Библия
Выбрать язык
Книги Ветхого Завета
Книги Нового Завета
с русским текстом
PSALMOIDEN KIRJ
144 Psalm
Davidan kitändpajo.1Minä ülendaškan sindai, minun Jumal, minun Kunigaz,
kitän sinun nimed kaiken dai igän.
2Kaikuččen päivän minä kitäškan sindai,
ülenzoitaškan sinun nimed kaiken dai igän.
3Sur’ om Ižand, händast pidab kitta,
hänen suruz’ om el’gendamatoi.
4Pol’vespäi pol’vehe kitäškatas sinun radoid,
saneleškatas sinun tegoiden surudes.
5A minä meletan sinun korktan eloarvon surudes,
sinun čudokahiš tegoiš.
6Pagižeškatas sinun suriš da opakoiš tegoiš,
i minä saneleškan sinun surudes.
7Sinun sur’t hüvüt muštaškatas,
pajataškatas sinun todes.
8Hüvä da armoidenandai om Ižand,
tirpai i armahtai.
9Hüvä om Ižand kaikile,
hän om armoidenandai kaikiš ičeze azjoiš.
10Sur’ Sünduižem, kitkaha sindai kaik sinun tegod,
kitkaha sindai sinun pühäd!
11Sanelgaha sinun valdkundan korktas arvos,
pagiškaha sinun sures väges,
12miše rahvaz tedištaiži sinun sures väges,
sinun valdkundan hoštajas surudes.
13Sinun valdkund om igähine valdkund,
sinä pidäškad valdan pol’vespäi pol’vehe.
Ižand om uskoline kaikiš ičeze sanoiš
i pühä kaikiš ičeze azjoiš.
14Ižand tugedab kaikid heilujid,
libutab kaikid langenuzid.
15Kaikiden sil’mäd vauvataba sinuhu,
i sinä andad heile heiden sömän ičeze aigan.
16Sinä avaidad ičeiž käden
i ičeiž hüvüdes sötad kaiken, mi eläb.
17Ižand om tozioiged kaikiš ičeze matkoiš,
hüvä kaikiš ičeze tegoiš.
18Ižand om läheline kaikile, ked kucuba händast,
ked kucuba händast oiktas südäimes.
19Hän täutab händast varaidajiden tahtod,
kuleb heiden kidoid i päzutab heid.
20Ižand kaičeb kaikid händast armastajid,
a kaikid jumalatomid veb kadogehe.
21Minun su ülenzoitkaha Ižandad,
ülenzoitkaha kaik eläb hänen pühäd nimed igän kaiken.
Глава 144
