ыжен ыжлы Судья луо.23Соослы одӥг возьмась пукто, Аслэсьтым Давид ляльчиме соосты возьманы пукто; со соосты возьмалоз, со соослы возьмась луоз.24Нош Мон, Кузё-Инмар, соослы соослэн Инмарзы луо, Мынам ляльчие Давид соос пӧлын эксэй луоз. Тае Мон, Кузё-Инмар, верай.
25Сӥзён-косон пыр соосын кусып кылдыто, соосын тупаса улыны кутско, музъем вылысь лек пӧйшуръёсты улляло, соку кыр дуннеын но кышкатэк улозы, нюлэскын но кышкыт уз луы ни изьыны.26Аслам вырйылэ котырысь интыосын улыны соосты бакель карисько, ас дыраз зор сёто, со бакель каронлэн зоръёсыз луозы.27Бусыысь писпу емышсэ сётоз, музъем но емышсэ поттоз; ас музъемазы соос кышкатэк улозы но тодозы: Мон – Кузё-Инмар, соку зӥбыса возись сиессэс куашкато но соосты зӥбет улын возисьёслэн киулысьтызы мозмыто.28Мукет калыкъёс киулэ уз ни сюре, кыр пӧйшуръёс соосты уз ни сие; соос кышкатэк улыны быгатозы ни, нокин но соосты уз ни куалекъяты.29Соос дорын данлыко мерттос будэто, азьланяз музъем вылын сютэм улыса уз ни кулэ, калыкъёслэсь сантэмамъёссэс чидано уз ни луэ.30Тододы, Мон соослэн Инмарзы Кузё-Инмар соосын ӵош луисько, соос, Израиль выжы, Мынам калыке, – шуэ Инмар Кузё-Инмар.31Тӥ – Мынам ыжъёсы, Мынам уллёысьтым ыжъёсы; тӥ – адямиос, Мон – тӥляд Инмарды, – шуэ Инмар Кузё-Инмар”».
Глава 34