1Horan ohjandajale. Idifuman mödhe. Asafan psalm. 2Minä libutan änen Jumalaha i kirgun. Minä libutan änen Jumalaha, i hän kulištab mindai. 3Tuskan päivil ecin Ižandad, öl-ki oigendan käden hänehepäi heitmata. Minun heng kel’däse tüništoitusespäi. 4Minä johtutan Jumalad i zavodin henkta, minä meletan, i tusk sebadab minun henged. 5Sinä ed anda minei umbištada sil’mid, minun mel’ ei voi tüništuda, i minä en voi pagišta. 6Minä meletan amuižiš aigoiš, johtutan männuzid vozid. 7Minä muštelen öl ičein pajoid, pagižen ičein südäimenke, i minun heng ecib vastust:
8Jose Ižand hül’gäiži meid igäks i ei armasta meid enambad? 9Jose hänen armod lopihe igäks, i hän om vaikastunu pol’vespäi pol’vhe? 10Jose Jumal om unohtanu ičeze armod i vihas om sauptanu ičeze südäimen? 11Minä sanuin: «Minun gor’a om siš, miše Ülembaižen tegod oma toižed, mi ende».
12Minä johtutan Ižandan tegoid, muštištan sinun amuižid čudoid. 13Minä meletan kaikiš sinun azjoiš, pidän meles sinun surid tegoid. 14Minun Jumal, pühä om sinun te. Ken om völ mugoine sur’, kut meiden Jumal? 15Sinä oled Jumal, teged čudoid. Sinä ozutid ičeiž vägen rahvahiden keskes. 16Ičeiž käden vägel sinä päzutid ičeiž rahvahan, Jakovan i Josifan poigad.
17Minun Jumal, sindai nägiba veded, veded nägiba i säraižiba. Bongad-ki eskai pöruiba. 18Pil’ved valoiba vet, taivhas jüraiži jüru i sinun noled lendiba kaikjale. 19Sinun jürun jutkund kului taivhiš, samaldused lämoitiba man; ma säraiži i rehkihe. 20Sinun matk oli meres läbi, sinun te mäni suriden veziden poikpoli, i niken ei nägend sinun jäl’gid. 21Kuti lambazkogon veid sinä ičeiž rahvahan Moisejan da Aaronan kädel.
с русским текстом