Выбрать язык
Выбрать рассказ Ветхого Завета
Выбрать рассказ Нового Завета
Юмын вӱдымӧ почеш каен, Израиль калык Моав кундемысе тӧрвереш шогалын. Моав-влак Валаам лӱман айдеме деке Израиль калыкым каргаш йодын толыныт. Но Юмо тудлан шижтарен: «Тиде калыкым ит карге: Мый нуным суапландаренам». Туге гынат Валаам моав-влак дене каен. Валаамым чараш манын, кайыме корнышкыжо Юмо Суксым колтен.
Кенета Валаамын оселжо, корно ӱмбалне кердым кучен шогышо Суксым ужын, корно гыч кораҥын. Валаам оселым кырен-кырен уэш корно деке савырен. Адак Суксым ужмеке, осел кокымшо ганалан ӱскыртланаш тӱҥалын, вара мланде ӱмбак возын. Валаамже адак оселым кырен. Тунам Юмо оселын умшажым почын, садет айдеме йылме дене йодын: «Молан тый мыйым ынде кумшо ганалан кырет? Мом мый тылат ыштенам?»
Вара Юмо Валаамын шинчажым почын. Тудат кердым кучен шогышо Суксым ужын. Валаам тунамак сукен шинчын, мланде ӱмбаке кумык шуҥгалтын. Суксо ойлен: «Молан тый оселетым кум гана кырет? Шоныметым шуктен ит керт манын, Мый тыйын корнышкет лектынам. Шонымашет Мыйын ончылно чын огыл». Валаам вашештен: «Мый сулыкыш пуренам, ваштарешем корнышто Тыйын шогыметым пален омыл. Тыланет тиде сайла ок кой гын, мый мӧҥгеш пӧртылам». Суксо каласен: «Ӱжаш толшо-влак дене кае. Но мом Мый тыланет каласем, тудым веле ойло».
Валаамын толмыжым ужын, моав-влак тудлан ойленыт: «Израильым карге». Но Валаам вашештен: «Кузе мый нуным каргем? Юмо нуным ок карге. Кузе ӱмбакышт осалым ӱжам? Юмо нунылан осалым ок колто». Вара каргыме олмеш Валаам кок гана Израиль калыклан порым тыланен.
Шотлымаш (Числа) 22:3-35; 23:7-20
50 