Выбрать язык
Выбрать рассказ Ветхого Завета
Выбрать рассказ Нового Завета
Илен-толын, Израиль калык Юмын сӧрымӧ Ханаан мландыште илаш тӱҥалын. Но тушто нунылан вес калык-влак дене кредалаш логалын. Икана Израиль ваштареш филистим тукым сарзыж-влакым поген улмаш. А Израильын сарзыж-влак дене пырля Давид лӱман самырык рвезын кум изаже каен. Икмыняр жап гыч ачаже Давидым изаж-влак деке кочкышым наҥгаяш колтен. Миен шумеке, Давид той чиеман да шлеман, умдым кучышо пеш кугу капан ик филистим сарзым ужын. Ончылныжо авыртышым нумалше еҥ коштын. Сарзын лӱмжӧ Голиаф улмаш. Голиаф Юмын калыкым тӱрлын игылтын. «Шкендан кокла гыч еҥым ойырыза, да тек мый декем лектеш. Тудо мый денем кредалын да мыйым пуштын кертеш гын, ме тендан кулда лийына», – манын ойлен. Но иктат тудын дене кредалаш пижаш тоштын огыл.
Игылтмым колын, Давид тудын дене кредалаш шонен пыштен. Израиль калыкын кугыжаже чарен каласен: «Тый эше рвезе улат, а тудо самырык годсекак сарзе». Тунам Давид кӱтӱ кӱтымаште кузе маска ден левым сеҥымыж, тудлан Юмын полшымыж нерген ойлен. Кугыжа Давидым кредалаш колташ кӧнен, тудлан той дене ыштыме чием ден шлемым чиктен. Но Давид тыгай сарзе вургемым чиен тунемше лийын огыл. Тудо чыла тиде чиемжым кудашын, кидышке тояжым налын, йогышо вӱдыштӧ ягылгыше вич шаргӱм сумкашкыже пыштен да Голиаф ваштареш лектын.
Давидым воштылын, Голиаф ойлен: «Мый пий улам мо? Молан ваштарешем тоя дене толат?» Давид вашештен: «Тый ваштарешем керде, шашке да умдо дене толат. Мый гын тыйын орлымо Израиль сарзе-влакын Чылакучышо Юмыштын лӱмжӧ дене ваштарешет мием». Тыге манмеке, Давид кӱм луктын, тудым тодылмо ӱштыш пыштен, вуй йырже пӧрдыктен да пыжалтарен колтен. Кӱ Голиафын саҥгашкыже логалын. Тудыжо вигак колен колтен да мланде ӱмбаке шуҥгалтын. Филистим сарзе-влак шаланен куржаш тӱҥалыныт. Тыге Израиль калык тушманым сеҥен.
Кугыжа-влак нерген 1-ше книга (1 Царств) 17:1-53
52 