1Horan ohjandajale. Davidan psalm pajatandan täht. 2Sinei, minun Jumal, oigetas kitänd Sional, sinei anttud toivotused täuttas Jerusalimas. 3Sinä kuled loičendan. Sinunnoks tuleb kaikutte eläi. 4Meiden grähkäd oma lujas jügedad, no sinä pästad pahad tegod meile. 5Ozakaz om se, keda sinä valičid i lähenzoitid, miše hän eläiži sinun eländsijas. Linnem külläižed sinun kodin hüvüdel, sinun pühäkodin pühüdel. 6Čudokahil tegoil sinä andad vastust meile tozioiktudes, sinä, meiden päzutandan Jumal, man kaikiden agjoiden da edahaižen meren kaičii. 7Ičeiž vägel sinä libutid korktad mäged, sinun kädes om vald i vägi. 8Sinä tüništoitid meren torokan, aldoiden räväidusen da mirun rahvahiden kidan. 9Man agjoiden eläjad pöl’gästuba, konz nägištaba sinun znamoid. Sinä libutad homendesen i ehtan ičeiž hoštoteseks.
10Sinä pidäd hol’t mas, andad sille vihmad, sinä teged sen plodukahaks. Jumalan jogi om täuz’ vet. Sinä kazvatad villäd, mugoižeks sinä teged man. 11Sinä kastad vagod, tazoitad künttud pöudod, pehmitad niid vihmkuroil, blaslovid man villäle. 12Sinä čomenzoitad kezan hüvüdel, sinun jäl’ged oma täuded kaikuttušt plodud. 13Tühj ma tegese vihandaks, mäthad oma täuded ilod. 14Nitud oma živatkogoiden čomiteses, a laksod peitäsoiš villän alle. Kaik ma kirgub i ihastusiš pajatab.
с русским текстом