1Horan ohjandajale. Ižandan käskabunikan Davidan psalm. 2Jumalatoman grähk pagižeb minun südäimes, ved’ hänen sil’miden edes ei ole Jumalan varaidust. 3Ičeze sil’miš hän pidäb ičtaze mugoižen hüvän, ka ei löuda-ki ičeze grähkid, miše hondostada niid. 4Hänen sanad oma kelhad da manitelijad, hän ei tahtoi olda oiktal tel da tehta hüvüt. 5Magaduzsijal hän kudob pahad, hän astub hondod tedme, ei hän vastusta pahut.
6Sur’ Sünduižem, sinun armod oma taivhazesai, pil’vihesai ulotub sinun tozi. 7Sinun oiged mel’ om Jumalan mägiden korktuz’, sinun sud – pohjatoi süvüz’! Mehele i živatale sinä abutad, Sur’ Sünduižem. 8Miččed arvokahad oma sinun armod, minun Jumal! Sinun suugiden al mehen lapsed oma tünäd. 9Sinä sötad heid külläks ičeiž pertin sömižil, sinä jotad heid ičeiž ihastusen jogespäi. 10Sinunno om elon purde, sinun lämoiš mö nägem lämoin.
с русским текстом